搵屋搬

今日打開個blog見到話Yaboo Blog要執，真係好shock好唔開心，乜宜家無人寫blog啦咩？點解之前xanga話要執，宜家輪到Yahoo又話要執？

呢個blog，由艾菲決定同米高結婚時開，一心係用來記低搞結婚嘅點點滴滴，到婚後一度諗過摺咗去唔再寫，但始終有感情唔捨得，到發現有咗燒腩仔，艾菲就決定回歸，仲好勤力咁記低陀住燒腩仔嘅點點滴滴，到佢出咗世就記錄佢嘅成長，目的只為他朝有日艾菲唔係佢身邊，燒腩仔都可以係到搵返一D溫暖，記得呢個世界有個媽媽一直都無條件咁愛佢...

呢到絕對係艾菲嘅秘密天地，除咗米高之外，艾菲嘅屋企人同朋友都唔知艾菲有係到寫blog，由初初無人留言自已寫畀自己睇，到開始識到一D同路人blog友，仲成功令艾菲衝破心理關口，帶埋燒腩仔一齊出來同大家玩（艾菲個人本身有D摺，唔會好主動去識朋友），艾菲自己都好surprise寫blog令自己可以有咁大轉變...

寫得好地地，忽然就話要執咗呢到，艾菲真係好好好好好唔捨得，但都只可以無奈接受現實，暫時仲未決定來緊會搬去邊，會即管睇吓Yaboo係9月2日之後畀咩offer再決定，大家又有無咩好建議呢？有定案一定盡快話畀大家知（我來緊仲有燒腩仔十一個月進度要出呀，所以真係要快手搬先掂）﹗

唉...搬blog最怕唔見晒之前D entry，更加怕無咗咁多位blog友嘅支持，大家願意同艾菲keep in touch嗎？

生日rehearsal

左上：咦？呢個乜東東來㗎？有枝嘢咁光嘅？
右上：（艾菲同婆婆一齊唱生日歌之後）嘩﹗你哋同我慶祝生日呀？好開心呀﹗
左下：（真正主角姨媽終於出現）哈哈...我好開心呀﹗
右下：吓？乜個生日蛋糕唔係我㗎？



呢張相，艾菲真係睇幾多次都覺得好好笑﹗話說當日係慶祝燒腩仔姨媽生日，婆婆一拎個生日蛋糕出來，燒腩仔已經好興奮踢晒腳咁，不過我哋一點生日蠟燭，佢就即時變咗個奇怪樣出來，於是婆婆就叫我哋一齊大大聲對住佢唱生日歌，等佢以為我哋係同佢慶祝睇吓佢會有咩反應，而呢個小朋友都非常受落，到真正主角姨媽出場話要同佢影合照，佢就好似知道我哋玩佢咁，歪晒咀郁身郁勢唔肯合作。

仔呀仔，你仲有個幾月先一歲生日呀，呢次當係rehearsal先啦，到時我哋再同你慶祝同切蛋糕啦，媽媽已經好努力咁安排緊點同你慶祝，雖然你到時都仲係一舊飯唔會知同記得發生乜事，但媽媽都會盡量令你有個難忘嘅生日㗎﹗

同場加映一張艾菲一歲生日時影嘅相，其實點解燒腩仔婆婆咁想試吓燒腩仔對生日蛋糕有咩反應，就係事源艾菲想當年一見到自己個生日蛋糕，就好認真咁拎上手研究咗一輪，所以佢好想知燒腩仔會唔會有同樣反應囉﹗

烈火戰車

早在燒腩仔六個月大時，米高的朋友便問我們要不要接收他兒子的二手Thomas三輪車，本來米高嫌單車阻地方不想要，但單車正是艾菲心裡的must buy玩具之一，只是燒腩仔當時還小所以不用急著買而已，反正是遲早都要買的item（如果唔係有呢部二手車，艾菲都打算叫婆婆送），所以便叫米高先將單 車取回家再算。

