東華慈善嘉年華

繼續紅假第二日，睇完《功夫熊貓》出來，見個天真係好到不得了，艾菲實在忍唔住要帶燒腩仔出去玩，諗來諗去忽然挑起條筋想帶佢去東華個嘉年華玩，呢D燒錢嘅活動向來唔係艾菲杯茶，但唔知點解硬係好想趁BB豆豬出世前爭取時間陪佢玩多D，等佢好好享受同爸爸媽媽獨處嘅時光，難得米高又唔反對，咁我哋就go go go啦﹗

我哋喺九龍灣出發，但去到德福個小巴站，眼見條人龍長到等十架車都唔知上唔上到，由於艾菲已經預告去到門口要再排一輪隊先入得場，米高就決定轉軚坐的士過去，好彩去到門口條人龍又唔算好長，而且職員見到艾菲大肚，帶咗我哋去排條特快隊，所以等咗大概十五分鐘已經入到場。



入到場，可能係人多有D嘈加上太陽曬，燒腩仔又開始有D扭擰，唔係叫住去洗手間，就係顧住食艾菲袋入面包餅，樣樣遊戲都好似唔多有興趣咁，直至見到有得揸電動車先叫做好少少，但排隊期間都係keep住唔多耐煩，認真有D掃慶。

功夫熊貓之未開場已喊驚

燒腩仔對上一次入戲院睇戲，已經係上年農曆新年嘅事，以為隔咗咁耐佢應該唔記得，點知佢新年前某一日經過樓下戲院，忽然同艾菲提起入過去睇叮噹，仲話想再入去睇多次添，艾菲心諗BB豆豬出世之後，確係無乜機會同佢入場睇戲，所以新年假時已經密謀同佢去睇，可惜最終因為太忙而無咗件事，咁今次復活節假佢放成十三日，無得唔兌現承諾啦﹗

一早同燒腩仔約好復活節假頭兩日（紅假前），我哋兩母子拍拖入場睇戲，當時只知有《功夫熊貓》呢套卡通片，見佢本身都鐘意熊貓，呢排又勁玩開心樂園餐送嘅《功夫熊貓》玩具，咁艾菲就揀咗呢套，燒腩仔仲醒到睇完poster知道套戲17號上畫，就日日提住17號去睇《功夫熊貓》（次次艾菲都要同佢解釋一輪，係放假先睇唔係17號就睇），搞到艾菲想縮沙走數都難。



米高喺假期前忽然通知個trip取消，四日紅假會留返喺香港，艾菲當然即刻邀請佢同我哋一齊睇啦，多個人幫手湊住燒腩仔嘛:p，於是同燒腩仔講遲多兩日等埋爸爸先睇，好彩佢OK仲話唔想自己一個坐要爸爸抱，即買兩張大人飛就可以一家三口入場，於是我哋喺紅假第二日，一覺瞓醒食完早餐就換衫落樓下戲院睇戲啦，而米高仲好好咁請佢食爆谷添，呢D嘢媽媽就唔會做啦，嘻...

同心同步同樂日＠沙田馬場

米高說好了嘅復活節trip，因為突發事臨時取消咗，咁四日復活節公眾假期總要搵D嘢畀燒腩仔玩，好彩最後關頭我哋又有得去馬會嘅同心同步同樂日，今年同上年嘅玩法有少少唔同，攤位遊戲唔再係免費任玩，不過每個人一入場就會收到$60遊戲卷（唔夠可以之後再買），同樂日指南，同埋一條頸繩來玩遊戲儲襟章。



早一晚同燒腩仔講定會去馬場玩，佢晨早未九點就自己彈起身話出發，以為佢今年大個仔應該會好興奮，點知...一入場見到face painting，golf putting，3D畫影相區，佢通通都話唔玩...

