團購Sens Studio家庭相

BB豆豬出世前，艾菲已經同米高講明十月左右要去影一次家庭相，皆因作為屋企攝影師嘅艾菲，深明要影張有自己份入鏡，又或滿意嘅一家四口相何其難嘅道理，所以有D錢唔可以慳，而且燒腩仔就來四歲，可以順便當做慶祝活動。

記得同學仔媽咪講過Sens Studio唔錯，於是一直留意住佢哋嘅團購（都出得幾密，幾乎每個月有一次），然後八月終於入手join咗，然後同米高夾極九月尾十月頭嘅時間佢都唔OK，然後艾菲決定投降改喺八月中影，然後輯相就由原先燒腩仔四歲生日相變成BB豆豬100日大相（唔...其實都不過係個影相嘅藉口來姐...）。



由於艾菲坐完月後就正式一湊二，基本上日忙夜忙無事忙咁，所以book咗邊日影之後就乜都無理，著咩帶咩道具去影基本上都係去到最後幾日先求其襯，唯獨係影相前一晚忽然心血來潮自製咗對母女頭飾去影，算係好有誠意準備㗎啦﹗

影相前幾日開始同燒腩仔講，順便灌輸佢一家四口嘅concept，重點係叫佢到時要聽哥哥姐姐話，一心以為打定底實無死，仲帶定一袋糖去以備不時之需，點知...佢唔知係唔係興奮得滯，去到studio即好似上咗身咁超級hyper，瘋狂地亂跑亂跳亂摸，攝影師姐姐同助手哥哥出盡法寶都搞佢唔掂，D四人合照全部都要等佢搞一輪先影到...

至於BB豆豬呢，艾菲專登喺出發前餵飽佢，照計應該都有個半鐘嘅電力，啱啱好夠用可以捱到尾，見佢初頭表現都OK㗎，識得合作望鏡頭（但唔笑），到後期唔知係唔係無耐性，開始扁咀兼爆喊，然後開始扭抱扭眼瞓，本來攝影師姐姐想襯佢瞓著咗影返D初生BB相，但佢一放低就爆喊，連畀佢咬住奶咀都唔OK...

燒腩仔放暑假之跟住媽媽學畫畫

艾菲同米高都係無咩藝術天份嘅人，而呢樣嘢亦好順利成章地遺傳咗畀燒腩仔，佢係睇得出嘅對畫畫零興趣，到宜家填色仲係無心機油到出晒界，但唔鐘意還唔鐘意，事實係佢來緊返學讀書係避無可避，所以艾菲趁住暑假有多D時間喺屋企，就用自己僅有嘅丁丁藝術氣質，點都同佢一齊練習吓。



我哋嘅第一份習作，就係之前大爺媽介紹，最簡單唔使點用腦諗嘅數字油畫，艾菲學大爺媽咁畫咗界之後就交畀燒腩仔上色，以為佢會搞得掂，點知...佢油到連長頸鹿個鼻窿都唔見埋...



由於燒腩仔實在無乜天份，再加上艾菲要同時兼顧BB豆豬，所以幅畫用咗兩日時間先完成到，大家睇到幅畫嘅右邊一撻撻白色未油好嗎？艾菲問咗燒腩仔幾次，佢都堅持自己已經完成，艾菲唯有無奈接受。

燒腩仔放暑假之跟住媽媽練小手肌

燒腩仔係年尾細B，加埋本身懶底經常動口不動手，所以小手肌發展一直都麻麻，簡單如開包動物餅食，佢都成日嗌住開唔到想我哋幫，不過來緊K2要開始寫字，既然呢個暑假日日喺屋企無嘢好做，一於安排D小任務畀佢鍛練吓小手肌，又等艾菲可以free到對手出來做吓家務，兼唔使擔心有人整醒BB豆豬搞亂檔。



第一個要佢做嘅任務就係學用鉸剪剪嘢，其實K1時學校已經有功課要佢哋剪D圖案出來完成，不過安全鉸剪（又係青衣間zakkaya買$12把）無咁利加紙質差嘅關係，十次有十一次佢都係剪到張紙梅晒剪唔開，之前試過拎D A4紙畫線畀佢剪，但感覺好浪費紙張唔環保，所以今次就搵咗堆唔要嘅傳單出來畀佢慢慢剪。



先剪最簡單嘅直線，再開始要佢剪格仔，由於傳單嘅紙質較為硬身，所以今次佢無再話剪唔到啦。

燒腩仔放暑假之跟住媽媽做學廚

上篇blog提過，燒腩仔嘅暑假好多時係跟住艾菲留喺屋企，除咗玩玩具同做暑期作業之外，艾菲總要畀D嘢佢做來消耗吓精力嘛，之前試過同佢包餃子整蛋糕，睇得出佢對整嘢食好有興趣，不過艾菲今時唔同往日，宜家連煮餐飯都要偷時間出來先煮到，仲邊有閒情整D大堆頭嘢，所以索性叫佢跟艾菲入廚房做學廚，畀D簡單濕星嘢佢幫吓手。



