DIY扣鈕練習教材

好耐都無DIY教材/玩具畀燒腩仔玩，因為佢已經返緊學，好多大小肌肉嘅訓練都可以喺學校做到，艾菲都懶得再花心思整，不過最近留意到佢著衫扣鈕時仲係姐手姐腳要人幫先得，明顯係平時練習不足所至，為咗唔想佢遲吓返K1著唔到校服（宜家N班間學校只著運動衫就咁過頭笠就得，但K1間學校就要著裇衫扣一排鈕），睇來都係時候同佢練多D。



呢個扣鈕練習嘅教材，係之前上網時無意中睇到人哋教嘅，材料只需一粒鈕，一條布條/鞋帶同一塊不織布，咁啱之前燒腩仔兩歲生日整生日badge時有不織布用剩，仲要有兩隻色添，可以慳返唔使買，至於鈕呢都係求其喺屋企堆後備鈕到揀一粒中size就OK（如果畀細D或者初學扣鈕嘅小朋友玩，可能就要揀粒大D嘅鈕），所以今次嘅製作成本係$0。



成個製作都好簡單，首先喺布條/鞋帶嘅一邊釘粒鈕落去，另一邊就打個大少少嘅結，然後剪幾塊細嘅不織布出來，再喺布中間用鉸剪開一個啱啱可以畀粒鈕穿過嘅窿就OK，D布咩形狀其實都好隨意，不過艾菲今次想懶靚咁整花形，就要拎個花形曲奇餅模出來度位再剪，相對花多少少時間去整，但都只係用咗半個鐘左右嘅時間就大功告成。

黑雨停課點算好？

 

連續兩個星期嘅weekend都係天雨中渡過，對大人同小朋友來講實在係一件好不爽嘅事，好不容易先等到佛誕節當日有大半日嘅晴天，雖然又熱又焗但我哋都爭取時間帶燒腩仔去公園放吓電，果然即晚已經再落大雨，仲要一覺瞓醒忽然由黃雨變紅雨再變黑雨。

燒腩仔返學以來第一次黑雨，身為家長當然最關心學校有無停課啦，果然黑雨後唔使幾分鐘已經睇即時新聞見到教育局宣布下午校停課，以前做學生時一聽到停課會勁開心，但宜家做咗FTM好自然就會有少少失望，因為停課即代表一日入面唯一三個鐘嘅抖氣時間都無埋，不過最爆趣都係燒腩仔，一聽到無得返學即呱呱嘈，要解釋一輪話佢知其他同學仔都一齊無得返學，先肯安心留喺屋企跟住艾菲，仔...如果你讀到小學中學都仲係咁鐘意返學，媽媽就真係安樂晒啦﹗



停課無得返學，留喺屋企又無咩好做，見下午已經停雨，加上燒腩仔今日都幾乖，就決定等佢瞓醒晏覺，兩母子落樓下平台拍拖踩單車，呢D活動對於讀下午班嘅燒腩仔來講真係好難得，平日朝早艾菲都忙住做家務同準備早餐午餐畀佢，完全無時間同佢落樓下玩，到放學又已經無電要盡快返屋企瞓晏覺，等到佢瞓醒都已經天黑夠鐘食晚飯，所以艾菲真係好希望來緊K1轉返讀上午班，可以爭取到多D時間帶佢四圍玩啦﹗

慢慢戒又得，立即戒亦得，得咗﹗

拖咗兩個幾月，終於得閒寫呢篇戒片血淚史，而喺呢兩個幾月入面，燒腩仔亦已經由起初只係屋企唔著片，到返學唔著片，到之後出個半鐘街唔著片，進展到最近出全日街同瞓晏覺都唔使著片，可以正式宣布戒日片全面成功啦﹗﹗﹗

喺燒腩仔婆婆嘅督促下，燒腩仔嘅potty training喺佢半歲左右已經展開，日日定時定候同佢坐落potty到試poo，起初當然係完全唔成功啦，十次有十次燒腩仔都只係坐喺到玩，甚至想走佬唔理艾菲，但久而久之又居然有成果喎，到佢15個月大已經開始有意識同我哋講poo poo，跟手仲同佢轉埋坐大人廁所，話都無咁快已經習慣喺大人廁所到poo poo，等艾菲唔使再日日同佢掉屎片咁慘。

至於wee就相對無咁容易，由燒腩仔18個月大喺大人廁所poo poo越來越穩定，艾菲就買咗張有兩級嘅凳仔返來，開始教佢企上去對住大人廁所wee，米高放工返來wee又會叫佢帶埋燒腩仔入去睇，之後見天氣熱就索性一得閒就除佢片，等佢感受吓賴濕嘅感覺，不過佢無論賴咗幾多次，艾菲同佢解釋咗幾多次都好，始終就係唔肯同我哋講，亦唔肯再企上凳仔試wee，艾菲唯有棄械投降。

