健康院產檢（37W）

由於上次覆診時同QE講咗會去仁安開刀，所以好現實地佢哋都將艾菲掟返去健康院跟進就算，而如無意外呢次會係入院前最後一次產檢，加埋一早講明會同艾菲做B鏈檢查，即想縮沙唔去都無藉口。

準時九點就到健康院，比艾菲想像中少人（相比起當年嘅王少清簡直係冷清添啦），但都等咗大半個鐘先有姑娘叫名去磅重量血壓同驗小便，然後一上磅艾菲已經覺得奇怪，點解...仲輕過上星期喺Dr Wong到磅成kg嘅？？？



果然之後見護士長，佢講解完一輪健康院產檢嘅流程後，就同艾菲睇返三星期前喺QE嘅重量，對比之下發現只係重咗0.2kg，即話艾菲重得唔理想，因為正常應該每星期重0.5kg，宜家足足少咗1.3kg，計完數就問艾菲瞓唔瞓到食唔食到同最近有無咩大病壓力咁，又話艾菲要見醫生怕BB豆豬size唔理想，仲主動開咗兩星期嘅materna畀艾菲。

咁艾菲其實唔係好擔心重得唔理想呢個問題，皆因上星期喺Dr Wong到照超聲波時已經睇到BB豆豬size好理想，甚至有D偏大隻添，而且艾菲好懷疑係唔同磅有偏差嘅問題，呢排艾菲日食夜食瘋狂地食，食到只有頂住個胃嘅感覺，完全唔識咩叫肚餓，有咩理由會係不重反輕呢，hehe...

講完重量問題，艾菲都單刀直入問護士長，B鏈個結果會幾時知同點通知，因為一星期後艾菲就會入院開刀，護士長即話一星期就知結果，有問題嘅佢哋會主動電話通知返來跟進，即無電話就無問題，時間剛剛好，Good﹗

Blog Blog BB Gathering之Welcome Mrs Wu

由當初寫blog諗住記低結婚時D濕星嘢，到有咗燒腩仔開始寫關於佢嘅嘢，慢慢喺到識到好多志同道合嘅媽媽，其中一個blogger媽咪叫做Mrs Wu，人在美國但心繫我哋一班香港blogger媽咪，記得幾個月前佢話會返來香港，艾菲知道之後係勁興奮，不過由於時間好接近BB豆豬出世嘅日子，所以都唔知自己有無緣同佢見一面，好彩最後天時地利人和都好配合，喺小檬媽嘅安排吓我哋一班blog blog BB一齊同Mrs Wu搞咗個歡迎會﹗

其實出發前見到又大驟雨又得自己一個單拖帶住燒腩仔，都有諗過打退堂鼓縮沙㗎，但為咗Mrs Wu真係豁出去，今次唔見唔知幾時有得見，而且燒腩仔都好想同小朋友玩（早兩星期妹豬媽喺放學時同佢提過後，佢就不停話自己星期日約咗妹豬同小檬出來玩 :P），來緊BB豆豬出世後都要一段時間先可以同佢出去玩，所以要好好珍惜宜家只得我哋兩母子拍拖嘅時光。



由於預錯咗時間，結果我哋遲咗少少先到，去到燒腩仔有D未warm up唔知點咁，又唔叫人又唔願玩唔願食，好彩有小檬媽第一時間幫艾菲帶咗佢去搵食同玩，之後仲同佢玩鬥唔笑同整古靈精怪樣，佢先好返DD，重點係鬥唔笑呢個game超work，當佢返到屋企扭食糖時，艾菲就同佢玩呢個game，輪咗畀艾菲就要佢做完功課先准食同換咗做DHA軟糖，呵呵呵...



見燒腩仔OK之後，艾菲就好放心咁由佢自己四圍玩，媽媽有媽媽四圍傾偈同撩小朋友玩，燒腩仔就同車迷南瓜仔同一仔一齊玩車自成一角。

肥妹仔？（36W）

去完QE見醫生後，話咁快又過咗兩個星期，上星期三我哋又去咗搵Dr Wong，都係米高放半日（本來話請唔到假㗎，好彩最後都請到），同艾菲一齊去接燒腩仔放學，再出發去尖沙咀。