平日路過AEON玩具部，都見三輪車做特價時最平也要五百多元一部（hello kitty同叮噹米奇款果D），不過Thomas三輪車則是特別貴的，正價要八百多元，大減價都要七百多元，艾菲一直覺得奇怪，怎麼同樣是三輪車又差不多 設計，Thomas的就要賣得特別貴呢？於是有次終於忍不住問售貨員兩者的分別，原來Thomas車是可以摺合，其他車款是不能摺合的﹗於是米高取車回家 後艾菲便很認真地研究（因為原車主爸爸話摺唔埋），很快便被艾菲找到摺合的按扭，摺起以後就容易收藏得多了，YEAH！

 

上個月的某一個weekend，打風前席的下午悶熱到艾菲那裡都不想去，於是便忽然興起決定帶燒腩仔到樓下平台踩單車（嚴格來講係大人推單車至真），雖然燒腩仔的腳還未夠長踩單車，但坐位下面有個腳踏位，可以讓小朋友在不踩單車時將腳放上去，而且坐位又有保護圍欄，避免未坐穩的小朋友跌出車外，感覺都算安全。

起初燒腩仔都有點怕不知道艾菲和米高在做甚麼，艾菲更因推得太快在轉灣時幾乎反車而嚇到他哭起來（米高一見到即刻鬧鬼艾菲呀﹗），但坐著坐著的燒腩仔便開始越來越興奮，後來甚至得得戚戚要自己站起來玩呢﹗

Blog Blog BB Gathering @ 大本型Play Academy

係小檬媽安排下，一眾Blog Blog BB又可以出來聚一聚一齊玩吓啦﹗而今次嘅聚腳點就係大本型三樓間Play Academy﹗仲要係全日任玩，出出入入都無問題，Good呀﹗可惜我哋因為有下場，所以只係去咗早場，玩咗個幾鐘就要走啦﹗

唔知係唔係燒腩仔前一晚同婆婆玩得太high，佢成晚都瞓得唔多好，仲早咗成個鐘起身，出門口時已經有D扭眼瞓，艾菲都估到佢狀態不佳㗎啦，果然去到都係keep住呆呆滯滯，好彩有南瓜仔主動撩佢玩。

 

同南瓜仔玩咗陣之後就帶咗佢入迷宮玩，迷宮入面有拋波波，有滑梯波波池，有韆鞦，但燒腩仔竟然無樣like﹗唯獨呢個彈床佢勉強OK，不過...佢仲未識跳㗎喎。

唔like迷宮就帶返佢出去玩啦﹗睇吓佢玩搖搖馬個樣幾不滿﹗

 一坐落車有得扭軚盤即刻變返笑樣，仲好快學識控制架車添，由初初向後行到後來識得向前行。

 

燒腩仔：唔...揸去邊好呢？

揸完私家車就轉渣跑車啦﹗型呀﹗

 

呢到仲有兩間艾菲細個好恨玩嘅玩具屋仔添﹗

之後同佢返去體操場爬吓高

 又推吓積木咁

 

再呃佢坐入波波池

後尾見有D圓筒型軟墊，就將燒腩仔放入去困住佢

田鼠媽見到又放田鼠B落去玩吓﹗跟住南瓜仔係出面睇到好肉緊﹗

南瓜仔：你係入面搞咩呀？我都想入來玩呀﹗

燒腩仔：嘻...你想入來？無咁易呀﹗

南瓜仔：我終於都入到來啦﹗

燒腩仔：好兄弟﹗攬吓先啦﹗

南瓜仔&燒腩仔：好啦喎﹗你哋影夠未？唔好阻住我哋兩個商量越獄大計好喎﹗

 

後來燒腩仔開始扭得越來越勁，所以我哋決定徹退，臨走前同南瓜仔，龍BB同朗朗一齊影返張大合照先﹗呢張相真係出盡法寶先影得成，好彩龍B媽夠細心，帶定BB最愛星星餅同玩具﹗