QE見醫生第一回（31W）

早在11W第一次去QE見姑娘時，就已經話好full要31W先有得見醫生（但艾菲當日眼見其他媽媽廿幾周已經有得見醫生啦喎...），本身9:45嘅booking，早一星期收到姑娘電話叫艾菲提早到9:00去登記，一心以為會好快走得，又以為醫生會同我哋講解開刀嘅嘢，所以難得米高話請半日假陪艾菲覆診艾菲都無say no。

未九點已經到，登記完先驗小便量血壓同磅重，搞掂就搵個位坐低慢慢等，起初見無乜人等仲覺得奇怪，無耐後忽然有班大肚婆同老公一齊衝入來，而診所都開始叫咪叫佢哋入房，艾菲先知前面仲有一班人早過自己，只係畀姑娘捉咗去聽講座消磨吓時間。

等咗陣之後，終於都有姑娘叫名叫艾菲同其他媽媽一齊入健康教育室，先填問卷講返對餵人奶嘅認識，跟住姑娘就開始講解BB喺媽媽肚入面嘅學習進度，鼓勵我哋多D同BB傾偈之類，講完就逐個叫名出去，派定張直接入院卡畀我哋旁身，再講返之前喺醫院做嘅test嘅結果，血報告，Oscar，同糖水測試艾菲都全pass，Good!

聽完報告可以出返去大堂坐，米高不停candy crush，艾菲就狂睇《醫護人生》 ，睇咗差唔多五集，由十點幾坐到差唔多十二點，終於有人叫艾菲名入房見醫生，一入去兩個姑娘就幫艾菲瞓上檢查張床到，然後醫生就隔住簾問咗D基本問題，例如到目前為止有無咩特別嘢，決定咗去邊到生未同幾時決定到，上胎點解開刀同手術過程順唔順利咁，問咗大概五分鐘先見佢施施然咁拎住個胎心機行過來，用對凍凍地嘅手摸吓艾菲個肚同聽心跳，只係講咗句頭仔向咗下size都OK就完...

之前一直以為醫生會講解吓開刀生嘅嘢，原來係艾菲自己諗多咗，最後艾菲都有主動問返如果揀喺QE生會開刀定順產，得到回覆係「你好堅持嘅話我哋都可以同你開刀」，會約38W做手術但無得自己揀日子，手術過程會係點傷口會點開更加係隻字不提，只係一再提醒手術室好full唔好約咗期臨時甩底，言下之意應該係「你去私家生吧啦」，哈哈...

安全計怕艾菲忽然有事要入QE生，醫生都叫艾菲填咗張授權書，畀佢哋向仁安醫院拎返艾菲生燒腩仔時嘅手術情況，而仁安醫院都真係好有交帶咁，過幾日後主動打返畀艾菲問清楚有無件咁嘅事，先fax D資料畀佢哋。

轉眼五年

無耐之前先寫完艾菲同米高嘅《相愛十年》，話咁快前一個星期六，就係我哋嘅結婚周年紀念日，真係一轉眼已經五年，今年最大嘅挑戰，應該係BB豆豬嘅來臨，作為一個無工人姐姐無長老幫手嘅FTM，一湊二肯定唔係一件易事，如果背後無個可靠嘅老公撐住，艾菲一定無信心自己做得到，希望未來一年我哋能夠多D恩愛少D鬥氣，一齊同心互撐打低屋企兩隻怪獸啦﹗



結婚周年遇著星期六，好處係米高唔使特登請假慶祝，唔好處係我哋變得更hea，竟然無安排任何慶祝活動﹗其實呢...艾菲之前都有諗過呢日帶燒腩仔去東華or AIA嘉年華玩㗎，但係呢日個天keep住落雨，艾菲又啱啱先病好，所以都唔敢搞咁多嘢，只係一早起身帶燒腩仔返學校上興趣班，再自己歎個早餐享受吓每個星期六先勞氣後自由嘅空氣，然後接完放學就返屋企等米高放工返來一家人齊齊午睡鬥頹廢。



雖然係頹到無任何慶祝活動，但大餐點都唔少得嘅，體諒到艾菲宜家食唔到刺生生蠔，米高都唔敢話食buffet來刺激艾菲，於是揀咗去食Outback，仲喺艾菲病到死吓死吓時不斷提住，鼓勵艾菲要快D好返一齊去食好嘢咁話，好彩艾菲都爭氣停藥後無再惡化返，而無咗兩星期嘅味覺都啱啱喺前一晚返返來﹗YEAH!

