三歲半

Hello! 大家有無掛住我呀？唔知大家有無留意我消失咗半年呢？媽媽話我宜家大個仔，個個月嘅進展都差唔多，所以決定將我嘅出場時間由每個月一次變做每半年一次喎，而啱啱呢個月初我就終於足三歲半啦﹗呢日媽媽除咗買咗個蛋糕同我慶祝，仲專登整咗個全手搓夏威夷pizza畀我，有好多菠蘿同芝士勁好味㗎﹗



呢半年以來我嘅胃口都係差唔多，每餐食一碗飯連餸，有汁撈會搶住食，無就要大人不停提住先識食飯（成日只食餸唔食飯），通常半個鐘內都完成到一餐，唔使媽媽太勞氣，而媽媽最近都頒佈咗個新嘅家規，就係要我幫手洗菜同負責落平台倒廚餘，佢話我大個仔啦喎，唔可以只食唔做，點都要畀返D責任我咁話。



至於瞓覺方面，本身都好正常，每晚九點半上床瞓覺，五分鐘內瞓著然後第二朝瞓到九點幾十點，只係間中半夜會發惡夢喊醒，不過自從媽媽三月初病咗兩星期無陪我瞓，同全面戒晒夜片之後，我個生理時鐘好似有D亂，夜晚十點明明攰到無晒電，大人叫上床瞓覺都唔肯入房要扭一輪先就範，雖然都係五分鐘內瞓著，但就成日凌晨時份話要去洗手間，或者坐喺床到發脾氣大喊尖叫鬧人，至少搞成半個鐘先肯瞓返，有時甚至搞到天光先瞓返，整到爸爸媽媽晚晚都陪我一齊無覺好瞓，嘻...




活動能力係越來越強，早幾個月終於可以一步一級咁落樓梯，亦大膽咗肯爬公園D攀爬架同跨步嘅玩意，踩單車同scooter又控制得越來越好，跑得勁快連大人都追唔到，仲成日喺屋企跳梳化嚇到媽媽死，至於小肌肉都有明顯進步，除咗玩到細lego，開始識用鉸剪，填色都無再好似以前咁出界得咁恐怖。



認知能力繼續強勢，好多嘢一教就記得，特別係我好有興趣嘅地鐵站名同巴士站名，基本上宜家已經認得一半以上嘅地鐵站名（艾菲好無聊咁專登喺地鐵站問職員拎個地圖返來同佢逐個站照字讀>.<） ，至於學校教嘅都跟到，有時會間中爆一個半個英文或普通話出來，聽到媽媽好驚喜。

同同學仔越來越熟，每日返來都有好多嘢同媽媽講，乖嘅唔乖嘅都會講，但被罰就絕口不提（醒到呢...），開始識得照顧人，有好嘢食會分D畀表妹，去飲茶都會特登拎多架車話畀表妹一齊玩，仲同爸爸媽媽講好，來緊會幫手開奶餵妹妹，仲會拎片畀佢換。



自理能力都係咁上下，著衫除衫已經可以全部自己來，媽媽只要拎齊衫褲畀我著就OK，連沖涼都係自己捽梘液，shopping完又會幫手拎袋，識得主動話去洗手間（反而大人逼佢去就會扭唔去囉），喺邊都可以poo poo唔會認地方，基本上戒片咁耐都無出過事。



把口呢就畀媽媽話叻得滯，同大人駁咀講條件已經係等閒事，仲識得大人講D嘢唔啱聽時轉移話題，有時唔夠大人拗時會話「哼﹗我嬲你呀﹗」同「我唔同你XXX呀﹗」，而且多咗講「痴線」，「傻仔」同屎尿屁之類嘅核突嘢（明顯係學校跟同學仔學），媽媽已經不停教化我，但老師都同咗佢話呢D嘢係好難避免，哈哈...



最後又講到情感發展，媽媽話我呢半年都係時好時壞，特別呢排距離妹妹出世嘅日子越近，就更加係超級難搞，成日會為咗D小事喺到大吵大鬧，甚至好多時係擺明無理取鬧，扭唔到想要嘅嘢時仲會郁手郁腳打爸爸媽媽，到大人同我講道理，我就十問九唔應或者直接話「唔想講」，但媽媽話有樣嘢值得一讚嘅係，當佢完全唔理我或者暱入房冷靜時，我會慢慢冷靜落來自己收聲，再主動去同媽媽道歉認錯，唔會好似以前咁喊成粒幾兩粒鐘要大人大聲咆哮先肯停，媽媽就成日話我大個仔，要開始學吓點控制自己嘅情緒，唔好成日搞到家嘈屋閉全家人都唔開心，咁我為咗大家著想即管試吓啦﹗