周日行山團~馬安山郊野公園>昂平>西貢

今年嘅冬天好似無乜點凍過就到尾聲，啱啱個星期六仲要熱到出晒汗，有見及此米高就叫我哋要抓緊冬天嘅尾巴，趁天氣仲未係好熱時行多次山，所以我哋星期日就帶齊芭蕉扇同冰水出發，點知出門口時太陽伯伯玩失蹤，睇天文台報氣溫只得十六度，唔...咁就著多件風褸上身啦﹗



今次目的地係昂平草原嘅西貢靚view，多數人都係由恆安邨出發，行上馬鞍山郊野公園再上草原，不過艾菲出發前一晚睇過資料，有人話單係恆安邨行上馬鞍山郊野公園一段已經要一個鐘，再加上沿路其實無咩嘢睇，考慮到我哋又大又細腳程比較慢，為免上山前消耗過多體力，我哋就決定喺富安花園坐的士直上馬鞍山邨，見到呢個路牌跟住指示行就係啦﹗



由馬鞍山郊野公園行上昂平草原嘅一段路唔太難行，無咩景睇但勁有走入森林嘅feel影相都幾靚，初段係可以行車嘅大斜路，慢慢就變成石級路，又可能D石又大又細好得意，燒腩仔行得好起勁。

情人節特餐

除咗拍拖第一年之外，艾菲同米高都應該無認真慶祝過情人節，皆因我哋都係比較現實同理智嘅人來，明知情人節食個飯同買紮花都特別貴，我哋寧願將D錢留返來做更有意義嘅嘢，咁多年來唔係打邊爐就係自己喺屋企煎塊扒，簡簡單單過一日就算。

今年情人節係平日，米高都有話陪艾菲去食至愛吉野家邊爐，但諗起食完會夜返屋企，免得燒腩仔放學太攰搞搞震掃興， 艾菲覺得自己煮會穩陣D，仲一早買晒料諗好頭盤到甜品嘅menu，實行來個hea版情人節特餐。


 
所謂hea版就係用現成嘢，頭盤先來個蟹糕法包，開罐罐頭切開條法包就係啦，見得人之餘仲勁好味﹗


 
緊接出場有罐頭蘑菇忌廉湯，個湯有諗過自己煲㗎，不過米高唔太鐘意飲南瓜湯雜菜湯，所以投其所好開罐頭啦﹗

周日行山團~飛鵝山

經過一個農曆新年嘅飲飲食食，艾菲明顯feel到自己嘅體重有所增長，為免情況惡化落去除咗忍口之外就係做運動，本身年初六朝早已經想上飛鵝山行個大運，結果因唔知醒同太大霧而無去到，然後事隔三日來到最後一日新年假，食飽午餐都仲未諗到去邊，於是米高又提議上山去，本身艾菲有D猶豫唔願郁，但聽到佢話呢個鐘數上去可以睇日落，即時心動執嘢出發﹗



兩點決定出發，搞到三點先出到門口，最快嘅方法當然係坐的士，直接去到飛鵝山道雙程路嘅盡頭起步。



我哋沿車路一直行上山，條路一D都唔難行，重點係一級樓梯都無，不過星期日就比較多車上山，安全計我哋要拖實燒腩仔行，同埋有車過時要企埋一邊停低一陣。

表情王＠西九龍海濱公園

一連幾日嘅拜年拜年同拜年，對小朋友來講其實都幾悶，所以完成頭幾日嘅拜年活動後，我哋都開始plan吓去玩畀小朋友放電，可惜天公不造美，初一開始落雨到初四，連去樓下公園sir吓滑梯都唔得，好彩米高初五初六放多兩日假，雖然天陰陰但總算無雨，所以食飽lunch執齊嘢就出發啦﹗



初五帶咗燒腩仔去同同學仔玩，來到初六就留返畀我哋一家四口family day，呢晚約咗屋企人喺旺角食飯，所以諗住近近地帶佢哋去西九龍海濱公園玩，點知都不過係兩年無去，惜日我哋影結婚相同拍拖睇日落嘅地方，已經變咗做地盤，雖然早知會有呢一日，但心底裡依然覺得好可惜。



縮晒水嘅海濱公園，變到成個單車公園咁，燒腩仔一去到就指住D單車話要踩，不過此行逗留時間唔長，我哋無打算租車畀佢踩，然後行吓行吓見到幾張呢D可移動嘅綠色凳，一張張放喺草地嘅不同角落，哈哈...啱晒唔多鐘意掂草嘅燒腩仔。