K1觀課日

家長日後兩星期，就係燒腩仔學校嘅觀課日，呢日艾菲啱啱完成晒成個抗生素嘅療程，總算病好咗五成，雖然天氣忽然轉凍，但帶住個暖杯keep住咳時有熱水飲，都叫做頂得住，只係個人仲有D攰同周身骨痛（特別條腰，可能前一晚瞓覺壓親）。

燒腩仔學校嘅觀課日分咗兩日，各有半班同學同家長參加，咁啱燒腩仔同妹豬被分開咗，所以艾菲無緣見妹豬媽一面，但妹豬媽早一日都有大約講過，睇完佢哋上堂會覺得好感動，所以艾菲一早同自己做定心理準備。

呢日無校車接送，所以艾菲要同燒腩仔一齊返學校，燒腩仔先入課室準備，艾菲就去禮堂聽校長介紹，聽返有咩要注意，最重要當然係叫我哋要投入，同埋唔好影相騷擾到學生，簡單講完就可以各自入去小朋友班房啦﹗

入到班房，小朋友們已經企晒起身歡迎我哋，燒腩仔見到艾菲無話好興奮，只係望吓望吓八八卦卦咁嘅樣，之後老師就叫大家一齊做體操，大部分小朋友都有跟住音樂做動作，除咗燒腩仔企咗喺到繼續發呆，每當佢望過來艾菲呢邊時，艾菲就即時擰開唔望佢專心望返老師，等佢知道要專心。

做完體操老師就叫大家小組坐聽故事，大家真係即刻推凳圍圈坐靚靚，初時燒腩仔都仲係繼續發呆，但老師講到一半左右，佢已經投入返識得舉手出去答問題，老師後來話想叫D未答過問題嘅小朋友出來，佢仲勁多事咁猛叫隔離位個同學仔出去添:P。

講完故事，老師就開始教大家一陣自選活動要做D咩，而喺呢個時候燒腩仔就開始坐唔定啦，pat pat完全唔喺張凳到，老師叫咗佢幾聲佢先坐返好少少，但無耐又再次起身擰轉望住我哋班家長喺到搞搞震，艾菲都無佢咁好氣>.<。

終於捱到自選活動嘅環節，呢一part係家長同小朋友一齊做勞作，起初燒腩仔都唔多理艾菲㗎，但佢見前面同學仔走埋來拖實媽媽，佢先無執輸咁來拖埋一份，同佢做完勞作同工作紙，吸好名印再交去適當位置後，佢話咁快就標咗入閣玩火車，艾菲就同其他媽媽吹吓水交流吓，然後忽然一秒唔使，三個喺閣入面玩緊火車嘅小朋友，一齊彈起身收晒D玩具再著鞋排隊，原來老師播咗歌示意夠鐘，但重點係D歌聲係超細聲㗎喎，事後同妹豬媽傾開都覺得老師呢個訓練好神奇，個個都好似上身咁即時收拾超合作﹗

K1家長日＠上學期

繼續day back返病咗期間嘅嘢，其實病咗咁耐艾菲有無認真抖過呢，諗返轉頭好似真係無乜，皆因平日無人幫手湊燒腩仔，艾菲只可以趁佢返咗學幾個鐘咩都唔理食藥即瞓，唔煮飯唔做家務唔陪佢做功課，捱到米高放工返來先叫做有得安心抖吓，再加上期間有好幾個活動一定要出席，就例如燒腩仔嘅K1家長日，真係發住燒都要同佢一齊去。