其 實艾菲之前都來過大本型兩次，呢個商場係正地鐵站隔離真係超方便，而且都算多嘢食，一直以來嘅印象都唔錯﹗至於呢間Play Academy畀艾菲感覺都幾好，最重要係幾適合小BB來玩，除咗有好多啱佢哋玩嘅設施之外，仲有足夠活動空間畀佢哋去爬or行，就算有年紀較大嘅小朋友 來到，家長都睇到唔怕佢哋會整親小BB，感覺比較安心﹗

大本型Play Academy

幼兒水上安全班~最終回

十堂游水班真係話都無咁快就上完，上星期因為打風加上燒腩仔病咗，我哋一連走咗兩堂無上，不過教練都講明無所謂，反正呢個BB班只係志在畀小朋友開心玩 水，上完堂唔代表小朋友就會識游水，最重要係大人學曉一D安全意識，第時自己帶小朋友去游水就可以避免一D不必要嘅意外，呢一點艾菲好認同㗎，所以每堂都 好留心咁聽書﹗而最尾呢兩堂，教練基本上係無教任何嘢，只係做完熱身就任我哋自己落水玩，所以大家都變得有D hea呢﹗

第九堂：

因 為燒腩仔又扭計唔願飲奶（佢每次一唔舒服就會咁），所以我哋今堂又遲到，去到大家都已經落晒水玩，而燒腩仔又再一次好似明星咁，受到一眾姨姨同哥哥姐姐嘅 歡迎，其中一個姐姐更係即時游過來同燒腩仔講「BB我好掛住你呀」，氹到燒腩仔不知幾咁開心，仲追問燒腩仔下一堂來唔來上堂，附加一句「咁你下堂唔好遲到 啦」。

燒 腩仔呢日心情好好，一有姨姨或者教練哥哥埋來同佢玩佢都會好開心咁笑，但唯一就係樹熊上身，艾菲一想帶佢出去踢水佢就怪叫，仲好似樹熊咁鉗實艾菲唔放，咁 我哋唯有係池邊企吓，畀佢玩吓浮板撥吓水啦，然後佢就好似海洋公園D工作人員咁，企係艾菲大脾到un同搞東搞西，活躍程度絕對係加零一。

不 過臨落堂時都有段小插曲發生咗，當時艾菲諗住襯落堂前同燒腩仔游多轉水呃吓佢踢腳啦，就係呢個時候突然有個十歲大左右嘅男仔以九秒九速度係池邊助跑跳落 水，落水點正正係艾菲身後一米左右，果一刻艾菲都打咗個突，好彩燒腩仔無畀佢嚇親，而教練就即時捉個男仔上水鬧，仲叫佢搵家長來講，可惜家長聽完完全唔當 一回事，其實佢咁做真係好危險，如果艾菲同燒腩仔當時行後多兩步，分分鐘畀佢壓死都似﹗唉...宜家真係有好多唔理小朋友，又或者小朋友做完衰嘢都唔覺得 佢錯嘅家長，我哋做人媽媽嘅一定要小心睇住自己BB﹗

第十堂：

最後一堂，教練索性叫我哋唔好浪費時間做熱身，快手同小朋友落水玩，而燒腩仔今堂都keep住好心情，繼續四圍同其他姨姨say hi，又不停撥水，一有機會就搞搞震玩浮板同研究吓池邊D磚，但佢依然係樹熊上身唔肯踢水，艾菲試咗兩次之後都決定放棄由佢。

唔 知係唔係因為近開學日呢，今堂游水班忽然變咗一場水上家長研討會，個個家長都係到傾搵學校嘅事，小BB嘅媽媽就傾搵N班傾搵幼稚園，大BB嘅家長就傾搵小 學，甚至連中學都討論一輪，而艾菲亦受益唔少，知道多咗區內幼稚園嘅情況，對來緊幫燒腩仔搵學校都有D幫助，始終艾菲無經驗，又唔係好識區內嘅媽媽，真係 要主動問多D人打探吓先得﹗

