16個月

今日係年初八，亦都係我16個月大嘅日子，媽媽話新精頭見到人要講「恭喜」，咁我都應吓節送個拜年look畀大家啦，頂卜卜帽係叔婆送畀我，起初我唔肯帶㗎，不過帶親媽媽都猛話我靚仔，自己照鏡睇又好似幾好睇咁，咁我宜家就好鐘意帶住佢啦﹗



嘻...入返正題先，今個月都係一日五餐，早晚兩餐飲奶，午餐晚餐食飯仔，下午茶就食零食加水果，暫時都仲係食BB專用餐，但見到大人食物我都會不停扭食，媽媽宜家出街食飯都索性帶埋較剪隨時剪食物畀我食，廢事我嘈嘈閉或者發皮四搞到佢無啖好食（艾菲：有個為食仔嘅好處係食飯坐成粒幾兩粒鐘佢都肯坐定定唔會扭落地囉）。

經過爸爸媽媽嘅特訓，我宜家已經可以同奶樽講bye bye啦，最近一星期嘅兩餐奶都係用杯飲，不過夜晚餐奶就唔知因為轉杯，定食得太多嘢而飲少咗兩安（艾菲：佢朝早餐奶又照飲到七安㗎喎，反正夜奶遲早都要戒就飲少D都無所謂啦﹗），但自己畢嘢食嘅能力就停滯不前（可能出街食飯多少咗練習），簡中都會畢到但畢完我又唔鐘意放入口囉，有時餵返媽媽轉頭有時又拎來研究吓，最後就跌晒落枱要媽媽同我鬥快執（艾菲：一畀佢執到就實搞到成頭都係﹗>.<）。

至於瞓覺呢方面，因為天氣開始回暖，我都回復正常睡眠時間啦，每晚十一點左右瞓，第二朝未九點就起身嘈住媽媽﹗（艾菲：天呀﹗點解唔畀我瞓多半個鐘﹗）晏覺就因為我朝早唔多願再瞓（之前十一點會瞓返），所以由兩覺變成咗做一覺，仲將個時間推遲到四點，通常到咗呢個鐘數我D電已經畀媽媽放到盡晒，一落床就會自動瞓著，仲一瞓就瞓成三個鐘添﹗



宜家行路對我來講已經係毫無難度嘅事（但左腳依然有少少向內），所以最近我鐘意玩三人行，兩隻手同時拖住大人，然後個身「中」前咁吊住來行（係佢主動去拖第二個人隻手來畀佢咁玩㗎喎，即明明已經拖住公公，仲要伸手要婆婆都一齊拖佢），而媽媽最近就發現我開始識跑啦（腳踭離地咁跑），如果同我講Jump我仲會試吓跳添（個身勁un但未離到地），係屋企會忽然不停轉圈轉到頭暈跌低，大人叫我跳舞又會不停踏步扭身加扭pat，扶住牆/扶手或者拖住大人上落樓梯都無問題。



眼耳口鼻我到宜家都仲未學識眼睛係邊（艾菲：來緊面試我就真係無眼睇），但就學識咗餵BB妹妹飲奶，餵人食嘢時仲會講「um...呀」叫人擘大口，會自己坐落凳仔，媽媽一講照靚靚我就會行去照鏡，大人叫我恭喜我就會做請請嘅動作（應該係上幼潛時唱恭喜歌學返來），一聽到救護車聲就會先扮聲再同人講有「bu bu」（我哋平日係佢面前係叫救護車做bi bu車），媽媽個電話一響我就會即刻叫阿婆（因為艾菲每日都會同婆婆講電話），仲會叫爸爸，姨丈同舅父抱我去窗邊睇車（佢又識分咩人會睬佢，一定唔會叫艾菲同婆婆抱佢睇㗎喎）。

自理能力方面媽媽話我好抵讚呀，因為我終於學識每次出街後返到屋企要係門口坐定定，自己除鞋同除襪（當然係艾菲係後面幫手整鬆咗先畀佢自己meet鞋仔個魔術貼同抽隻臭襪出來啦），再放好對鞋先入playmat玩，而potty training係呢個月都有明顯進展，宜家我想便便時開始識得同媽媽講「唔唔」，最近呢個星期仲學識咗坐大人廁所便便添（艾菲：唔使日日洗potty係最爽嘅事﹗）﹗



我嘅情感表達能力亦越來越強，出街見到D哥哥姐姐我會好興奮咁叫佢哋，但有時撩完人又會怕醜，會將自己暱埋係爸爸媽媽後面，去到陌生地方會唔肯入屋/電梯，陌生人請我食嘢或者樣食物係未見過嘅我唔會隨便食，而經過呢個新年接觸多咗唔同年紀嘅小朋友之後，媽媽發現我終於學識同其他小朋友爭玩具玩，以前我畀人搶咗件玩具都好似無事發生咁，宜家就會還手去同人爭返轉頭，如果唔成功就會尖叫甚至出手想打返人咁（唔...小朋友爭玩具艾菲主張由佢哋自行解決，但出手打人呢個就要stop同教啦）， 見到爸爸媽媽鬧交我會爆喊（其實都不過係為D無謂嘢嘈咗幾句，以後真係要忍口唔好係佢面前嘈），有次見到婆婆同個姨姨食飯爭埋單，我以為個姨姨蝦婆婆就即刻發惡鬧同打個姨姨（呢吓真係冧死佢阿婆，但難為最終畀佢打到個人係坐佢隔離嘅艾菲呢...）。

講嘢方面就依然鐘意將所有嘢歸類咁叫同埋配音扮聲，不過我最近都唔多願叫人啦，最多好簡中咁叫阿婆，同真係有事要搵媽媽時先喊住叫佢，至於新學識嘅單字就有凳，擺，鼻（正音係罷罷），貓（唯一一樣唔叫wow wow嘅動物），靚（真係會指住D公仔或者花同你講靚靚），俾（上幼潛時老師教想食嘢要攤開手示意俾，佢起初寧願唔食都唔肯攤開隻手，但忽然上星期有日就開金口講俾字兼攤開隻手），妹妹同埋jump，絕大部分都係跟大人口水尾學返來，宜家我已經識聽好多人話，同人吹水傾偈都開始有紋有路㗎啦﹗