其實都唔係第一次接觸燒腩仔嘅班主任，之前接燒腩仔放學同送佢返興趣班，都同佢班主任傾過三、四次偈， 所以大家都算係幾熟亦一早知道燒腩仔喺學校同屋企嘅大概情況，不過佢喺學習方面同同學仔相處方面係點呢，艾菲都想深入D了解多D。

呢朝我哋約咗十一點半見老師，一早同燒腩仔講好，返完學校見老師就返婆婆到飲茶直落到夜晚（因為要返婆婆到先有人幫手湊佢，等艾菲可以安心休息吓） ，點知呢個仔唔知做咩一起身就喪扭，確實扭咩艾菲都唔記得咗啦，只記得搞到要打電話畀婆婆搖控幫手氹佢，先肯出房刷牙洗面換衫返學校。

趕頭趕命咁終於趕到返學校，因為前面嘅傾耐咗所以都要等兩個家長，好彩學校有個賣書同環保校服counter，艾菲就同燒腩仔過去消磨吓時間，點知...就喺呢個時候，忽然畀燒腩仔D無情力拉一拉，艾菲條腰痛到呢...要即刻同佢返去課室門口到坐低抖抖。

等咗四十五分鐘左右終於到我哋， 入到房老師就拎咗本燒腩仔嘅成長冊出來，佢簡單介紹呢本成長冊，都有講返燒腩仔喺學術方面嘅表現係OK嘅，學過嘅嘢到複習同評估時都仲識，至於英文同普通話呢，哈哈哈...由於佢實在太唔驚兩個net teacher，成日上佢哋堂時搞搞震，所以出來評估結果多數都係good，而唔係very good同excellent，由於呢樣嘢（上英文堂同普通話堂唔專心）艾菲係一早知道，所以對結果無咩失望或唔開心，始終都係K1姐，成績並不代表一切。

至於同同學仔相處，老師就大讚佢個人好social，好肯幫人，仲好有義氣，同同學仔一齊搞完事之後，會好期待一齊畀老師罰，對於呢個comment，艾菲真係唔知應該好嬲定好笑，皆因佢平時放學返來，都會好自豪咁同艾菲講佢同邊個邊個同學做咗咩衰嘢，搞到一齊畀邊個老師話，咁艾菲同老師傾完，都知佢如果只得自己一個時，會知醜唔會主動搞事，唯有得閒多D提點佢做好自己，唔好咁易畀人影響啦，始終大個仲keep住咁嘅性格的話，真係好易畀人利用來做壞事㗎﹗

由於艾菲當日真係病到有D呆，又知道老師趕住見第二個家長，所以只係問埋功課上填色，燒腩仔成日無心機填到出晒界應該點處理，就無再特別講D咩啦，事後艾菲都無同燒腩仔賽後檢討，畢竟真係仲細要畀D時間慢慢教，艾菲亦一直有跟進知佢喺學校，各方面包括守秩序同自理都已經進步中，艾菲覺得唔應該再講D咩來畀無形壓力佢，自己細個都係過來人，每次見完家長返屋企都畀燒腩仔婆婆鬧餐懵，搞到勁驚家長日同唔鐘意老師，覺得佢哋成日講是講非係衰人，呢D事艾菲實在唔想再喺燒腩仔身上重演一次囉﹗

食藥唔食藥？（29W）

同燒腩仔做完物理治療之後嘅一日，艾菲就已經中招開始乾咳，到第二日旁晚突然頭重重，夜晚探熱發現已經開始微燒，即刻食粒panadol再好好休息，第二朝未瞓醒就打落家庭醫生到約時間睇醫生，無奈姑娘mark錯時間，艾菲最終送完燒腩仔上校車，仲要喺診所到呆等成粒幾鐘先有得見醫生，入到房已經燒到38度，之後都係keep住食退燒藥先退燒，有晚以為自己唔再燒無食，點知半夜燒到38.8度凍到全身震晒，要拍醒米高拎退燒藥畀艾菲食先掂。