幼兒水上安全班 ~ 第三回
幼兒水上安全班 ~ 第二回
幼兒水上安全班 ~ 第一回
幼兒水上安全班

玩轉急症室

就係去完藍田兒童遊戲室當晚，返到屋企見燒腩仔頸下面有D紅，艾菲同米高仲以為係揹帶焗到佢紅（因為佢平時一熱或者忟都會紅，但過一陣就會退），點知係飲瞓覺奶前幫佢打開件衫換片，就見到佢成個肚仔都係一點點紅點，無經驗嘅艾菲同米高以為佢出疹，但佢咳咗成個星期都無發過燒又鬼打都無咁精神，而且只係肚仔同頸有紅其他位置完全無事，所以即時影低再打電話畀婆婆問功課，婆婆一見到張相就話應該係敏感，懷疑係遊戲室污糟（吓？咁大獲？米高聽到仲即刻附和話「你都見佢清潔時段根本無人入去清潔啦」），教我哋試吓幫燒腩仔沖涼睇吓有無好D。

結果沖完涼，可能因為眼瞓，燒腩仔扭得好勁，D紅點無退反而多咗，因為當時已經係夜晚十點幾，樓下睇開個兒科醫生肯定閂咗門，艾菲又唔想去睇醫療集團24小時D hea醫生，米高就即刻話返仁安同佢睇急症，其實我哋都知燒腩仔應該無乜事，可能等佢飲完奶冷靜落來瞓一覺就會慢慢退，但米高話唔想夜長夢多（佢都講得啱嘅，如果朝早都未退咪又係要睇醫生，到時得艾菲一個同燒腩仔去睇醫生仲呢hea啦），所以堅持去睇醫生買個安心，順便去拎枝咳水畀燒腩仔飲吓都好喎。

等燒腩仔飲完枝瞓覺奶，我哋就拿拿聲執埋D證件同媽媽袋出發，去到仁安都係十一點左右，好彩當晚唔算多人，前面只係有七八個病人（絕大部分都係BB），登記完等一陣就去分流，然後唔使二十分鐘已經可以見醫生（登記時姑娘仲話可能要等一個鐘先有得見醫生），基本上燒腩仔飲完奶已經成個醒晒，入到急症室更加係爆high（唔通佢同艾菲一樣返到來仁安聞到陣味特別有親切感？），搶飛仔，扯口罩，擒梳化，撩女仔（咁啱有個同佢同一個月出世嘅BB女跌親來睇醫生，人哋已經無乜理佢但佢都係勁high咁尖叫同摸人手仔），分流時又好開心咁自己企係到磅重，真係完全唔覺得佢有病囉﹗

入到房見醫生，呢隻仔完全無喊，仲好開心咁係到搞搞震，先望住醫生同姑娘傻更更咁笑，跟住醫生同佢檢查耳仔佢又伸手去搞吓個儀器，同佢睇喉嚨佢試完條雪條棒咩味之後就想拎個電筒，好彩醫生都見慣世面無表現出唔鐘意，檢查完之後醫生都話燒腩仔應該係敏感，而且只係好輕微果種，但就唔知到底係乜嘢敏感（因為除咗去咗遊戲室玩，燒腩仔呢兩日亦咁啱試食咗全蛋，艾菲都擔心佢係食物敏感），醫生話燒腩仔咳咗成個星期，都有可能係過瀘性病毒引起都未定，所以都係叫我哋返去食藥睇吓情況會唔會有好轉就算﹗

找完數拎埋藥我哋就即刻返屋企，全個過程只係用咗一個鐘左右，燒腩仔係車到已經瞓到成隻豬咁，返到屋企我哋都無嘈醒佢食藥，第二朝先同佢食第一次藥，好彩燒腩仔完全唔抗拒飲藥水（呢個傻瓜仲要飲完係到嘈嫌唔夠喉添﹗），食完藥之後D紅點即刻淺色咗，食完兩日藥已經全部退晒（雖然無乜事，不過做媽媽嘅始終覺得肉赤，所以見佢好返真係安樂晒），至於D咳同痰都明顯少咗好多，到今日已經完全好返添啦﹗