健康院產檢（37W）

由於上次覆診時同QE講咗會去仁安開刀，所以好現實地佢哋都將艾菲掟返去健康院跟進就算，而如無意外呢次會係入院前最後一次產檢，加埋一早講明會同艾菲做B鏈檢查，即想縮沙唔去都無藉口。

準時九點就到健康院，比艾菲想像中少人（相比起當年嘅王少清簡直係冷清添啦），但都等咗大半個鐘先有姑娘叫名去磅重量血壓同驗小便，然後一上磅艾菲已經覺得奇怪，點解...仲輕過上星期喺Dr Wong到磅成kg嘅？？？



果然之後見護士長，佢講解完一輪健康院產檢嘅流程後，就同艾菲睇返三星期前喺QE嘅重量，對比之下發現只係重咗0.2kg，即話艾菲重得唔理想，因為正常應該每星期重0.5kg，宜家足足少咗1.3kg，計完數就問艾菲瞓唔瞓到食唔食到同最近有無咩大病壓力咁，又話艾菲要見醫生怕BB豆豬size唔理想，仲主動開咗兩星期嘅materna畀艾菲。

咁艾菲其實唔係好擔心重得唔理想呢個問題，皆因上星期喺Dr Wong到照超聲波時已經睇到BB豆豬size好理想，甚至有D偏大隻添，而且艾菲好懷疑係唔同磅有偏差嘅問題，呢排艾菲日食夜食瘋狂地食，食到只有頂住個胃嘅感覺，完全唔識咩叫肚餓，有咩理由會係不重反輕呢，hehe...

講完重量問題，艾菲都單刀直入問護士長，B鏈個結果會幾時知同點通知，因為一星期後艾菲就會入院開刀，護士長即話一星期就知結果，有問題嘅佢哋會主動電話通知返來跟進，即無電話就無問題，時間剛剛好，Good﹗

見完護士長就輪到見醫生，佢睇到護士長寫低艾菲重唔夠嘅comment，一上床就拎把軟尺同艾菲度肚，結論係BB豆豬嘅size理想，再聽埋心跳都係無問題，循例又係問食唔食到最近有無咩大病咁，繼而順手做埋個B鏈檢查，唔使五分鐘已經搞掂晒。

跟手艾菲又多口問多次B鏈個結果幾時知，今次醫生就話一星期左右，要等兩星期後覆診先會講返畀艾菲知，如果想提早知要去登記處填表申請拎報告，如是者艾菲出返去約期同拎返D文件時就問職員拎表填，但D staff話要等醫生簽名所以至少兩星期先有得拎報告，而且佢哋係唔會電話講結果艾菲知，一定要再約期返來睇先知...哇﹗真係各有各說法，亂到艾菲都唔知應該聽邊個講好﹗

不過冷靜落來後，艾菲係偏向信護士長嘅說法，唔係因為佢個答案最啱聽，而係根據過往喺政府睇醫生嘅經驗，無事無幹佢哋係唔會緊張，但報告返來唔合格實九秒九通知，誓要搵到你出來跟進先得，再加上艾菲係開刀生，即呢個星期無任何意外的話，真係唔需要太擔心個檢查結果。

搞掂晒已經差唔多十二點，既然大家都話艾菲唔夠重，咁艾菲唯有喺最後呢個星期，繼續努力食多D放肆D啦，先去健康院附近街市一間都幾出名嘅小店食碗足料咸肉金邊粉，再喺屋企樓下東海堂買返杯抹茶紅豆來飲，夠晒飽肚肥膩啦，kakaka...