燒腩仔最近明顯百厭星上身，玩電線，玩房門，摸「車立」門，整high chair個安全扣，搞電視機側邊D掣，衝入房搞暖風機或者抽濕機，唔危險嘅嘢佢都唔做，打佢手仔仲發你皮四，之後就尖叫鬧人趴地喪扭，基本上乜都出齊咁滯，煩到艾菲頭都大埋，然後某日艾菲係廚房整完D嘢出來，就見到佢將張Ikea凳仔反轉坐咗係到。
記得之前睇肚B媽個blog見到肚B都試過咁樣卡住咗，所以艾菲見到此情此景實在忍唔住笑到肚痛，燒腩仔見到艾菲狂笑仲以為自己做咗咩好事，完全唔知死咁跟住艾菲好興奮咁笑，然後艾菲把握機會話要同佢咜吒，佢仲好合作咁即刻望鏡頭擺晒pose添﹗kakaka...
影完相艾菲就好衰咁丟低佢唔理走咗去啦，當佢想起身跟艾菲一齊走嘅時候先發現自己被困係到慘叫，而艾菲當然無佢咁好氣坐埋一邊睇吓佢會點收科（呢D位艾菲都幾堅持要佢自己搞返掂唔會幫佢，咁當然係個情況係安全先會咁狠心啦），慘叫咗一陣見艾菲完全不為所動無救佢嘅意思，呢隻燒腩仔終於收聲試吓自己起身，跟住唔使幾秒已經順利逃脫。
不過最爆笑係成功逃脫之後，燒腩仔居然又忽然坐返落去困住自己，慘叫咗一輪證實艾菲係點都唔會救佢先死死地氣自己起身走人，自此以後佢就無再將張Ikea凳反轉來玩啦﹗原來咁樣畀佢親身經歴兩次，真係有用過艾菲日日夜夜提住叫佢唔好搞，所以話呢...做媽媽真係要係適當時候學吓放手，唔係佢哋就永遠都長唔大㗎啦﹗
作者已經移除這則留言。
回覆刪除咁橋嘅，見到燒腩仔卡左響張櫈腳爭扎個樣，我都笑左出黎同唸起之前肚B啲魚野 :)
回覆刪除哈哈，咁燒腩仔都醒喎，見你冇反應就唔玩，其實佢想引媽咪注意多啲喎~
我都覺得佢係一個幾需要媽媽注意嘅小朋友來，同埋佢都幾識睇眉頭眼額，知我幾時會話佢唔睬佢幾時係同佢玩
刪除其實睇樣我知燒腩仔係百厭類型，不過男仔都係活潑d好，代表佢個腦仔活躍，第時應該幾聰明。睇左你blog咁耐，真係要讚你好識教，因為頑皮的小朋友唔易教的，而你都幾嚴厲唔易對付，大概燒腩仔亦唔係你對手吧，佢總會乖乖就範的：）
回覆刪除嘻...因為佢本身有個同樣百厭嘅媽媽嘛，所以我最清楚唔及早調教佢，到佢大個之後可以有幾失控
刪除我家一一又係吾危險吾搞, 我都係由佢跌下撞下板反而重好過日哦夜哦.
回覆刪除無錯，等佢試吓感受吓先會入腦
刪除夠狠心, 做得好!
回覆刪除YEAH！
刪除艾菲講得好呀！不過真係唔係人人做到呢！呢個情況我老公應該第一時間去左救佢。。。
回覆刪除所以其他屋企人嘅配合都好緊要
刪除我覺得所有BB都有做戲既潛能, tarebaby 會喊同發皮4引人注意, 如果婆婆公公唔理佢, 佢會自己走去拎手巾仔抹眼淚 =_=!
回覆刪除我鐘意自己拎手巾仔抹眼淚呢吓喎，如果換轉我見到實忍唔住笑
刪除你講得好好呀~ 我諗我都要tune下自己~ 學下你~
回覆刪除有時真係要畀佢哋撞吓板，當然都要睇情況啦
刪除理論上我極同意你講法, 但衰在我係心軟媽, 可能到最後都係會出手.............
回覆刪除要練吓狠心啲先
如果你日日畀佢搞到一頭煙氣都唔得閒抖吓，呢D位你好自然就會狠心到由佢扭吓再自己起返身㗎啦
刪除我都會咁，唔理佢，做得好
回覆刪除YEAH！
刪除燒腩仔都係到測試緊你反應~~
回覆刪除真係要狠下心..咪佢地搗蛋期真係有排煩~~HEE
佢宜家好醒，開始識得睇我眉項眼額，宜家有時我唔出聲望住佢，佢已經即刻唔敢亂來，不過就會蝦其他人囉
刪除我覺得呢張相燒腩仔好似細個好多咁, 有BB FEEL, 我一睇張相就好想笑..........little k 有時做左d野我都好想笑, 但要忍住, 因為佢地真係以為好得意架...
回覆刪除嘻...搗蛋係小朋友強項呀
刪除