Mini生日會~拆禮物

上回講到食完生日蛋糕，跟住就到拆生日禮物嘅環節啦﹗



大家都好錫燒腩仔，除咗生日利是之外，仲專登買D麵包超人玩具畀燒腩仔做禮物，呢架表姨送嘅麵包超人車更加係佢嘅至愛，拆咗之後就一直玩到無停手。



由於姨媽送畀燒腩仔份禮物其實係艾菲代買，所以一早已經放咗喺我哋屋企，開完party第二晚艾菲就叫燒腩仔自己拆。



燒腩仔：嘩﹗火車呀﹗多謝姨媽姨丈﹗

唔知點解之前無諗住買時就周圍都見到呢盒東鐵set，但到艾菲決定叫姨媽買時就周圍都賣晒，得返艾菲唔多like嘅機鐵set，好彩最終都畀艾菲喺Piago搵到最後一盒。

燒腩仔：行快D﹗（呢個小朋友每次見到火車經過，都會揮手叫火車行快D）



到火車埋站停車，燒腩仔又會手多多咁想推架車出軌，不過後來學識咗控制路軌同停車開車就無再咁做啦﹗



最後當然都要拆埋艾菲同米高送畀佢嘅生日禮物啦﹗眼見燒腩仔D車仔越來越多，佢又成日玩到東一架西一架咁，艾菲已經掙扎咗好耐要唔要買呢個Tomica停車場，終於上次去完黃埔playhouse，路過奇趣天地見佢執笠做緊九折（折咗三百頭咋﹗），就忍唔到手買咗返來做佢嘅生日禮物啦﹗



吸收咗之前砌東鐵火車嘅經驗，艾菲特登等燒腩仔夜晚瞓咗先慢慢砌好個停車場畀佢第二朝玩，而燒腩仔都相當醒目，知道唔畀艾菲影到張滿意嘅相無得玩，所以一埋位就好乖咁做happy face畀艾菲任影啦﹗



燒腩仔：嘩﹗架車會自己彈出來㗎﹗



燒腩仔：等我截停架車先﹗



燒腩仔：勁呀﹗D車識自己坐電梯上樓㗎﹗



燒腩仔：玩咗咁耐，架車要入油抖吓啦﹗bye bye﹗