星期三嘅診所，又係冷冷清清咁唔使點等（點解我哋咁遲先發現呢樣嘢），入去照例登記量血壓磅重驗小便，今次血壓小便都正常，上磅發現比三星期前重多咗一磅，即到目前為止只係重咗14磅左右，至於肚圍係無任何進展繼續37寸半，甚至朝早空肚度係跌返落36寸（最近撞到燒腩仔N班同學仔媽咪，都係話艾菲個肚似得五六個月大>.<），最值得一讚係肚皮力保不實keep住零肚紋，Good﹗

登記完問姑娘話等多一個就到艾菲，果然去完洗手間返來已經入得房，Dr Wong繼續循例先問近況，主打係想知艾菲有無肚痛怕艾菲隨時生，佢都提醒艾菲要開始留意有無作動徵兆，宜家已經36W，有咩風吹草動就要入院提早拎BB豆豬出來，仲話如果已經係陣痛子宮頸開咗的話分分鐘要轉返做順產添，不過佢話通常生前幾日D胎動會開始少咗，如果佢依然活躍都唔使太擔心，又建議艾菲呢排行少D，望BB豆豬生生性性等到開刀之日。

問完近況，Dr Wong就轉返去認真mode，拎咗張單張出來講手術嘅過程同風險，傷口會開返上次同一個位，預計時間要半個鐘至四十五分鐘（會比第一次開刀耐），手術前一晚要入院同禁食（即五日五夜），手術後要六個鐘先可以食粥水，到第二朝就可以正常飲食同落床，至於艾菲最擔心嘅宮縮問題（有幾個朋友都話第二胎會痛得勁D），Dr Wong就話只要落夠止痛藥就唔會痛，叫艾菲唔使太擔心同記得痛要出聲。

之後我哋就埋位照超聲波見吓BB豆豬啦，今次Dr Wong都特登check晒四圍嘅胎水足唔足夠，再睇埋胎盤確保無鈣化嘅跡象，然後聽心跳時BB豆豬好唔合作咁不停郁，搞到甩咗兩次先度到，連Dr Wong都話佢果然好活躍:P，至於size呢，頭仔係35W，肚仔係37W，腳仔嘅差距終於拉近咗，但都已經37W5D，平均係37W，已經有6點幾磅，預計過多兩星期應該有七磅，算係大隻B啦﹗

睇完size，Dr Wong就嘗試畀我哋睇吓BB豆豬個樣，今次佢終於無用手遮住塊面，不過由於入面都應該好逼，加上器材關係，所以唔算睇得好清楚，只係見到鼻同咀，眼係完全睇唔清，唯有等見真人先知似邊個（女，你至少都遺傳返媽媽嘅雙眼皮大眼睛可以嗎？），然後Dr Wong好搞笑地睇睇吓喺到偷笑，話BB豆豬塊面好多肉幾好肉地咁，不過都補充一句唔排除只係水腫要等佢出咗來收埋水先可以作實，搞到艾菲越來越期待見呢個肥妹仔呀，哈哈...

照完超聲波，Dr Wong都有問QE嗰邊有無再約覆診，當佢知艾菲今個星期會去健康院做檢查時，就話唔使再返診所呢邊覆診，直接下星期去醫院見就得，然後艾菲都順便問埋B鏈嘅問題，Dr Wong有話37W先喺健康院做有D危，因為一般要等一星期先知結果，不過都話兒科醫生知艾菲開刀無穿水唔經產道生的話，應該唔會太擔心呢樣嘢，well...唯有到時再問問健康院嗰邊幾時有結果同點通知啦（因驗完一星期後都入院啦...）。

臨走前同Dr Wong傾開，佢都有提我哋到時要留意燒腩仔情緒，佢話宜家無謂講太多佢聽，最緊要安排佢到時去醫院見艾菲同BB豆豬，等艾菲可以陪吓佢唔好覺得唔見咗媽媽，而艾菲都好記得佢當年教過，話返到屋企除咗餵奶之外，盡量就唔好理個細只陪個大，希望呢招到實際應運起上來時係work啦，皆因佢宜家D情緒已經開始唔穩定，只可以寄望佢見到BB豆豬真人時會慢慢接受。

見完醫生，出返去等埋封入院信我哋就走得啦，不過艾菲同米高都有同樣嘅疑問，就係點解呢邊每次收錢都咁慢，米高話出來時聽到Dr Wong話趕住走，叫姑娘快D叫下個入去，即我哋封信明明已經搞掂咗好耐，最終都要等成大半個鐘先有得拎（仲要今日診所勁少人喎），就算平日無藥無信只係正常找數，都要等差唔多時間（燒腩仔好多時就係呢個位頂唔住失控），呢樣嘢相比仁安嗰邊真係差好遠呀﹗

