Blog Blog BB X'mas Party

係豬脾媽嘅悉心安排之下，我哋一眾Blog Blog BB又可以聚一聚啦﹗而豬脾媽除咗安排食物同遊戲之外，仲好細心咁佈置到現場好有聖誕氣紛，連親手製作嘅蛋糕仔都出動埋（食到燒腩仔舐舐脷呀﹗），真係辛苦晒啦﹗



上次見面嘅時候大家嘅BB都只係識爬，到今次絕大部份嘅BB都識行，而燒腩仔更加係滿場飛全程好hyper咁行來行去，想佢停低一秒影張相都有難度﹗



巡場一次之後就開始四圍搵吓有咩玩，見到朗朗哥哥拎住個波就想拎，好彩朗朗哥哥份人無咩所謂肯讓個汳畀佢玩陣



玩咗陣波又走咗去門口，咁啱遇到晉晉一齊係到研究個門頂同門塞，嘻...艾菲發現晉晉同燒腩仔都鐘意用超專心mode去研究D唔顯眼嘅嘢，同埋同樣好鐘意推車



追住行來行去嘅燒腩仔時忽然見到波哥坐咗係地吓擺晒pose咁，即刻唔理個仔飛撲埋去影返張相先，波哥呢個造型真係好得超可愛呀﹗



返到playmat見到肚B......手上架車，呢個燒腩仔即刻係後面跟到實一實，仲借D意走去摸肚B手仔添，真係笑到艾菲反肚﹗



等咗半年...終於等到妹豬來啦﹗即刻捉住佢哋坐埋一齊影返張相先﹗妹豬真人好斯文好淑女呀﹗



玩咗咁耐來個中場休息先啦﹗呢個小朋友一見到大人食嘢就指住狂叫「mum呀...mum呀...」，為免佢太激動嚇親大家我哋唯有畀佢一齊食，然後艾菲拿拿聲飲完包柑桔檸檬畀佢，佢就啜到...O...個樣咁衰...真係失禮死人啦﹗



為咗盒嘢飲，連小檬哥哥撘膊頭叫佢一齊影相都唔理，賴低小檬哥哥自己一個做happy face，無義氣﹗﹗﹗



仲搞到龍BB都要拎包維他奶來試吓係唔係真係咁好味，連BBB都望住佢呆咗幾秒，真係心諗「你使唔咁肉緊呀」﹗



後尾盒嘢畀爸爸拎走咗，佢就企圖拎個波同龍BB換，嚇到後面一一要咬實D盒綠茶添﹗



媽媽BB大合照之後，檬媽建議影張BB大合照，呢個絕對係值9.9分嘅高難度動作，艾菲影到呢張四人合照已經要去買六合彩，因為......



唔使兩秒大家已經變成咁，得返小檬一個仲肯望住前面鏡頭 >.<



影完大合照就到遊戲時間，成班小朋友一齊玩傳波波，燒腩仔應該唔知自己玩緊咩，不過就好like呢個放波波嘅桶，完咗個game之後就同南瓜仔，龍BB，朗朗佢哋一齊圍住個桶，拎D波出來又放返D波入去



而女仔都有女仔嘅玩法，肚B就拎個桶笠住個頭行fashion show，妹豬就好淑女咁坐係地下，再將D波逐個逐個放入膠袋



除咗有得玩之外，每個小朋友仲可以拎個裝飾牌返去玩，Nice﹗



臨走終於有機會同豬脾玩一陣，佢仲好friend咁請艾菲食士的糖添，仲襯人少少整咗個招牌笑樣畀艾菲睇（可惜一舉機影佢就唔肯再整），真係冧死姨姨啦﹗



最後講返交換禮物環節，Anki妹妹就抽到燒腩仔準備嘅積木，因為貪佢男仔女仔都啱而且永遠唔會嫌多，希望佢會鐘意啦，至於燒腩仔就抽到一一送出嘅麵包超人碟，艾菲好鐘意好鐘意好鐘意呀﹗襯埋燒腩仔個零食盒到簡直係一絕呀﹗大家來緊可能就會見到艾菲不停用呢隻碟放燒腩仔D食物㗎啦﹗嘻嘻...

呢日艾菲同燒腩仔都玩得好開心，艾菲仲成功集郵捉住燒腩仔同咗好多BB影相，而最開心當然係燒腩仔當晚十點九瞓落床唔使兩分鐘就瞓著，一覺瞓到第二朝十點半先捨得起身啦﹗WAKAKAKA!!!