密密食密密食

密密食...密密食...食完一啖又畢一啖來食...由燒腩仔十一個月大教佢用匙羹畢飯食開始，艾菲就一直期待佢可以自己好乖咁食晒成碗飯嘅呢日，終於...係五個幾月之後畀艾菲等到啦﹗



仲要只係用咗大半個鐘左右就食晒成大碗飯，兼且係食得好乾淨完全無打過仗嘅痕跡（如果D飯跌咗落餐盤到燒腩仔會自己執返落碗到再畢來食）﹗艾菲事後只需要一塊碗布抹乾淨個餐盤就OK超輕鬆﹗

望住眼前呢個好專心咁自己食飯嘅燒腩仔，艾菲真係覺得好感動﹗﹗﹗一來因為佢終於大個仔越來越明事理同獨立﹗二來係艾菲終於唔使日日捱住肚餓來餵佢啦（之前日日都要餵咗佢先有得煮嘢畀自己食，好多時都等到兩點幾先食到第一餐）﹗以後唔使再等來等去同趕頭趕命，可以兩母子係屋企慢慢撐枱腳啦﹗

其實係呢個教佢用匙羹嘅過程入面，都經歴過起起跌跌，由最初佢只肯拎住枝匙羹打死都唔放，到後期佢意識到枝匙羹係用來畢嘢食，跟住每次都要佢mood到先會畀艾菲捉住隻手教佢畢，有時又會high爆咁係個碗到喪撩整到成枱都係，之後就上手繼而上頭勁messy，最死係呢D咁厭惡嘅工作只得艾菲一個肯堅持去做，燒腩仔婆婆會話佢仲細唔使咁快學用匙羹，負責平日餵夜晚餐飯嘅米高更加唔會有心機去train佢，有時如果出咗街又無機會同佢練，所以一拖再拖就拖咗咁多個月。

燒腩仔一直都唔係太識用道力，所以畢極都畢唔到D咩無乜成功感，後來聽朗朗媽建議畀餅仔佢試吓畢，但呢隻仔睬艾菲都傻直接用手拎來食就算，後來有次唔夠時間無煮飯就開糊仔佢食，居然佢又成功畢到喎，自此之後先對畢嘢食多返D興趣， 然後試吓試吓終於成功筆到幾粒飯，到上個月已經開始畢到幾啖飯，但就成日顧住玩唔肯放入口，於是某日心血來潮就諗住試吓逼佢自己食，餵到一半左右艾菲就忽然收手畀佢自己食，點知呢個小朋友寧願揀唔食都唔肯自己筆落口食，後尾仲喊晒口連艾菲再餵都唔肯食。

見到佢咁嘅反應，艾菲真係灰到震，唯有安慰自己佢都未夠18個月，唔使心急再等吓添啦，見前排天氣凍廢事D飯畀佢撩到凍晒更加索性連枝匙羹都唔畀佢拎，點知佢又突然食嘢食到誓願咁，唯有又出盡法寶氹佢食快少少，試無可試之下就拎返枝匙羹出來畀佢拎住，出奇地佢勁開心大啖大啖咁食之餘仲好主動咁畢飯食喎，艾菲即刻心諗機會又到啦﹗

今次艾菲餵咗佢幾啖，試咗佢心情唔差係想食碗飯，就開始鼓勵佢自己畢來食，見佢畢到當然例牌好誇咁讚佢叻啦，之後艾菲就放慢手腳叫佢試吓自己畢多幾啖來食，佢畀艾菲讚多兩讚即刻飄飄然，咁艾菲就剩機同佢話有嘢要整跟住行開畀佢試吓自己食，起初佢有D不爽咁係到叫兼停晒手，後來艾菲再扮晒嘢咁埋去幫佢執返D飯，又慢慢抹吓自己隻手叫佢食住先來拖時間，佢見艾菲真係等極都未得閒餵就唯有又自己畢來食，見佢食順咗艾菲又話有嘢整要行開一陣，之後佢就無再嘈住要艾菲餵，自己好乖咁逐啖逐啖畢來食啦﹗

後話：



正所謂欲善其事先利其器，放咗燒腩仔條食飯片上FB後畀豬脾媽問一問，艾菲先醒起燒腩仔用緊隻Calibowl原來幾好用，相對TT或者Combi的BB飯碗真係容易D畢到，而且D飯好少係畢嘅過程入面飛到周圍都係，亦係點解艾菲事後清潔可以咁輕鬆嘅主要原因啦﹗



艾菲之前係上網見有媽媽推介呢隻碗，咁啱同時期又係FB D online shop見到有貨唔係好貴就貪得意買隻返來用，擺咗好多個月一直到後期真係想逼燒腩仔自己畢先拎出來用（因為個碗係無手柄，如果全程由大人餵食的話其實係唔方便拎），到宜家燒腩仔終於可以自己食飯，艾菲先發現佢原來仲有一隻係有吸盤同蓋嘅，見到就想買返隻來出街食飯時用，配合埋之前係阿卡將買套Edison餐具一定好掂，但艾菲去Mothercare問過話全線無貨，最快都要三、四月先會返貨呀﹗>.<