Maternity Photo（35 Week）

影唔影大肚相，係陀BB豆豬之後一直諗嘅問題，上一次陀燒腩仔真係無諗過影，只係臨生前喺屋企自拍咗一張當留念就算，不過今次應該係人生中最後一次有BB，再加上睇返當年除咗同事捉住影嗰幾張之外，真係搵張稍為見到個肚嘅相都無（艾菲本身唔鐘意上鏡），個心就更加想趁今次影返D相來留念，不過要本身都唔多鐘意影相嘅米高，同唔知合唔合作嘅燒腩仔配合艾菲，感覺猶如倒錢落海賭大細咁，而且明知呢段時間係米高公司嘅peak season，未到最後一刻佢都唔會答到艾菲幾時得閒影相，如是者拖吓拖吓艾菲就無刻意去搵人影相，只係盤算住有時間就即管試吓自己影。

然後唔覺唔覺已經來到三十五周，米高喺上星期初忽然話呢個weekend會得閒D，艾菲當然把握時間捉佢哋兩父子去影相，亦好好彩落咗成個星期雨後，到星期六終於出太陽，所以我哋呢朝同燒腩仔上完學校興趣班，返屋企食飯換好衫就即刻拎齊嘢出發啦﹗



燒腩仔：妹妹，你鐘意食咩味嘅糖呀？（真實對白，kakaka...）



睇返全部相，最滿意係呢張，感覺最自然 :P

行路問題＠聯合兒科again

經過兩次物理治療之後，唔經唔覺上星期四就係去聯合覆診嘅日子，好彩呢排公司又開始忙嘅米高請到半日假一齊去，否則得艾菲一個帶住呢排有D失控嘅燒腩仔，都真係有D難搞，唉...

早一日同燒腩仔講要去覆診，提佢會早少少起身食早餐再出門口，點知...佢又未夠鐘就彈起身叫醒全家人（睇來下次唔好話佢知要幾點起身先得>.<），然後緊隨住係明顯唔夠瞓嘅扭扭擰擰，千辛萬苦先食完早餐再著好校服出門口（宜家諗返轉頭，都真係好彩佢係讀下午班，唔係朝朝咁搞法真係會好痛苦）。

由於本身已經預多咗時間畀燒腩仔，所以順利未十點半就到醫院，埋去登記先知原來兒科係十點半先開始（即早到都無用），登記完就可以拎住覆診卡入檢查室度高同磅重，搞掂就出返去大堂到等叫名。

可能我哋早登記，所以都唔算等咗好耐就可以入房見醫生，如果無記錯醫生同上次見個係同一個，入房第一句就話上次抽血個報告無問題，然後就問我哋做完物理治療之後有無信寫返燒腩仔個情況，又或者物理治療師有咩comment，呢吓艾菲有D被問到O咀，乜你哋唔係應該內部有溝通㗎咩？又或者一開file就搵到燒腩仔D料㗎咩？

於是艾菲就嘗試用自己記憶，去覆述返物理治療嗰邊嘅姑娘嘅comment，老實講D嘢細細碎碎咁確係講得有D亂，而醫生就明顯只著眼於燒腩仔係唔係發展遲緩，我哋講咗幾次物理治療嘅姑娘話唔係，佢都keep on問我哋佢係唔係遲緩，仲問我哋燒腩仔喺學校有無咩行為問題，然後艾菲好老實答佢老師有投訴過，但只係一般平常搗蛋行為，之後醫生就dead air咗幾分鐘對住電腦唔知係搵料定做咩。

到醫生再開聲時，佢就同我哋講「咁嘅情況都係keep住物理治療同覆診啦」，然後就叫燒腩仔過去畀佢檢查腳仔，睇完無咩特別就話OK，咁艾菲見搞掂對腳，就順勢再問關於濕疹嘅問題（佢呢排嚴重咗，想睇吓有無得轉睇濕疹專科），醫生就話係無辦法根治，只可以畀藥膏佢搽幫佢舒緩，然後就畀咗份小冊子我哋睇要點做再打發我哋走。

