同好朋友一齊睇藍精靈

早喺上次去睇《美女與野獸》時，艾菲就同燒腩仔約好咗復活節假去睇《藍精靈迷失的村莊》，咁啱放假前佢好朋友媽咪問起有無興趣一齊睇戲，我哋就約埋喺屋企樓下戲院睇，順便放米高半日假抖一抖（今次真係玩足咁多日佢都無乜得抖，反而艾菲就可以日日瞓多一個鐘），陪BB豆豬喺屋企瞓晏覺。

約好咗朋友仔早少少喺戲院等，兩個好朋友一見面即你追我逐，想叫佢哋企定一陣影返張相都難，而最搞笑係居然喺到撞到佢哋上年嘅同班同學睇同一套戲，朋友仔亦另外撞到兩個自己嘅朋友仔，所以艾菲成日話呢...屋企樓下戲院真係好旺場，周不時都喺樓下商場撞到朋友同學仔甚至老師。

好不容易先終於等到夠鐘入場，然後未開場只係播trailer，兩個小朋友已經無厘頭咁笑到咔咔聲，到開場之後就更加笑得大聲， 好彩呢場幾乎全場小朋友嘈都唔怕咋，至於我哋兩個媽咪就喺側邊滴晒汗完全唔知佢哋笑咩，兼不停食零食食到勁飽囉（好朋友媽咪驚佢哋坐到悶所以帶咗大量零食入場，結果佢哋唔係好食我哋大人要幫手清咗去）﹗

放電＠鯉魚門

來到第三日復活節假期，天氣依然晴朗，唔想浪費當然又要出去玩吓，早一晚同米高傾去邊時，佢有話過不如再行飛鵝山，但懶根上身嘅艾菲實在唔多願郁，於是我哋決定去鯉魚門hea吓就算。



來鯉魚門必到playroom放電，一入場即趁無人就放BB豆豬落去船仔到影相。



唔使一分鐘，燒腩仔都爬埋入來，兩兄妹拍拖撐船仔。

野餐＠啟德跑道公園

一連幾日嘅復活節假期，難得米高唔使返工可以放足四日，點都要安排D家庭活動出去玩，第一日天文台預告天氣差所以瑣定咗呢日同BB豆豬玩cake smash，到第二朝太陽伯伯終於捨得出來，即執齊細軟出發去野餐，今次揀咗啟德跑道公園呢邊，我哋雖然十一點幾先到，但大草地都未算好多人，感覺無佐敦谷咁逼，而且呢日有太陽又有涼風，好舒服呀﹗



上次去佐敦谷唔記得帶帳蓬，今次終於記得拎，可以遮太陽又感覺有返D私隱，絕對係野餐必備好物，眼見隔離D人有凳有枱裝備更齊全，不過呢D嘢無私家車的話真係拎唔掂，所以艾菲都係羨慕吓就算。



我哋未set好嘢，燒腩仔已經急不及待要出去玩，但大頭蝦嘅艾菲今次又唔記得拎個波出來，只係帶得呢把泡泡劍，好彩把劍都好襟玩無被投訴。

玩具展＠歷史博物館

終於有時間清復活節假D blog啦，燒腩仔學校唔係好多假，但復活節都一連放咗六日，第一日唔係紅假期，梗係爭取機會帶佢去D紅假時一定逼爆嘅地方，艾菲即時諗到去玩具展，不過得艾菲一個帶燒腩仔同BB豆豬兩個去，顧得個細扭眼瞓又顧唔掂個大搞搞震，諗來諗去決定搵外援，花咗不知幾多口水，先請得郁燒腩仔公公婆婆幫拖，帶埋表妹浵出來一齊玩，有伴點都好過一個人玩嘅﹗



熟燒腩仔嘅人都知佢係一個唔可以玩驚喜嘅人，到宜家四歳半去邊做咩見咩人，艾菲都一定要事前brief定佢，否則佢D反應實會令你有驚無喜，不過艾菲今次就想試吓佢底線，早一晚同佢講第二朝去玩，只話有三個神秘嘉賓一齊，去邊做咩唔講佢知住，結果佢滿心歡喜咁問咗艾菲成朝去邊有咩人一齊，到去到酒樓見到公公婆婆同表妹都係呆咗唔識反應，明明好開心但把口就講住唔開心唔鐘意。



warm up一輪等佢情緒回復返正常，我哋飲完茶就出發去玩啦﹗雖則話今日唔係紅假期，但來睇玩具展嘅人都好多（始終係學校假期），買飛條人龍打晒蛇餅，好彩場外有白兵同Thomas可以影吓相消磨吓時間，又好彩艾菲今次有搵外援幫手，公公負責排隊買飛，艾菲就同婆婆帶住三個細去影相，分工合作慳返D時間又唔使三個細等到唔耐煩。

BB豆豬一歲Mini生日會

清復活節假嘅blog前又來篇打尖文，講埋BB豆豬一歲mini生日會先，作為一個公平的媽，哥哥年年有mini生日會開，妹妹生日又點可以無呢，咁啱佢同表姐嘅生日只差兩日，夾埋一齊搞就最慳水慳力啦，不過所謂慳水慳力都不過係慳咗訂蛋糕呢part，其餘布置同準備食物之類，主力依然係由艾菲負責。



