同燒腩仔做完物理治療之後，緊接住就係艾菲去Dr Wong到覆診（專登約埋同一日等米高請少D假），而喺覆診前我哋先過對面仁安分科診所交按金hold床位，搞掂之後職員畀咗一大堆資料艾菲，其中仲有呢隻熊仔連DVD，哈...乜原來宜家落訂有嘢送㗎，都幾搞笑喎。
過到去Dr Wong嗰邊診所，平日星期一坐無虛席嘅大堂，呢日星期三居然只得小貓三四隻，連米高都話個反差點解會咁大，登記後照例量血壓磅重同驗小便，全部都pass無問題，而艾菲嘅體重今次終於有上升啦，但都只係由重12磅升到13磅，唔...肚圍都有大咗...半...寸...㗎，由37寸漲到37寸半囉。
真心艾菲都好奇怪點解今次可以keep得咁好（呢排已經勁放肆乜都食啦喎），身邊個個都話陀第二胎會肥得勁D嘛，最近睇返三年幾前陀燒腩仔時影嘅相，先覺得想當年水腫得幾勁（上胎好似重咗廿磅，不過已經唔算肥，生完唔使特登減就著得返之前D衫褲），相比宜家真係好fit呢，莫非湊燒腩仔所消耗嘅能量真係有咁大（今次係無做過運動連散步都少）？kakaka...
登記時問姑娘話要等兩個先到艾菲，等艾菲仲拎咗粒珍寶珠出來塞住燒腩仔把口（因為唔記得帶車畀佢玩>.<），點知先啱啱去完洗手間返來坐低就叫艾菲名入房，搞到燒腩仔畀Dr Wong笑佢每次都係食住嘢入房（上次食朱古力食到成手都係:P）。
Dr Wong循例都係問吓艾菲近況，咁艾菲亦循例投訴吓BB豆豬踢得好勁（想當年燒腩仔係無郁得咁勁㗎），尤其係艾菲夜晚瞓覺時，向左向右瞓佢都有意見，而且開始有宮縮就更加唔舒服，Dr Wong就解釋艾菲本身瘦底，所以特別覺得佢郁得勁，亦要感恩呢個係佢健康嘅表現，佢每休息40分鐘就郁一郁，艾菲唯有忍埋呢幾個星期，至於宮縮就要留意住有無肚痛，無肚痛就唔使擔心。
之後我哋就埋位照超聲波，今次BB豆豬又係用手遮住自己個樣，我哋只可以勉強見到佢D五官，心跳頻率正常，至於size呢，頭仔係32W，肚係34W，腳骨就36W（長腳妹？），整體來講已經有34W嘅size，係正常中碼B，照計有五磅幾重（唔怪得艾菲條腰成日都咁攰），估計到38W出世時會有七磅（Dr Wong話多數會重過第一胎），Dr Wong話艾菲現階段咩都食得，但唔好食過量澱粉質怕BB豆豬會大得太快。
照完超聲波我哋就出返去傾開刀嘅問題，今次我哋終於confirm到個日期畀Dr Wong，而Dr Wong更即場打咗返去仁安到hold手術室，佢話有咩問題可以隨時改都無問題，但我哋梗係唔想再有任何變動啦，始終今次要兼顧埋照顧燒腩仔嘅嘢，真係牽一髮動全身，所以BB豆豬你真係要生生性性呀﹗
見Dr Wong今次心情唔錯又有時間，仲關心埋燒腩仔手腕D濕疹（佢都係過來人），艾菲就問埋佢個肚呢排又開始爆痕嘅問題（天氣一乾燥就超痕，準過天文台咁滯，仲會畀褲頭整到紅晒），佢話可以開隻有激素嘅藥膏艾菲搽，話對BB唔會有影響，不過...艾菲考慮咗陣之後都係無要到，寧願勤力D密D搽肚紋膏算（反正都係差唔多嘢） ，咁Dr Wong就提醒艾菲一定唔可以R損佢，否則要等到生完先有得整返靚個肚㗎啦﹗
我哋之後出去等約期同找數，同姑娘confirm仁安床位hold咗，手術室亦book咗，再約好三星期後覆診就走（本身應該開始兩星期去一次，但Dr Wong知艾菲下星期去QE覆診就專登mark遲一星期），正如Dr Wong講艾菲都唔會覆多幾多次診就醫院見啦，嘩﹗D時間真係過得好快呀﹗
題外話順便呻吓，唔知係唔係距離BB豆豬出世嘅日子越來越近，艾菲同燒腩仔呢排嘅情緒都明顯有D波動，佢最近忽然出現咬手指嘅情況（有晚直情見佢用口咬手腕），幾乎晚晚瞓唔好醒幾次（最經典一次係凌晨三點搞到朝早七點半先瞓返），濕疹更加係喺佢發忟喪R嘅情況下大爆發，亦經常無理取鬧撩交嗌，無論艾菲點攬點錫點安撫點輔導點同佢講道理，佢都係無咩改善咁，然後望住佢呢個不安嘅樣，艾菲不其然就會心痛得眼濕濕忍唔住喊，唉...
而艾菲呢排亦明顯出現築巢現象（上胎無㗎），不停嫌米高清潔得間屋唔夠乾淨，執完廚房又抹呢樣抹嗰樣，一有時間又係咁執BB豆豬同燒腩仔D衫同日用品，仲好狠心咁掉咗好多嘢，最搞笑係喺執雪櫃時居然畀艾菲搵返隻發咗好耐未食嘅花膠出來，咁梗係拿拿聲拎來燉鮮奶食咗佢益BB豆豬啦，否則又要等生完半年之後先食得㗎啦﹗
沒有留言:
張貼留言