出房後，艾菲同米高就兵分兩路，一個去約期覆診，一個去藥房畀錢交藥單拎濕疹藥膏，眼見個籌號應該有排等，就決定去醫院餐廳食個飯先返轉頭拎藥，點知...明明三年幾前被捉入院時食個焗豬扒飯仲好正常嘅醫院餐廳，原來係一大個伏來，艾菲以為好穩陣咁叫咗個肉餅飯，結果係難食到食咗四分一已經唔想再食落去，失望失望﹗

不過有樣嘢不得不讚賞吓聯合醫院，佢哋原來出咗個app叫出藥一叮，以前拎藥你只可以喺藥房到睇到顯示，宜家可以喺app到查到有得拎未，我哋食完飯check到有藥拎即去返藥房拎藥走人，亦由於時間尚早今次終於唔使飛的走，而係可以慢慢行返出觀塘坐巴士送燒腩仔返學輕鬆D。

三歲半

Hello! 大家有無掛住我呀？唔知大家有無留意我消失咗半年呢？媽媽話我宜家大個仔，個個月嘅進展都差唔多，所以決定將我嘅出場時間由每個月一次變做每半年一次喎，而啱啱呢個月初我就終於足三歲半啦﹗呢日媽媽除咗買咗個蛋糕同我慶祝，仲專登整咗個全手搓夏威夷pizza畀我，有好多菠蘿同芝士勁好味㗎﹗



呢半年以來我嘅胃口都係差唔多，每餐食一碗飯連餸，有汁撈會搶住食，無就要大人不停提住先識食飯（成日只食餸唔食飯），通常半個鐘內都完成到一餐，唔使媽媽太勞氣，而媽媽最近都頒佈咗個新嘅家規，就係要我幫手洗菜同負責落平台倒廚餘，佢話我大個仔啦喎，唔可以只食唔做，點都要畀返D責任我咁話。



至於瞓覺方面，本身都好正常，每晚九點半上床瞓覺，五分鐘內瞓著然後第二朝瞓到九點幾十點，只係間中半夜會發惡夢喊醒，不過自從媽媽三月初病咗兩星期無陪我瞓，同全面戒晒夜片之後，我個生理時鐘好似有D亂，夜晚十點明明攰到無晒電，大人叫上床瞓覺都唔肯入房要扭一輪先就範，雖然都係五分鐘內瞓著，但就成日凌晨時份話要去洗手間，或者坐喺床到發脾氣大喊尖叫鬧人，至少搞成半個鐘先肯瞓返，有時甚至搞到天光先瞓返，整到爸爸媽媽晚晚都陪我一齊無覺好瞓，嘻...

QE見醫生第二回（34W）

由於上次艾菲無答實到底會喺QE生還是仁安生，所以醫生就安排艾菲喺34W嘅時候去覆一次診，然後早一星期又收到QE電話，通知姑娘想喺艾菲見醫生前，安排一次單獨傾談講返有關餵人奶嘅事，要艾菲早少少去登記。

試過上次等到頸都長嘅經歷，艾菲今次無叫米高陪診，照例去到就自己埋位驗小便，量血壓同磅重， 然後乖乖坐喺長凳到呆坐呆等，然後個幾鐘後終於聽到叫名有份入健康教育室，今次姑娘主講嘅topic就係一早預告嘅餵人奶。

艾菲真心好鐘意QE對餵人奶嘅支持同熱心，短短十幾分鐘嘅講解入面，姑娘大概教咗餵人奶姿勢，點樣引BB打開口點樣擠出來都有教，又教媽媽點樣分BB食得夠唔夠，雖則艾菲上一胎都餵過，聽完之後絕對有溫故知新嘅感覺。

之後姑娘就逐一叫名出去傾返對餵人奶嘅疑問，在艾菲來講最重要當然係問點預防乳腺炎，姑娘好好心機咁問返艾菲上一胎嘅失敗經驗，再分析返點樣可以解決當中嘅問題，姑娘聽完艾菲個case都笑艾菲太勤力，亦指佢哋嘅宣傳同教育多數係針對窮媽媽，所以艾菲呢個富媽媽當年新手咩都唔識照做就中晒招（例如不停熱敷同不停泵）。

綜合返姑娘嘅意見係艾菲本身已經多奶，所以今次生完之後切忌勤力泵，餵完即凍敷谷都唔好特別泵出來，等大腦自行調節返個奶量，足夠就好唔使貪心，亦提醒艾菲到時要勤力換乳墊同胸圍，因為細菌最鐘意有營養嘅人奶，萬一唔小心畀BB咬損少少，咁啱D乳墊或胸圍又唔乾淨，就會畀D細菌有機可剩﹗

