再闖葛量洪號滅火輪

復活節紅假最後一日，眼見天氣咁好真係連抖都唔捨得抖，一早瞓醒做好家務又準備出發去玩，今次目的地係暑假時去到撞正休息日無得入去嘅葛量洪號滅火輪，九龍人難得過海來到西灣河，出發前去太安樓掃街食雞蛋仔是常識吧，再貪得意試埋隔離個韓式炸雞，不過兩樣都係味道一般，尤其雞蛋仔無以前食咁香口。



食飽我哋就向住海邊慢慢行過去，一家人沿路睇吓花睇吓海欣賞吓風景，真係幾寫意幾舒服㗎，行咗大概十五分鐘左右就見到大大架滅火輪。



滅火輪嘅展館分咗三個區，地下一層係放D短片同消防裝備，講吓香港滅火輪嘅發展史，然後上到滅火輪嘅第一層就可以睇吓船入面嘅各樣設施。



上到滅火輪最高嘅第二層，就會見到D用來救火嘅水砲裝置，燒腩仔把口雖然不停叫住「我要去睇消防船」，但實情係上到去又乜都無咩興趣咁，叫佢同枝水砲影相都講到口水乾先肯埋位。



參觀完滅火輪，我哋就同佢沿路行去鰂魚涌公園，始終都係遊樂場啱小朋友多D，不過唔知係唔係佢記得自己來過，由上天橋開始已經唔肯拖實大人，落橋之後仲一枝箭咁衝咗入公園，自己四圍玩咗成十分鐘有多，好似艾菲同米高一定會跟住佢咁，完全無搵過我哋去咗邊，而我哋都故意離遠監察唔畀佢搵到，直至有個位佢終於見到我哋先笑住咁走返過來（仲未覺得自己講都唔講就走咗去有問題），我哋就剩機捉佢埋一邊哦咗一輪，佢先開始意識到自己頭先有幾危險。



見佢眼濕濕咁真係知自己唔啱嘅樣，我哋都無特別為難佢太耐，同佢講好數約定幾多分鐘後喺邊個位到搵返大人，就畀佢返入去遊樂場玩，而佢今次都明顯大膽咗好多，終於肯玩呢D凌空跨步嘅玩意，又夠膽爬一D比較高嘅擒爬架。



夠鐘叫佢走時都有守諾言，sir完最後一次滑梯就乖乖跟我哋走，唔會好似之前幾次咁嘈到拆天先走到（但艾菲好肯定呢個情況只限今次，因為佢真心覺得自己呢次衰咗要乖返>.<）。



入到太古城，見到勁大杯starbucks，艾菲幫佢影完仲爭住話要幫我哋影添，米高驚佢跌爛艾菲部電話猛話唔好，不過艾菲又覺得總要放手畀佢試吓，否則一世都唔曉，而第一次幫我哋影相嘅燒腩仔，就只係影到我哋對腳囉，事後佢仲要認晒叻咁同我哋講「都話我識影㗎啦，你話係唔係吖」，哇哈哈哈哈...真係笑到艾菲標晒眼水呀﹗