Happy Birthday@海洋公園

啱啱過咗嘅星期六係艾菲生日，無咩特別地方想去又帶住燒腩仔，艾菲就決定用生日免費入場優惠帶燒腩仔去海洋公園﹗其實之前米高生日已經想去，但佢生日咁啱又係星期六，再加上米高不停反問艾菲係唔係好想去同大陸人逼所以去唔成，不過事後艾菲睇月暦見出年大家生日都係星期日，咁即係米高更加唔會畀我哋去啦，於是艾菲今次一定要爭取最後機會go go go!



對上一次來海洋公園係2009年艾菲生日，當時嘅大門口裝修緊沙塵滾滾，今次來已經整好咗，門口仲多咗個好騎呢嘅噴水池，不過燒腩仔就睇得好開心，不停想撲去搞D水。




我哋十一點左右到，有人睇錯海洋劇場時間，所以一入去就拉我哋排咗半個鐘隊坐纜車上山開飯，不過錯有錯著我哋早咗到餐廳，遲半個鐘都已經排晒長龍等位，真係多人到好誇張﹗




食飽飯就四圍行吓，睇吓中華鱘，睇吓水母，睇吓人哋掟公仔...燒腩仔睇得好興奮，不停指住魚缸同沿路D聖誕樹係到叫，然後我哋行去海洋劇場先發現下一場表演係3:30pm（原先以為係2:15pm），見仲有兩個鐘剩就落返山玩，點知就咁出事miss咗無得睇...



上山時見燒腩仔好like坐纜車，所以米高就建議坐返纜車落山，可能食飯時間無乜人，完全唔使排隊超smooth，Good﹗



hehe...見燒腩仔最近終於學識錫咀咀，有個媽媽就儲心積累學大爺媽，要佢送個半空中的Birthday kiss畀艾菲﹗冧爆﹗



落返山之後路過香港老大街，剩機叫燒腩仔去賣吓生果，又扮吓交通警，不過行咗陣就開始落雨，唯有撤退去室內地方。



我哋去晒兩個熊貓館，不過老那兩隻暱係房入面唔肯出來見人，嬾呢兩隻就趴係到喪瞓，一隻瞓住痾便便，另一隻就瞓到睡姿勁搞笑，連燒腩仔見到都忍唔住笑。



之後去咗威威天地（即以前嘅兒童王國），見時間啱就去咗睇海獅表演，起初燒腩仔有D呆滯無乜興趣咁，但艾菲以為佢唔鐘意想走時，佢見海獅返入後台又會同我哋講無嘢睇喎，睇完表演就爭取時間出去玩，不過同佢玩旋轉木馬同摩天輪都喊，唯獨係扭軚盤就鐘意到唔肯走。

見差唔多時間夠鐘睇海洋劇場就趕返上山，而為咗慳時間所以選擇咗坐海洋列車，多人但第二班車已經上到，一落車大家目標都好一致咁向住海洋劇場進發，但我哋冒住雨抱住燒腩仔行咗一大段路，終於趕到海洋劇場門口時，職員居然話full咗唔畀入場﹗﹗﹗而當時只係3:00pm，距離開場時間仲有半個鐘﹗真係去咁多次都未試過囉﹗﹗﹗

呢一吓...艾菲真係有D火﹗勁唔滿意海洋公園嘅安排﹗海洋劇場幾乎係入海洋公園指定動作（艾菲入場前仲不停幻想燒腩仔見到海豚表演會有幾開心﹗），就等於迪士尼嘅parade一樣係必睇，從來只有遲咗入場無位坐要企後面睇唔清楚都未試過唔畀入﹗如果full咗係唔畀入場嘅，點解唔學迪士尼咁要用fast pass拎飛入場？又或者早少少宣布等D遊客唔使專登趕上山呢？艾菲沿路見到好多人推住BB車或者輪椅咁趕過去，呢段斜路絕對唔係易行㗎﹗



無得睇海洋劇場表演，燒腩仔又咁啱無電瞓著咗，我哋唯有抱住燒腩仔係D凳到呆坐咗陣，等佢快叉完畢（只係瞓咗半個鐘﹗）就去冰極世界睇企鵝，好彩燒腩仔都好like企鵝，先成功將艾菲D怒火淋熄﹗

睇完企鵝出來，係小食亭同燒腩仔食完下午茶我哋就坐返海洋列車落山走人，由於我哋無帶BB車所以一定要排隊，點知就勁好彩咁遇到班好強嘅強國人﹗強到職員一放我哋去月台等車，明明放得你行就一定上到下班車，佢哋都要鬆晒踭咁亂推亂撞，就算大家都企定晒等車佢哋都仲要繼續推，艾菲同米高都畀佢哋批咗幾吓踭，然後有一吓佢哋差D撞到燒腩仔，米高終於忍唔住出聲鬧個女人，佢哋先識停落來唔再推﹗之後上車同落車都無人敢同佢哋爭讓開畀佢哋行先，佢哋依然成班人推上車同推落車﹗所以帶小朋友同行或者大肚媽媽去海洋公園，真係一定要帶BB車同行或者唔好坐海洋列車﹗



離開海洋公園，米高帶咗艾菲去尖東Hotel Icon食buffet，米高上年已經話想試呢間buffet，但佢唔接walk-in客，仲要至少兩個月前book同落訂先有位，難得今年終於book到有得食啦...啦...啦...冷盤同熱盤同樣出色又多選擇（唯一無生蠔），食物亦fill得好快，最like佢個北海道帶子刺身同埋三文魚籽，而燉湯同蟹粥都好足料，不過甜品就一般，因為絕大部分都係艾菲唔like嘅朱古力同榴槤。



Book位時講明兩個大人一個小朋友，所以酒店一早準備咗BB凳同餐具畀燒腩仔，仲有畫紙同顏色筆添﹗平日同燒腩仔出街食飯艾菲都係煮定飯仔帶去食，煮唔到就畀佢食和光堂BB飯盒，但今次就膽粗粗咁畀佢試吓全餐食餐廳食物，我哋拎咗碗湯麵（有蝦，魚片同烚蛋做餸），白飯，菜，雞，麵包同西瓜畀佢食，真係唔好睇少佢嘅食量，佢係可以跟我哋由頭食到落尾，顏色筆都係畫兩畫就唔要來問我哋拎嘢食，所以帶埋佢去食buffet真係好抵㗎﹗

雖然今年生日無禮物收（明顯投訴緊﹗），不過難得米高有安排節目同買定生日蛋糕慶祝，第二朝又畀艾菲瞓到十二點先起身，而燒腩仔除咗扭眼瞓之外全程都算合作，可以同呢兩父子平平靜靜咁一齊過，艾菲已經好心滿意足啦﹗話都無咁快又大一歲，真係要好好珍惜眼前擁有嘅嘢，特別係同燒腩仔相處嘅時間呢﹗