而姑娘亦好好咁介紹咗佢哋嘅母乳育嬰診所畀艾菲，佢話呢到有全港最好嘅母乳專家「咩胸都搞得掂」，到時有咩搞唔掂打電話過去約就OK，就算唔係QE生都可以照去（係for全港媽媽），完全解決咗艾菲當年搵醫生只係識開抗生素畀你打細菌，去到健康院姑娘又未必得閒幫你通，或者教D方法試完都唔work，搞到你唔知點算嘅無助。

咁當然啦，姑娘都話艾菲有過咁慘痛嘅經驗，今次一定會好小心好小心，有咩風吹草動就即時醒水知要點做，宜家只求BB豆豬出世後，能夠好好同艾菲配合成為最佳拍檔，佢肯乖乖埋身飲奶艾菲以後出街就可以一條餵奶巾走天涯啦﹗ 嘻...

見完姑娘出來已經十二點半，好神奇地大堂D人轉眼就走得七七八八（差不多到食飯時間效率特別高），然後等咗唔使五分鐘已經叫名到艾菲入房見醫生，今次係個年紀大少少嘅女醫生，但相對上次個後生女醫生，態度真係nice好多，至少笑容滿面又會主動講早晨先啦，然後佢摸吓艾菲個肚就話胎位適中，再聽心跳話BB豆豬一切正常。

做完基本檢查艾菲就落返床埋位同醫生傾，佢最關注當然係艾菲決定去邊到生，今次艾菲都好firm咁同佢講會去仁安開刀，然後佢就話宜家BB一切正常，下次可以去健康院檢查順便做埋B鏈，但艾菲個file唔係即close嘅，如果期間真係有咩緊急事，艾菲都可以拎住之前張入院卡直接去QE婦產科入院。

見完醫生，醫生就畀晒成個排板艾菲，再拎過隔離護士房揀健康院同約期，咁既然要返健康院，艾菲當然揀返自己區嘅健康院啦，至少唔使再舟車勞動先嘛，然後約好37W過去，根據經驗B鏈結果有問題的話應該幾日就知，而且艾菲遲一星期都入院開刀，反正BB豆豬都唔會經產道出世，個結果其實都唔多重要啦﹗ 

住家男包水餃

復活節紅假過後，燒腩仔仲有成個星期先返學，艾菲宜家個肚開始大，加上佢又成日失控，艾菲都唔太敢單拖帶佢去太遠嘅地方玩，頂多落吓樓下平台踩scooter同返娘家搵公公婆婆算，但日日困喺屋企你眼望我眼都唔係辦法，總要搵D嘢來消耗吓佢D精力，然後艾菲就諗到不如同佢一齊包水餃。

艾菲自小就特別鐘意食餃子，無論係日式韓式煎餃還是傳統水餃都好，高峰期可以一口氣食一打落肚，但要艾菲自己包真係唔太曉（一諗起點包到靚一靚就無信心），只係早幾年喺$12店買咗個餃子模後試過一次咁大把，之後都係貪方便寧願買急凍餃子返來食算。



今次要同燒腩仔一齊包水餃，艾菲一朝早就準備好餡料，再預咗成個下午畀佢慢慢玩，點知所有嘢準備好晒之後，先發現米高早幾日幫手買落嘅水餃皮變壞咗唔用得，唯有拿拿臨自己開麵包機同壓麵機整，但第一次自己整水餃皮落得太多水好黏手，搞到旁晚時份先完成到D水餃皮，為咗慳返D時間，本身想叫燒腩仔幫手包幾隻玩吓就算，點知佢真係一個又為食又鐘意自己整嘢食嘅住家男來（佢之前同艾菲講到五歲時要煎蛋畀艾菲食），一叫佢埋位即好認真咁整，堅持要幫艾菲筆餡直至完成為止。

咁艾菲講咗咁耐，到底D燒腩牌水餸係點來呢？好﹗即刻去相﹗



首先要將塊水餃皮放上個餃子模到，輕輕力用手指喺中間篤個碗型出來。

confirm開刀日子（33W）

同燒腩仔做完物理治療之後，緊接住就係艾菲去Dr Wong到覆診（專登約埋同一日等米高請少D假），而喺覆診前我哋先過對面仁安分科診所交按金hold床位，搞掂之後職員畀咗一大堆資料艾菲，其中仲有呢隻熊仔連DVD，哈...乜原來宜家落訂有嘢送㗎，都幾搞笑喎。