直至21個月大，見佢嫌條片焗到pat pat痕，又開始講到自己wee緊，就諗住同佢再試一次啦，呢次佢都好合作肯企肯試，但就一直wee唔到出來，甚至因為wee唔出而發忟唔肯走，艾菲怕佢壓力大都唔敢再同佢試，佢開學前仲專登同學校老師講定佢對wee wee有D抗拒，希望佢哋唔好逼佢怕有反效果，點知到佢正式返學時，老師話只係叫佢好似其他同學咁企多一陣，佢自自然然就wee到出來，仔原來真係要畀人教㗎﹗

母親節出走之旅 Day 2

第二朝一起身，燒腩仔牙都唔刷廁所都唔去，第一時間就走去窗邊，以為佢睇風景咁識貨，原來係睇樓下個彈床有無開，可惜個彈床呢朝已經無再開出來（星期日先開？），所以佢無緣玩啦。



我哋換好晒衫準備出去附近cafe食早餐，點知呢個小朋友又扭扭擰擰咁唔多合作，唯有出動之前一晚喺惠康靜雞雞買嘅麵包超人手提電話，的的色色有聲又有公仔，仲潮過艾菲部iphone㗎﹗kakaka...



食飽見天氣唔太差，就喺酒店附近散吓步hea吓，可惜見唔到馬車嘅蹤影，但呢座傳說中嘅靚靚教堂好容易就搵到。

母親節出走之旅 Day 1

第三年以媽媽身份過母親節，今年終於都收到燒腩仔送嘅花做禮物，但實情當然係學校老師幫手做，燒腩仔送咗畀艾菲唔夠五分鐘就搶返話係佢嘅，切蛋糕時都有同艾菲講「母親節快樂」㗎，不過講多兩講好快已經變咗做「無快樂節快樂」，well...明顯就係未明母親節係乜東東啦，不過知唔知都唔緊要，只要你健健康康激少D艾菲就夠㗎啦﹗

燒腩仔未識同艾菲慶祝，唯有由米高代勞，喺艾菲怨咗佢兩年之後，今年出奇地有返D誠意，一早就book咗愉景灣酒店，一家人去玩返晚叉吓電，仲要事前神神秘秘咁，唔係艾菲有嘢做差D撞時間佢都唔出聲，雖然明知佢呢個安排，主要係想彌補我哋之前話今年唔去旅行嘅決定（不過我哋最終下個月又飛喎，呵呵呵...），但艾菲都好滿意好開心。



母親節當日瞓到十點就畀燒腩仔叫醒（特別鳴謝米高幫手同燒腩仔起身食早餐，艾菲已經比平日瞓多一個鐘），諗住拿拿聲同佢做埋功課即出發，早D到早D開始玩嘛，點知呢個燒腩仔又發作搞事，明明半個鐘內做得完嘅功課，居然花咗足足兩個鐘，激到艾菲同米高都嘔到一地血先完成到，結果艾菲帶住怒氣出門，呢個賴皮燒腩仔居然仲可以當無事發生，坐車去到欣澳都仲未肯同艾菲道歉，終於臨上酒店shuttle先捨得講對唔住，氹返艾菲開心。

逼爆＠迪士尼

母親節個weekend係銀卡特選周末，本來都唔諗住入去同人逼，但之前收到Disney個會員六折優惠message，艾菲又的確有D嘢想買唔想錯過難得嘅減價，度來度去就只係得呢個星期六有大半日嘅時間得閒，唯有當係奬勵咁帶燒腩仔入去走轉啦，點知為咗去Disney乖咗成星期嘅佢，呢朝起身時居然又病發，拉鋸咗一輪先拉到佢落床，其實都有D嬲想取消㗎啦，但為咗個會員六折優惠，艾菲結果好唔爭氣地決定如期出發。



既然出得門口就當然要開開心心咁玩啦，不過燒腩仔呢日嘅心情始終麻麻，全日最開心一刻就係邊排隊玩佢至愛嘅揸車邊食三文治嘅時候，好彩中午時份都未算多人，用咗45分鐘就玩完出來，艾菲仲被欽點陪佢揸車添。



出到來諗住又去玩巴斯光年坐吓歎吓冷氣，點知維修中無得玩，唯有入shop玩吓死光槍，起初都玩得好開心㗎，但唔知做咩行吓行吓又病發（無記錯應該係因為我哋唔畀佢掂D玻璃杯啦），終於要拉佢埋一邊講吓道理先掂。

31個月

遲咗成個星期有多，媽媽終於得閒安排我出場見吓大家啦﹗我呢個造型得唔得呀？你哋見到我有幾多隻眼呀？kakaka...