燒咗四日之後，終於都無再發燒，個人似乎精神返D，只係keep住頭痛同周身骨痛，當時諗住係藥力未散所至，唯一最辛苦係個鼻塞到完全透唔到氣，以為無乜嘢就如期去Dr Wong到覆診，例牌米高請半日假，同艾菲一齊接埋燒腩仔放學先去診所，然後有個小朋友一入診所，就一枝箭咁標咗去某個角落位（之前兩次覆診我哋都咁啱坐呢個位），艾菲唯有叫完全無反應嘅米高快手捉返個仔返來，免得佢騷擾到人（今次個位有人坐）。

之後艾菲自己埋counter登記，姑娘同艾菲量完血壓即好緊張咁問艾菲有無覺得暈，佢話艾菲血壓偏低，叫艾菲要慢慢行唔好急，再上磅磅重睇到個重量，同五個星期前磅差唔多，唔...點解艾菲呢段日子好似唔識肥咁嘅，都29W只係重得十二磅，莫非真係湊住燒腩仔太辛苦，還是病到無晒胃口所以瘦晒呢（雖然呢個星期無晒味覺，但艾菲都有努力嘗試食嘢㗎），開始擔心BB豆豬會畀艾菲影響到...

呢日唔使等好耐就可以見醫生，一入房艾菲就同Dr Wong講自己打敗仗，佢都有解釋病咗可以食panadol，只要一日食唔超過八粒就OK，提醒艾菲要留意住體溫唔可以超過38.5度，否則會有早產嘅風險（咁好彩艾菲都只係得一次over 38.5度姐），佢見艾菲未好返都有問使唔使開D收鼻水藥同咳藥畀艾菲，艾菲見家庭醫生D藥都未食晒，估計應該OK頂到就無要到（早知就要定來旁身啦...）。

然後艾菲再講腰骨痛嘅問題，佢就建議艾菲搵燒腩仔幫手按摩，按完包艾菲會好舒服咁話（但事實係屋企兩個男人D手勢都好唔OK囉>.<），跟住就講返QE轉過來嘅血報告，一切正常無特別問題，由於QE無轉到個Oscar同糖水結果過來，Dr Wong就話覆診時問返QE就得唔使再特別追。

傾完近況就埋位照超聲波啦，BB豆豬今次又大個咗難照咗，仲要用手擋住塊面所以只係隱約見到五官，Dr Wong話佢頭仔已經調咗落下面，暫時無臍帶纏頸嘅問題（其實開刀都唔係好使理呢樣嘢），size平均係30W大，已經有兩磅幾重，so far一切安好，即艾菲病到五顏六色都無影響到佢啦，good!

照完我哋就傾埋落訂同開刀嘅問題，起初我哋諗住等Dr Wong揀個開刀日子畀我哋，點知佢話佢基本上日日都OK， 變相就要由返我哋自己決定邊日，為安全起見當然係揀38W，但確實變日真係要就返米高同燒腩仔嫲嫲D時間，Dr Wong見我哋未決定到就話唔急，今次可以填定張hold床位紙先，下次月底再覆診時先confirm日期同過仁安交訂都未遲。

行路問題＠第一次物理治療

上年年尾去完聯合醫院見兒科醫生後，等咗大半個月終於收到電話，可以喺二月尾去做物理治療，所以呢朝我哋就一家三口出發，仲早咗成半個鐘到，亦好好彩呢邊嘅人唔算太多，可以提早見姑娘。

一入房，姑娘先叫我哋坐低，簡單問吓燒腩仔嘅家庭背景同情況，講到一半姑娘就同燒腩仔做測試，不過呢個燒腩仔可能因為啱啱病好，食咗幾日藥又或者係唔夠瞓，呢朝有D hyper失控，姑娘叫佢跟住做翹手翹腳嘅動作，佢做到一半就停低唔肯繼續做，要姑娘話做完可以玩，先終於完成到。