過到去Dr Wong嗰邊診所，平日星期一坐無虛席嘅大堂，呢日星期三居然只得小貓三四隻，連米高都話個反差點解會咁大，登記後照例量血壓磅重同驗小便，全部都pass無問題，而艾菲嘅體重今次終於有上升啦，但都只係由重12磅升到13磅，唔...肚圍都有大咗...半...寸...㗎，由37寸漲到37寸半囉。

真心艾菲都好奇怪點解今次可以keep得咁好（呢排已經勁放肆乜都食啦喎），身邊個個都話陀第二胎會肥得勁D嘛，最近睇返三年幾前陀燒腩仔時影嘅相，先覺得想當年水腫得幾勁（上胎好似重咗廿磅，不過已經唔算肥，生完唔使特登減就著得返之前D衫褲），相比宜家真係好fit呢，莫非湊燒腩仔所消耗嘅能量真係有咁大（今次係無做過運動連散步都少）？kakaka...

登記時問姑娘話要等兩個先到艾菲，等艾菲仲拎咗粒珍寶珠出來塞住燒腩仔把口（因為唔記得帶車畀佢玩>.<），點知先啱啱去完洗手間返來坐低就叫艾菲名入房，搞到燒腩仔畀Dr Wong笑佢每次都係食住嘢入房（上次食朱古力食到成手都係:P）。

行路問題＠第二次物理治療

上次物理治療後，艾菲足足病咗兩個幾星期，喺無王管嘅情況下，燒腩仔當然係無乜練習到姑娘叫佢做嘅雙腳跳，單腳跳同拋波動作啦，不過艾菲好返後眼見覆診期越來越逼近，都間中會捉佢練吓，只係呢個小朋友每次都會推三推四，一句做唔到或者唔想做就剩機走人，搞到艾菲勁無奈。

我哋上星期三，又一家三口準時出現喺物理治療嘅房門外，姑娘一見到我哋就叫燒腩仔入去玩住先，有得玩燒腩仔當然勁hyper，不停拎住個健身大波波推上滑梯再推落來，無耐之後有多個應該大燒腩仔少少嘅男仔都來咗，兩個有樣學樣咁一齊玩，笑到咔咔聲超級嘈。

大概十分鐘後，姑娘就帶住個大過佢哋一年左右嘅姐姐，叫佢哋跟姐姐做叉腰單腳跳同掟波嘅動作，艾菲幾欣常姑娘用呢個同輩嘅方式來教佢哋，可惜燒腩仔之前實在玩得太high，所以係完全無理姑娘，繼續四圍走唔受控（唉...佢返學都係有呢個問題，一玩得癲就收唔返成日唔正經唔聽指令）。

之後姐姐行開做其他練習，姑娘就拎咗個雪糕筒同柱，整咗個矮欄畀佢哋兩個男仔雙腳跳過去，要求佢哋雙腳落地，燒腩仔搞咗好耐先肯認真跳幾吓，其餘時間都係橫衝直撞亂咁來，其實艾菲知佢做得到，偏偏佢就係唔正經唔冷靜，好彩姑娘都理解有幫手勸吓佢。

跳完欄姑娘就叫佢哋唔用扶手直接行樓梯上落，再試吓喺樓梯級到跳落地，跟住就拎咗一大籃豆袋，要求佢哋先將豆袋放腳面，然後用腳踢個豆袋入籃（練習單腳企嘅動作），又係明知燒腩仔做到，佢就玩到癲晒猛用手掟入籃算，終於逼到姑娘要大聲渴佢一聲佢先聽話（真係犯賤）。

最後姑娘好醒咁搵個幾乎高過燒腩仔嘅軟墊隧道套喺個彈床上，再捉燒腩仔入去跳，要佢跳足十分鐘先放佢走，把口好叻嘅燒腩仔當然不停同姑娘講數，keep住話「夠鐘啦」同「跳夠啦」，要姑娘兇佢唔跳要加時先好少少。