好似呢晚煮蕃茄蛋，艾菲就先叫燒腩仔幫手打蛋，入廚房睇完艾菲點樣煎D蛋皮，攤凍後再交返畀佢幫手將D蛋皮切成長方形，起初以為佢會切到求求其其，估唔到佢又切得幾似模似樣㗎喎，唔知係因為佢D小手肌進步咗，定因為把刀好用呢（把兒童刀係今年初路過青衣間zakkaya買，十二蚊把堅係切唔傷手但又切到蘿蔔呢類較硬嘅食物，讚﹗）？



切完D蛋皮就交返畀艾菲埋尾，不過燒腩仔嘅任務仲未完㗎，佢要喺開飯前幫手抹枱同放餐具，記得自己細個時燒腩仔婆婆都會要求我哋幫手開枱，但我哋三兄妹次次推得就推唔願做，難得燒腩仔勁enjoy呢個小任務，或者佢認為呢D就係大個仔嘅表現掛，哈哈...

燒腩仔放暑假之跟住媽媽去得邊？

九月都就來完啦，燒腩仔放暑假呢個topic仲未寫完，忙...艾菲堅係日日都好忙，但為免拖吓拖吓又無咗件事，都係快手寫埋佢先。



燒腩仔人生中第一個正式放嘅暑假（上年得兩日嘅唔算啦），遇著BB豆豬啱啱出世，艾菲真係同唔到佢去邊，好彩得妹豬媽提醒，早喺入院生妹妹前就睇定屋企附近社區中心嘅暑假活動，入定紙抽籤，再喺坐月期間吩咐米高幫手報名，基於米高唔贊成個仔咁細個就去學學術嘢咁㖖苦，所以只係報咗非洲鼓同體操兩樣，叫做畀佢去玩吓消磨吓時間，唔使日日坐喺屋企咁悶。

每次上堂，艾菲都會一湊二同佢去社區中心，放低佢然後就同BB豆豬喺中心到坐一陣等佢放學，又每次都要就妹妹嘅飲奶時間，其實都幾趕急一落堂要即返屋企，難得有次妹妹等佢等到瞓著，於是艾菲爭取時間，帶咗佢去試樓下新開嘅甜品鋪，實行兩母子來個偽拍拖sweet一陣咁多啦﹗

四個月

其實...我兩星期前已經足四個月㗎啦，不過因為去完健康院，發現我兩個月以來都無乜點重過，直情嚴重到跌出生長線要轉介兒科，媽媽唔開心咗足足一個星期，再日以繼夜夜以繼日咁餵我飲奶，搞到個人勁攰就遲咗畀我出場囉...



自從我兩個幾月開始肯埋身食奶，我半埋身半餵樽到三個月之後，媽媽就索性唔泵奶畀我全埋身（艾菲：泵足兩個幾月後真係會對個泵產生恐懼症>.<），只係佢要出街先泵定160-200ml畀我（視乎泵到幾多就畀幾多），起初都可以照舊每日食五餐夜晚一覺瞓天光，不過自從我足100日後就晚晚要食多餐，成日搞到凌晨兩點幾三點食埋宵夜先肯瞓（艾菲：唔夠飽嘅徵兆？）。

燒腩仔放暑假之文化博物館半天遊

米高嘅兩個星期大假轉眼來到尾聲，但個天依然日日落雨，所以去玩都要諗D室內活動，見咁啱有D嘢想去沙田做，八月時博物館又免費入場，於是帶燒腩仔去文化博物館玩咗半日。



我哋先上樓上參觀，老實講呢D展品對艾菲來講係零吸引（皆因艾菲已經來過N次），但米高就睇得津津有味咁，起初以為燒腩仔會無耐性搞搞震，點知有過上次同爺爺去茶具文物館嘅經驗後，佢竟然識得話畀艾菲聽要慢慢睇，咁米高都有嘗試介紹吓，又叫佢幫手睇吓D展品係咩年份，叫做畀D嘢佢做啦。

燒腩仔放暑假之TsumTsum體驗

無去迪士尼一排，燒腩仔對米奇嘅熱情依然，耐唔中會叫艾菲推BB車帶妹妹同佢去迪士尼（艾菲之前同佢解釋妹妹細所以暫時唔同佢去迪士尼住，佢就不停諗方法解決呢個問題），眼見八月初一連幾日落雨唔停，連樓下公園都去唔到，於是醒起不如帶佢去又一城睇Tsum Tsum，果然有人一去到即嘩嘩聲，發現D裝置識郁更加係唔肯走話要逐個等佢轉。



見呢個最靚嘅鐘樓無乜人排即埋去影，好開心後面位幫手揸機嘅姐姐好有心機，要知道小朋友宜家呢個年紀，要影一張正正常常嘅一家四口相實在得來不易呢﹗