14個月

嘩嘩嘩﹗我又大多一個月啦﹗媽媽話我呢個月有驚人嘅進步，學嘢學得快咗好多，已經識聽好多指令，尤其係講嘢方面有突飛猛進嘅表現添，當佢睇返我一年前影嘅相之後，就好堅持咁話我唔再係燒腩仔BB，話以後要叫我做燒腩仔小朋友喎﹗



今個月都係繼續一日五餐，早晚兩餐飲七安奶，午餐晚餐食一個大人碗嘅飯仔，下午茶就食生果加其他零食，平時同爸爸媽媽食嘢都會嘈住要佢哋畀D我食，有時緊張得滯仲會扯媽媽夾緊餸隻手埋來搶嘢食，基本上每次都成功呃到D嘢食㗎﹗而我宜家已經可以自己將叉或者匙羹入面D嘢食放入口（即艾菲幫佢叉好或者畢好，佢跟住就會自己放入口食），自己畢的話十次都會好簡中有一次成功畢到一兩粒飯嘅，雖然仲未可以自己食飯，但媽媽都已經勁讚我叻啦﹗



媽媽日等夜等，終於等到我今個月出多兩隻牙啦，我宜家總共有六隻牙仔，出牙時無發忟無發燒，不過就成日流口水流到塊面幾乎爆擦，而且成日口痕食手指食到扣喉咁聲（隻手指已經頂到喉嚨都仲係要繼續食），次次飲完奶都咬住個奶樽唔放係咁啜，瞓覺時又鐘意咬被咬枕頭袋，搞到媽媽連枕頭都唔敢畀我用，仲要等我瞓咗先敢同我蓋返張被。

呢個月瞓覺瞓得幾好，每晚十點半食完奶就上床瞓覺，瞓到第二朝九點先起身，雖然有時會七點幾八點醒，但見到媽媽未起身就會再瞓返，keep住一日兩次晏覺，加埋都瞓到三個幾鐘㗎，宜家定時定候媽媽一話「夠鐘覺豬」，我就會自己乖乖行入房，媽媽抱我落床之後叫我「僕僕瞓」，我就會自己扒底係床到瞓，有時唔願瞓時仲要媽媽拍pat pat，但好攰時碌兩碌就瞓著㗎啦﹗嘻...我係唔係好抵鍚呢？



至於行路方面，媽媽話可以用健步如飛來形容我喎，我已經行得穩陣咗好多（但左腳仲係有少少向內灣），跌低咗唔使扶嘢都可以自己起返身，仲開始學緊行樓梯添（扶住上一兩級都無問題，但落就仲未識點樣遞隻腳出來缷力），最勁一次係由中央圖書館穿過維園行到銅鑼灣（除咗樓梯之外無抱過），雖然唔想行或者行到攰時會扭抱，但如果媽媽同我講拎住嘢好重，又或者婆婆話手痛抱唔到，我都會肯乖乖地自己拖住佢哋慢慢行嘅，不過因為宜家識行，就唔會再企定定畀媽媽影相，所以最近商場D聖誕燈飾，媽媽都採取放棄態度唔打算打搞我啦﹗



我到宜家都仲未識得眼耳口鼻係邊，但媽媽就教咗我做小檬哥哥嘅招牌動作Happy Face，每次有咩唔想做時，我就會整Happy Face或者飛吻來氹爸爸媽媽成全我，而除咗呢個咁殺食嘅冧人動作之外，我仲學識咗點蟲蟲，入形狀，耍手擰頭，點頭（餵佢食飯時問親佢好唔好味就會點頭，wakaka），鍚鍚，踢波，掩口扮咳，同埋飲杯添﹗


 
我嘅自理能力都有好大進步㗎﹗經過媽媽一個月嘅訓練之後，宜家每次換完片我會自己拎條片去廚房掉落垃圾桶，夜晚飲完奶又會拎返個奶樽去廚房畀爸爸（爸爸負責洗奶樽），有時媽媽漏咗嘢係廳又唔想突登出房拎或者跌嘢落地唔得閒執都會叫我幫手拎返畀佢，佢係婆婆屋企走時無放返好對拖鞋我仲會幫佢擺返上鞋架添（呢個真係笑死艾菲同婆婆，有次艾菲換好鞋顧住同婆婆講嘢無放到對拖鞋，佢就自己執起艾菲對拖鞋逐隻放上鞋架，雖然放錯位但都好抵讚呀﹗）﹗仲有﹗仲有呀﹗就係我已經認得路返屋企，每次一出電梯就會自己行返屋企，而出街或者返屋企經過lobby都一定會自動自覺同管理員揮手say hello。



婆婆一直話我係口水佬，成日自己講BB話講到唔停口，又周街撩D哥哥姐姐同姨姨講嘢，最近仲成日拎住個電話好肉緊咁唔知同邊個煲粥，而自從我打咗水痘針之後就忽然開金口，除咗爸爸，媽媽，姐姐，阿婆，嫲嫲之外，今個月仲突然對住爺爺叫咗聲阿yeah，至於單字就有mum mum，燈，飽（有幾次餵餵吓佢推開我手耍晒手話唔要，艾菲問佢點解唔食佢就好認真咁講個飽字出來），包包，抱（有次扭抱時好激動咁講），apple，唔愛/係（lur住咁講，每次都會配合埋耍手擰頭嘅動作），車，波，踢，鍚，杯，乞痴（艾菲完全無特別訓練，基本上都係同佢玩時佢自自然然咁跟我哋講）。


 
唔...一口氣講咗我咁多好嘢，媽媽話點都要自爆返D衰嘢喎，宜家我嘅表達能力越來越強，情感亦越來越豐富，每次我唔捨得一個人走，尤其係爸爸返工，我就會企係門口到爆喊，有個朝早我知爸爸就出門口就衝埋去扯住佢隻腳唔放，連媽媽埋來想拖我走都一手將佢推開（艾菲：無良心嘅衰仔﹗），而當我玩得high時，想要一樣嘢但拎極都拎唔到就會忍唔住出手打人（暫時只係打過爸爸同媽媽，呢個世界仔對住其他人通常唔敢咁過份），畀媽媽鬧或者有嘢唔鐘意時會發脾氣，成個人扒係到撼個頭落地（佢好鬼精，次次都係細細力咁撼，同一定揀係playmat到撼而一定唔會係磚地到撼），不過畀至愛婆婆好惡咁鬧過之後都叫做收斂咗㗎啦﹗


 
不如唔好嘅嘢就唔好再講啦，等我送返幾張靚相畀大家睇吖﹗呢個月爸爸超忙，完全無時間帶我四圍去玩，於是媽媽就帶咗我返公公婆婆屋企度假兩日，仲帶咗我去大埔海濱公園到玩吹泡泡添呀﹗全靠公公好落力咁吹泡泡，婆婆又係側邊搞氣氛，媽媽先終於同我影到泡泡相，好...唔講咁多廢話...去相先啦﹗



嘩﹗好多泡泡呀﹗



等我試吓捉住佢先﹗



捉到啦﹗捉到啦﹗



最後等我扮林峯哥哥chok吓先﹗