事後同姑娘傾返，佢都話畀佢同朋輩一齊上堂，佢會積極少少做多咗動作，但又變咗好似玩咁唔太認真，總結返今次嘅表現，佢雙腳跳係勉強叫做有進步，單腳跳就仲未OK，不過姑娘話三歲半唔使急，而且相對另一個男仔，佢單腳跳時pat pat識得固定先郁，平衡已經算係好，唔使太擔心進度，返屋企如常練習就可以。

同姑娘約定今個月尾再返來覆診後我哋就走（呢到嘅姑娘會就返小朋友同家長時間去約期，佢知艾菲五月頭生所以專登畀呢個期我哋），而放咗成個鐘電嘅燒腩仔亦終於出現疲態，其實出發前艾菲已經同佢講過要聽姑娘指令，仲帶定零食同糖去氹佢，但觀乎佢今次嘅表現，下次艾菲單拖帶佢去覆診前，一定要再認真少少同佢傾吓先得。

難得自由

講完復活節紅假嘅豐富節目之後，艾菲忽然醒起燒腩仔放假前一日嘅難得自由日原來無記低，又拿拿聲寫返先﹗

自從前年南丫島出走兩日一夜後，艾菲同一班好姊妹就約定，耐唔耐要拋夫棄子全女班咁約出來食個飯見個面（之前次次出親來都一家大細，真係想傾得深入D都唔得），但大家都明艾菲生完BB豆豬，短期內好難再咁樣約出來見，所以特別約咗呢晚出來食飯，而貼心嘅米高為咗等艾菲可以早D出門，就特登請咗半日假返來湊燒腩仔，仲話自己可以順便出trip前抖抖兼執行李，等艾菲無得反對佢呢個安排。

點知...突如其來嘅一個意外，早一日米高whatsapp過來話個trip臨時取消咗，佢把口話就話自己都唔係好想去，實情係佢一早plan咗過到日本點樣偷時間去食好嘢同shopping，話唔失望就肯定係假嘅，於是艾菲就決定做好老婆氹返個老公，約咗佢呢個下午等燒腩仔返學後，去拍拖歎返個平民high tea。



呢間喺油塘大本型嘅Spade，係艾菲之前喺新假期嘅facebook page到見到，$39一個小龍蝦牛角包，同$99 High Tea Set連兩杯飲品（假日就要$149），好似好吸引咁就mark低咗，我哋呢日來到都仲未夠兩點，為免餓親大家就先叫個小龍蝦牛角包來share食，唔...都幾好味喎﹗

再闖葛量洪號滅火輪

復活節紅假最後一日，眼見天氣咁好真係連抖都唔捨得抖，一早瞓醒做好家務又準備出發去玩，今次目的地係暑假時去到撞正休息日無得入去嘅葛量洪號滅火輪，九龍人難得過海來到西灣河，出發前去太安樓掃街食雞蛋仔是常識吧，再貪得意試埋隔離個韓式炸雞，不過兩樣都係味道一般，尤其雞蛋仔無以前食咁香口。



食飽我哋就向住海邊慢慢行過去，一家人沿路睇吓花睇吓海欣賞吓風景，真係幾寫意幾舒服㗎，行咗大概十五分鐘左右就見到大大架滅火輪。

探路＠觀塘海濱長廊

復活節假第三日，繼續天氣好到不得了嘅一日，但呢朝有個特別任務在身唔可以出去玩住，就係同燒腩仔剪頭髮，睇見佢畀D頭髮搞到好痕，日R夜R兩邊耳背同頸都損晒流晒血，艾菲真係唔敢再拖到四月先剪，而呢一剪都應該係BB豆豬出世前嘅最後一剪，所以艾菲落手比較狠，但求個頭可以keep到六月艾菲坐完月先再剪。

剪完頭髮同米高夾手夾腳清理好案發現場，中午食飽飯就決定帶燒腩仔出去放吓電兼影吓相，艾菲實在太耐無同佢去公園影相啦，然後喺佐敦谷同觀塘海濱之間，我哋揀咗後者以為會無咁多人，順便為之後可能會自己幫自己影嘅大肚相探探路同試吓位。



由於呢個小朋友，聽到有得去公園玩都仲慢吞吞，扭擰一輪先出到門口，為怕錯過咗最靚嘅夕陽光線，所以艾菲今次唔畀佢去感官花園玩住，一來就同佢行海邊先，不過近觀塘碼頭呢邊，係一如以往咁多人，想影張主角肯笑而背景無腳嘅相，實在有D難度。