收納用品＠淘寶

作為一個無工人姐姐無長老幫手嘅FTM，艾菲每日除咗照顧兩個小朋友嘅日常，亦需要兼顧一家人嘅飲食同一屋家務，但自從BB豆豬出世之後，喺家務方面艾菲真係有心無力，只能夠做到最基本嘅清潔，好多嘢都要放手交畀米高去做，成日同自己講隻眼開隻眼閉唔好要求咁高，不過忍咗咁多個月，眼見間屋越來越亂，都係忍唔住喺上年年底出手淘咗D收納用品返來，決心要喺農曆新年前執返靚間屋見人。



間屋嘅其中一個混亂重災區係platmat個位， 隨住BB豆豬越來越大個，佢嘅玩具亦開始越來越多，為咗方便佢玩又唔可以將D玩具放入箱，結果就放到一地都係，把心一橫用27蚊人仔淘咗個摺得埋有手挽嘅籃返來放佢D玩具，方便拎又方便收返好佢哋，至少哥哥有需要用多D空間時可以成籃拎走，唔使再逐件執走咁麻煩。



除咗BB豆豬D玩具之外，另一樣令艾菲苦惱咗好耐嘅嘢就係燒腩仔D圖書，為咗培養燒腩仔睇書嘅興趣，艾菲嘗試將D書放喺當眼處，等佢得閒無嘢做時拎來睇吓，但屋企D大型玩具越來越多，D書整吓整吓就放晒喺地下，難整理之餘又搞到佢哋少咗空間玩，艾菲一度想買個兒童展示書架放屋企，不過鍋居地方有限放唔落，終於畀艾菲發現呢款圖書掛袋，65蚊人仔即訂即造，size fit晒個圍欄，慳位得來都放到好多書㗎﹗

一年一度＠青衣公園

一年一度嘅紅葉之約又到啦，由於今年農曆新年比較早，米高二月打後D weekend又比較忙，計來計去都係決定喺新年前嘅星期日來咗先，免得之後無時間再來會後悔。



一如所料，我哋又係早咗來，D葉連黃都唔係好黃，又何來紅葉呢，不過我哋都係志在舊地重遊影張相留念，有無紅葉都係咁開心嘅。

九個月

話都無咁快又過咗一個月，雖然媽媽仲有新年前後嘅blog未出，但都決定畀我出場先，而為咗慶祝自己九個月大，我走去學人做業主，漏夜起咗層樓喺額頭到（做空中飛人由大人床跌落BB床），不過媽媽見到就勁肉赤，猛問爸爸點解會出事（艾菲：都不過沖個涼行開一陣就出事），又問係唔係男人睇B都係咁（艾菲：想當年燒腩仔唯一一次喺大人床跌落地都係公公湊時無睇實）。



唔...都係入返正題先，我宜家每日食兩餐固體，隨住我嘅感冒鼻水鼻塞慢慢消失，我嘅胃口都有所好轉， 每餐半個鐘之內一定食完一大碗粥，呢個月試咗嘅新食物有西蘭花，合掌瓜，茄子，紅腰豆，牛肉，藍莓，火龍果同堤子，媽媽見我食得唔差都開始畀多D finger food我，喺大人食飯時自己拎來食，間中又會畀BB米餅同星星餅我做零食，但我就仲未好識控制D手指仔，D星星餅跌落地多過塞到入口。

雞年大吉

新年快樂﹗

我燒腩仔同妹妹BB豆豬喺到祝大家雞年龍馬精神﹗身體健康﹗心想事成﹗笑口常開﹗財源廣進﹗五福臨門﹗

今年終於多咗個伴陪我影呢張賀年相，媽媽本來想set好地氈喺地下影，但又怕妹妹手多多整爛D花，所以都係喺返飯枱影，唔...我今次都算好合作㗎啦，有望鏡頭有笑，媽媽影咗十張左右就影到一張我哋兩個都笑又無out focus嘅。

話咁快就來到年初十，D拜年活動都完晒，媽媽讚我今年大個仔咗進步咗好多，只要佢出發前同我講定去邊見邊個做D咩，我去到人哋屋企就唔會話要warm up唔叫人，仲會幫爸爸媽媽送禮物畀長輩，佢哋畀返利是我都識雙手接同講返D恭賀說話，亦無再失手喺個全盒到（艾菲：梗係啦，畀佢放題喎，仲點會失禮），只係D表哥表姐個個都一人拎住一部電話打機，搞到無人同我玩有D悶咁囉。

而我亦想喺到祝媽媽身體健康﹗少D病痛多D陪我同妹妹玩﹗爸爸就步步高陞﹗畀心機搵錢養我同妹妹同媽媽﹗妹妹就快高長大﹗媽媽話佢最緊要係瞓返好D喎﹗自己呢就聰明伶俐學業進步同食多D零食啦﹗恭喜恭喜﹗