例牌為咗布置同準備食物，我哋一家四口一早就返咗公公婆婆屋企，而為咗隆重其事，艾菲特別準備咗條紗裙畀妹妹著住出門口，又其實呢條不過係淘返來嘅後備裙，艾菲原先諗住條tutu裙萬一整唔成，又或者玩完cake smash有咩意外著唔返就著佢，點知條tutu裙玩完cake smash洗完之後仲keep到喎，咁當然要喺生日會到畀BB豆豬著多次，所以呢條靚靚紗裙就只可以喺出門口同返屋企來回時著。



至於另一主角表姐仔，都因為姨媽姨丈呢朝仲要返工，一早就來咗公公婆婆屋企，而正直trouble 2同terrible 3中間嘅表姐仔，就因為著咩衫開party嘅問題同姨媽堅持咗好耐，姨媽想佢迎合黃色嘅主題著返黃色裙，但公主迷嘅表姐仔就堅持著Elsa裙，於是艾菲就叫佢兩條裙都拎晒來，喺生日會開始前叫佢著Elsa裙畀艾菲同佢影吓沙龍當著咗，到正式時換返靚靚黃色裙就無問題啦，kakaka...

cake smash

經過一輪warm up後，主角蛋糕正式出場﹗ 記得燒腩仔當年cake smash個蛋糕係艾菲親手整，但今次米高就堅決叫艾菲出街買，怕艾菲唔夠時間整唔切整唔靚浪費一番心機，於是艾菲就訂咗美心個天使蛋糕，貪佢多cream又無其他裝飾花巧野，真係畀BB豆豬食咗落肚都唔怕。



BB豆豬一埋位，E...E...E...

cake smash前傳

反正講開BB豆豬一歲生日，不如順手講埋佢個cake smash先，話說哥哥當年搞咗個山寨版cake smash，公平起見艾菲都一早決定幫妹妹搞返個，咁有過上次嘅經驗，大概都知點玩法，亦有充足嘅時間做準備，於是明明忙到氣都唔得閒抖嘅艾菲，又pat pat痕走去玩DIY...



原先艾菲一直打算買條紗裙仔畀BB豆豬著來玩就算，點知某晚瞓唔著睇pinterest，居然畀艾菲見到有外國媽媽自己DIY tutu裙畀個女，即時睇埋教學發現一D都唔難，瑣定生日會嘅theme colour後就上淘寶買料返來整，只係用咗一集煲劇時間就搞掂啦...啦...啦...（完全唔明點解會有人開班教整，仲要收成六百幾蚊一條食水咁深囉...>.<）



跟手要整嘅就係生日帽，為咗襯返黃色嘅主題，艾菲就喺淘寶淘咗頂金色生日帽仔返來，但係佢個帽頂係粒黃色毛毛波，仲有D金絲喺到，感覺好似好格格不入咁，反正整完tutu裙仲有紗剩，就自己整咗個波仔貼上去，本來想幫頂帽圍埋邊㗎，但畀BB豆豬試裙時發現佢唔太like網紗嘅質感，為免佢唔肯帶頂帽艾菲就唔搞咁多嘢啦﹗

一歲啦﹗

果然媽媽真係拖到我一歲生日都過埋，仲未開始寫復活節假D blog，咁我唯有又打尖出來同大家宣布我一歲大啦﹗雖然我唔係好知發生乜事咁就過咗個生日，不過媽媽都好公平地同我玩咗cake smash，開咗mini生日會，正日就一家四口喺屋企食生日蛋糕慶祝，由哥哥負責唱生日歌，代吹蠟燭同切蛋糕，生日第二日仲安排咗個兩日一夜嘅澳門trip畀我呢﹗（艾菲：之所以咁忙一直無時間出blog啦...）



入返正題講返成長進度先，當然係由我嘅強項食開始講起， 呢個月我畀爸爸媽媽起咗個花名叫做小吃貨，皆因我拍得住當年嘅為食哥哥有凸，已經加到一日六餐三奶三固，早午晚三餐奶埋身食，午餐晚餐食成碗幾爛飯，中間再加多個下午茶食吓水果餅乾之類，不過食完後仲可以無限量添食，同爸爸媽媽出街食飯我係可以食足三個鐘，無停過口咁由頭帶到落尾，甚至畀遲一陣我都會嘈到拆天咁搶嘢食﹗

呢個月只係試咗全蛋同橙呢兩樣新食物，媽媽見我咁為食又已經出咗四隻牙仔，就決定畀枝匙羹我學筆嘢食，暫時未係好掌握到點筆，但當媽媽筆好D食物喺匙到，我再自己放入口食嘅命中率就高達九成，而D食物都無再攪到好碎，間中會畀原條粟米，切片水果我自己拎住食，而由於我食極都唔係幾重，堅持自己生長線無上調空間，所以媽媽都開始放寬會畀少少街外食物我試（艾菲：其實都只係馬拉糕，蛋糕，麵包之類），佢話食得幾多就盡食幾多，想話谷肥我喎...

假日行山團~大浪灣>小西灣

難得偷到時間又清吓blog先，清明節當日米高有假放兼唔使拜山，為咗抓緊春天嘅尾巴我哋又出動去行山，今次由大浪灣行去小西灣，不過天氣好加清明節個個去拜山嘅關係，我哋喺筲箕灣排咗超耐隊先上到巴士去石澳，再由石澳慢慢行入大浪灣，到起點時已經係正午一點幾（但我哋明明一早起身出發...）。



一場來到大浪灣，起行前米高話帶燒腩仔去睇吓海邊個石刻，真係唔講都唔知香港原來有呢D古時石刻，不過以燒腩仔嘅年紀，解釋完佢知轉頭應該都唔記得咩來。