呢個月嘅食量終於回復正常，雖然食得無之前咁積極，都可以喺半個鐘左右完成，如果有蛋或者有汁撈飯的話我可以狂食唔停，喺零食嘅限制上媽媽都放寬咗好多，今個月最開心係終於有得食魚肉腸，火腿同叉燒，之前媽媽成日話要大個仔先可以食㗎，我宜家食完真係覺得自己大個仔咗呀﹗嘻...（艾菲：佢第一次食魚肉腸時真係好開心咁同艾菲講「媽媽，我可以食腸啦﹗」）



瞓覺都係一時時乖，夜晚十點幾入房，通常會搞到十一點先瞓到，但明顯少咗半夜喊醒，一覺可以瞓到第二朝十點，而媽媽終於發現陪瞓服務係唔停得，否則我可以喺床到碌成個鐘都唔願瞓，不過有時我唔乖激嬲佢，佢就會罰我換爸爸入來陪瞓（嗚...我要媽媽呀﹗），照舊放學返屋企會瞓一個鐘晏覺，但次次夠鐘都唔肯起身，要同爸爸媽媽激戰一輪先出到房。

爆趣花童＠表姨大婚

之前一篇提過，上星期日係燒腩仔表姨大婚之日，由於燒腩仔姨婆想當年係個在職媽媽，所以表姨由初生BB開始就交咗畀燒腩仔婆婆湊，一直同艾菲一家同住到小學畢業，佢同我哋一家嘅感情一直都相當好，艾菲亦早已當咗佢係自己個妹咁看待，所以呢D咁重要嘅日子，艾菲梗係要一家大細去撐場啦﹗



我哋一家三口朝早準時九點就到達姨婆屋企，好彩姨婆都早有準備，知道燒腩仔鐘意車，一早就買定兩架Q版九巴畀燒腩仔，佢幾乎全日都拎住兩架巴士未放過手咁滯，而燒腩仔身上著緊呢套衫，都係姨婆sponsor嘅，著起之後真係好sharp醒呀，同表妹Belle企埋一齊，勁cute囉﹗



等咗差唔多一個鐘左右，新郎哥終於出現，但個攝影師哥哥好似唔係好想其他親友參與其中咁，不停叫我哋企埋一邊，唔好阻住姊妹們玩新郎喎，well...我都係第一次見到攝影師會叫親友行開，仲要全程擋喺我哋前面唔想畀我哋睇咁，更加係唔會舉機snap shot吓親友們嘅反應啦，實在係奇怪奇怪，不過好彩燒腩仔無被影響，自得其樂咁撩完表妹Belle玩，就去搞表妹浵個零食盒，都懶理其他人咩事大吵大鬧啦。

表妹生日buffet@HK Disneyland Hotel

最近畀燒腩仔D情緒搞到頭都大晒，再加上呢兩星期艾菲私務煩忙，搞到都無精神寫blog，本來今日應該寫燒腩仔嘅31個月成長紀錄，不過想回顧返前一個星期日嘅燒腩仔表妹生日buffet先，因為再拖落去就多數會拖到無咗影...

上星期日係燒腩仔表妹正日生日，不過呢日係燒腩仔表姨結婚嘅大好日子，所以燒腩仔姨媽就決定提早一星期慶祝，而慶祝地點就係香港迪士尼酒店翠樂庭，約埋燒腩仔姨婆一家齊齊食tea buffet切蛋糕，可惜呢日米高要返工，只係得艾菲一個帶燒腩仔出席。

呢日米高幫艾菲叫燒腩仔起身（艾菲叫就喪扭，米高叫就唔扭喎﹗），艾菲仲可以好順利咁同佢做埋功課先出發，一心諗住早D去酒店幫燒腩仔同燒腩仔表妹影多D靚相，點知星期日坐巴士去迪士尼嘅時間原來比平日耐，結果我哋用咗個半鐘先入到迪士尼酒店，仲撞到早來嘅燒腩仔姨婆同燒腩仔公公婆婆，結果啦...喺一眾長輩嘅騷擾下，靚相實在唔多影到。 >.<



一直諗住同兩個小朋友影大草地靚相，仲專登帶埋野餐墊去，不過大草地原來喺另一間酒店，諗住迷宮都照殺啦，但呢個燒腩仔居然話唔玩，點都唔肯行入去﹗明明上次去濕地公園時行迷宮行得好開心㗎喎﹗最後要姨丈公同佢騎膊馬咁先勉強行到一個圈﹗