Day 1 8/10/2014
由於燒腩仔係遲開學，佢無得好似其他同學仔咁有三日適應畀家長陪住上堂，但學校本書仔明明話艾菲第一日都可以陪佢上堂，等艾菲仲叫米高唔好拎假接放學（因為有艾菲陪燒腩仔實無事），點知開學前一日佢嘅班主任先打來，問艾菲可唔可以唔跟上堂，擔心艾菲嘅出現會影響其他啱啱適應咗返學嘅同學仔情緒，問心就梗係有D失望啦，無得入去了解吓燒腩仔嘅上堂情況，不過為咗配合學校艾菲都應承咗。
經過一個月嘅催眠，終於都來到正式開學呢日，艾菲一問去到學校要點，燒腩仔已經識背個model answer「bye bye媽媽」，然後我哋成朝都好期待，食完lunch就拿拿聲換衫影校服相，再出門口返學，去到學校門口燒腩仔已經get到要入去，但感覺佢仲未係好知發生咩事咁，然後正式分離嘅一刻到啦，艾菲起初以為燒腩仔會唔肯入去，不過佢除咗唔鐘意枝探熱槍之外都無再扭，好乖咁跟老師入咗學校，坐喺到等換鞋時仲識得笑住同艾菲揮手bye bye添，反而其他同學仔一到學校門口就喊到死去活來咁，場面超級爆笑﹗
放低燒腩仔艾菲就拿拿聲返屋企做家務，夠鐘就又拿拿聲撲返學校接放學，燒腩仔頭幾日都只係返兩個鐘，扣埋一來一回嘅時間艾菲實際上只得一個鐘空檔，咁樣撲來撲去都真係幾攰同幾趕，但為咗個仔艾菲都知要堅持落去，好彩一入到學校門口校長就主動同艾菲講燒腩仔表現好穩定，只係間中諗起我哋，又或者見其他同學仔喊得好勁時會跟住喊，但老師氹吓安撫吓都肯收聲，聽到呢到艾菲唔知點解忍唔住眼濕濕起來，真係覺得自己個仔好叻仔，即刻覺得放心晒﹗
Day 2 9/10/2014
呢日米高專登請咗假陪艾菲同燒腩仔，有爸爸陪住我哋好準時咁就去到學校，亦都係好順利咁就入咗學校，臨入去前佢仲好乖咁錫咗艾菲一啖先走，等艾菲可以安心同米高去拍兩個鐘拖，我哋去咗展貿subway tea，咁啱有馬拉松開倉又忍唔住手掃咗一人一對波鞋，hehe...
夠鐘就返學校接放學，今日燒腩仔班主任無跟住出來，只係學校書記幫手帶燒腩仔出來，佢話燒腩仔今日上堂時已經無乜點喊，相比起打開班房門口聽到嘅強勁喊聲，書記都忍唔住讚佢表現好過好多返咗成個月學嘅同學仔。
Day 3 10/10/2014
朝早叫燒腩仔起身時已經發現佢有D唔對路，成朝呆呆滯滯咁扒喺地下到玩車唔起身，到食飯又食到誓願咁，正當艾菲為咗佢唔肯食飯開始著火時，佢忽然er一聲就嘔到成個餐盤都係，燒腩仔由出世到宜家都只係嘔過一次奶，對於佢呢個突如期來嘅嘔艾菲真係打咗個突，除咗要立即清理現場之外仲要即刻打畀米高同燒腩仔婆婆問吓仲應唔應該返學。
燒腩仔嘔完之後，個人即刻精神晒，同佢探熱又無燒，燒腩仔婆婆同米高都一致覺得佢只係食滯咗，嘔完應該無事可以返學，咁艾菲唯有如常同佢換衫返學，點知佢著鞋時又再嘔多次，好彩艾菲意識到佢想嘔，即刻將佢個人推向前先無整污糟套校服，再問米高同燒腩仔婆婆都堅持嘔完無事，艾菲唯有繼續同佢出門口返學。
行去學校期間已經不停扭艾菲抱，艾菲見佢唔舒服都有抱咗陣，然後畀老師拖入學校時就開始爆喊，艾菲都同老師講定佢今日唔舒服可能會比較扭，老師答應會特別留意，點知艾菲返到屋企無耐就接到老師電話，話燒腩仔keep住喊，仲玩玩吓車時賴咗poo poo，估佢真係好唔舒服叫艾菲提早接佢放學，咁艾菲唯有拿拿聲搞掂D嘢就趕返學校接佢。
燒腩仔由課室行出來，一見到艾菲就喊得再大聲D，艾菲見到真係有D後悔帶咗佢返學，不過都有樣開心就係書記同返艾菲講，讚燒腩仔好叻poo poo咗喺車到識主動同老師講，之後燒腩仔就全程樹熊上身要艾菲抱仲要唔畀坐，就算帶佢返去婆婆到睇醫生，婆婆想幫吓手抱佢都唔畀，搞到艾菲對手軟晒咁滯。
睇完醫生話佢腸胃炎，要戒口只可以食白粥同麵包，艾菲廢事佢食到悶就喺第二日整咗卡通多士來氹佢，亦好好彩病發呢日係星期五，之後有兩日weekend假期隔離休息，佢星期日朝微燒多半日就完全康復，難為艾菲同米高，仲有燒腩仔姨媽姨丈之後都相繼中招，果然小朋友嘅病菌係特別惡毒﹗
Day 4 13/10/2014
經過一日嘅觀察，艾菲好肯定燒腩仔已經完全康復，而佢抖咗兩日之後都好似食咗電芯咁充滿能量，艾菲朝早問咗佢幾次返唔返學，佢都搶住答「返」同「bye bye媽媽」，見佢都OK就決定如常返學，而呢個小朋友就由出門口一刻hyper到放學返屋企，睇佢D腳步就feel到佢好想返學，除咗入學校前望住爆喊中嘅同學仔呆咗幾秒，之後都無嘢照跟老師入學校。
因為係假期後第一日返學，老師安排燒腩仔繼續返兩個鐘，艾菲準時去到學校就見到好多學生企晒喺學校出面，埋到去先知佢哋練緊走火警，而暱咗喺人群中嘅燒腩仔都好乖咁跟老師指示企定定無走開，但見到艾菲就即刻難掩興奮心情喺到笑，老師話佢呢日上堂完全無喊情緒OK，仲識得叫老師幫佢開水樽添，所以聽日開始可以返足三個鐘啦﹗
Day 5 14/10/2014
正當艾菲滿心歡喜，以為燒腩仔會越戰越勇時，估唔到佢就喺正式返足三個鐘嘅呢日，一去到學校門口就爆喊話唔入去，起初艾菲以為佢只係貪玩跟同學仔風一齊喊，所以只係安撫幾句就將佢交畀老師，然後放學時老師話佢呢日斷斷續續咁都有喊，直至食茶點先收聲回復正常，仲擔心佢係唔係邊到唔舒服，咁艾菲都意識到佢應該係正式來料，過咗啱啱返學嘅蜜月期開始明白返學係咩，所以艾菲返到屋企就要同佢傾偈，話佢知艾菲一定會接佢放學等佢安心。
沒有留言:
張貼留言