行路問題＠聯合兒科again

經過兩次物理治療之後，唔經唔覺上星期四就係去聯合覆診嘅日子，好彩呢排公司又開始忙嘅米高請到半日假一齊去，否則得艾菲一個帶住呢排有D失控嘅燒腩仔，都真係有D難搞，唉...

早一日同燒腩仔講要去覆診，提佢會早少少起身食早餐再出門口，點知...佢又未夠鐘就彈起身叫醒全家人（睇來下次唔好話佢知要幾點起身先得>.<），然後緊隨住係明顯唔夠瞓嘅扭扭擰擰，千辛萬苦先食完早餐再著好校服出門口（宜家諗返轉頭，都真係好彩佢係讀下午班，唔係朝朝咁搞法真係會好痛苦）。

由於本身已經預多咗時間畀燒腩仔，所以順利未十點半就到醫院，埋去登記先知原來兒科係十點半先開始（即早到都無用），登記完就可以拎住覆診卡入檢查室度高同磅重，搞掂就出返去大堂到等叫名。

可能我哋早登記，所以都唔算等咗好耐就可以入房見醫生，如果無記錯醫生同上次見個係同一個，入房第一句就話上次抽血個報告無問題，然後就問我哋做完物理治療之後有無信寫返燒腩仔個情況，又或者物理治療師有咩comment，呢吓艾菲有D被問到O咀，乜你哋唔係應該內部有溝通㗎咩？又或者一開file就搵到燒腩仔D料㗎咩？

於是艾菲就嘗試用自己記憶，去覆述返物理治療嗰邊嘅姑娘嘅comment，老實講D嘢細細碎碎咁確係講得有D亂，而醫生就明顯只著眼於燒腩仔係唔係發展遲緩，我哋講咗幾次物理治療嘅姑娘話唔係，佢都keep on問我哋佢係唔係遲緩，仲問我哋燒腩仔喺學校有無咩行為問題，然後艾菲好老實答佢老師有投訴過，但只係一般平常搗蛋行為，之後醫生就dead air咗幾分鐘對住電腦唔知係搵料定做咩。

到醫生再開聲時，佢就同我哋講「咁嘅情況都係keep住物理治療同覆診啦」，然後就叫燒腩仔過去畀佢檢查腳仔，睇完無咩特別就話OK，咁艾菲見搞掂對腳，就順勢再問關於濕疹嘅問題（佢呢排嚴重咗，想睇吓有無得轉睇濕疹專科），醫生就話係無辦法根治，只可以畀藥膏佢搽幫佢舒緩，然後就畀咗份小冊子我哋睇要點做再打發我哋走。

出房後，艾菲同米高就兵分兩路，一個去約期覆診，一個去藥房畀錢交藥單拎濕疹藥膏，眼見個籌號應該有排等，就決定去醫院餐廳食個飯先返轉頭拎藥，點知...明明三年幾前被捉入院時食個焗豬扒飯仲好正常嘅醫院餐廳，原來係一大個伏來，艾菲以為好穩陣咁叫咗個肉餅飯，結果係難食到食咗四分一已經唔想再食落去，失望失望﹗

不過有樣嘢不得不讚賞吓聯合醫院，佢哋原來出咗個app叫出藥一叮，以前拎藥你只可以喺藥房到睇到顯示，宜家可以喺app到查到有得拎未，我哋食完飯check到有藥拎即去返藥房拎藥走人，亦由於時間尚早今次終於唔使飛的走，而係可以慢慢行返出觀塘坐巴士送燒腩仔返學輕鬆D。