之後姑娘就帶燒腩仔入軟墊位置，試咗行樓梯，腳尖行，雙腳跳，單腳跳，由高處跳落地，同來回跑，之後又要佢聽住指令爬攀爬架，最後就叫佢用腳踢波同做一D用手傳波接波嘅動作，全個過程大概用咗四十五鐘左右，期間燒腩仔太失控都中場休息咗兩次。

最後姑娘同我哋做個簡單總結，話佢仲係有入字腳問題，不過呢個情況常見於七歲前嘅小朋友，相信佢會自行調節唔使太擔心，至於大肌肉嘅問題都唔太大，完全乎合到三歲嘅要求，甚至踢波時見到佢有一吓係識得自己轉身去就個波來踢（如果唔識嘅係會用手去擺好個波先再踢），證明佢眼腳協調係OK無問題。

不過出奇地，係傳波拋波嘅動作就唔合格，評估完只得兩歲左右嘅level，佢到宜家都未係好識拋波掟波嘅手勢，相信同我哋少同佢玩拋接波有關，但練習多D情況應該會有所改善。

至於艾菲最關注佢成日跌嘅問題，姑娘就話都留意到佢間中有呢個情況，同好多時雙腳跳時佢會分腿落，或者最後連pat pat都落埋地，呢個係position感覺嘅問題，應該係佢自己覺得個行路姿勢唔啱唔順，所以就會跌落地作個調整再來過，亦相信同佢平日鐘意有嘢依旁個身有關（佢係好鐘意挨身挨勢無乜腰骨）。

姑娘建議我哋一個月後再返去覆診，期間我哋可以同燒腩仔多D練習雙腳跳同單腳跳，例如畀佢夾住個公仔喺腳到跳，等佢跳時唔好分開腳落地，平日都盡量要避免畀佢挨身挨世，等佢慢慢習慣隻腳行路要用力，唔好成日唔拎起腳行路，希望下次覆診時會有所改善啦﹗

Move On（30W）

無端端消失咗兩個幾星期，有add艾菲facebook嘅朋友仔都應該知，艾菲喺呢段日子病到五顏六色一D都唔好受，認真咁大個女都未試過咁徹底地打敗仗，先係畀燒腩仔D惡菌傳染，連燒四日食足咁多日panadol先退到燒（呢個紀錄已經超越咗當年乳腺炎高燒三日），再來就忽然喪咳唔停，咳到hehe聲同豬叫咁嘅聲，咳到嘢都無氣講，咳到連續幾晚瞓唔到，咳到無胃口無晒味覺，咳到不停嘔痰，咳到全身肌肉都痛，咳到懷疑自己就來死，最死係keep住低燒唔退...

最後捱過咗個無藥食無得抖嘅weekend，終於喺上星期一晨早八點幾爬落去樓下家庭醫生到呆等個幾鐘先有得見醫生（呢排診所超full，閒閒地都等成兩粒鐘先有得見醫生），醫生一聽即話如果唔係有BB豆豬佢實捉艾菲照肺，然後診斷艾菲為氣管炎，要開抗生素畀艾菲，好彩嘅係食咗一日藥之後艾菲已經瞓到，宜家完成晒成個療程，總算好返六成左右，D咳未完全停晒，但至少夜晚係瞓到同收晒鼻水同痰先。

而喺艾菲病到死吓死吓咁嘅兩個星期，BB豆豬亦默默地踏入咗一個新里程碑，就係足30周大啦（一定要今日寫，因為聽日已經係31W啦>.<）﹗真心艾菲好欣賞BB豆豬嘅生命力，無論艾菲點燒點咳點食唔落嘢點頹廢都好，佢一直都無放棄過長大，每日keep住不停喪踢，有晚艾菲瞓唔到唔開心到喊出來咁滯，佢仲好搞鬼咁畀艾菲捉咗手仔兩次添，即時將艾菲由灰到盡頭拉返上來。