兩歲啦﹗

唔經唔覺我已經兩歲啦﹗今個生日食咗N咁多個生日蛋糕，唱咗N咁多次生日歌，吹咗N咁多枝生日蠟燭，玩同食得好開心呀﹗不過生日之後就開始返學，再返咗三日學就腸胃炎病咗，仲傳染晒全家人添，所以呢篇兩歲成長記錄就一拖再拖，拖咗一星期有多先出到街啦﹗



飲食狀況都係差唔多，一日四餐，早餐飲奶加餅乾麵包之類，午餐晚餐各一碗飯，下午茶就食水果零食，媽媽一直都堅持煮BB餐我食，但見我呢半個月都餐餐食到誓願咁，就決定等我足兩歲正式告別BB餐，以後有得一齊食大人餐，仲話會買過張high chair畀我同佢哋同枱食飯添呀﹗YEAH！

我兩邊四隻大牙終於出晒來，連埋前面D門牙宜家總共有八隻牙（艾菲：點解你可以咁少牙㗎？），但我到宜家都未係好叻咬嘢，D豬肉碎大粒D都寧願唔食，同埋突然唔鐘意食菜只肯食瓜同西蘭花（艾菲：真係十萬個唔明，明明之前最鐘意就係食菜），至於零食就可以食唔停口，成日搶媽媽D蛋糕檸檬茶同爸爸D甜品食，不過就畀媽媽笑我唔食糖囉（艾菲：之前去幼稚園open day有kawai肝油丸食居然lur返出來唔肯食）。



呢個月瞓覺嘅最大轉變就係自己一個瞓一間房，無咩唔舒服嘅話都好少再半夜喊醒，但就成日晨早七點幾就起身唔再瞓返（艾菲：平日係瞓到九點半十點先起身），要媽媽過來同我一齊瞓先會瞓多一陣，另外媽媽仲投訴我呢排入房瞓覺時扭擰咗好多，成日顧住玩玩具唔理媽媽話夠鐘瞓覺，有時仲會為咗咁而發脾氣添，就算入到房都要喺張床碌好耐先瞓得著，最經典一次由十點半碌到十二點幾先瞓，激到媽媽彈吓彈吓，佢話來緊返學要慢慢調節吓我瞓晏覺嘅時間同減鐘數（艾菲：宜家晏覺最少瞓兩個鐘，唔叫醒佢瞓三個鐘都仲得），寧願我夜晚可以快D瞓著同瞓耐D喎。



活動能力方面跳都仲係練習中，要試跳好多次先成功雙腳離地一兩吓，但有另一樣大進步就係終於識爬公園D鋼架，同肯玩普通韆鞦，雖然仲要大人喺側邊傍住，但絕大部分時間都係我自己一個搞掂唔使佢哋扶﹗至於入字腳嘅問題，因為情況未至於好嚴重，簡中媽媽提我都會行得好D，媽媽決定再觀察多一排，同睇吓學校老師有無覺得有問題，先決定要唔要去健康院做檢查。



呢個月另一大突破就係唔再抗拒風筒同肯主動拖其他小朋友，之前飲水整濕咗件衫畀媽媽罰用風筒吹返乾，我會呃爸爸幫我搞掂佢，但宜家自已來都無問題，而向來獨來獨往唔鐘意同其他小朋友玩嘅我，最近都開始肯同其他小朋友一齊玩，肯借D寶貝車畀小朋友玩一陣，媽媽叫拖住仲會即刻伸手拖實對方添﹗



自理能力都係咁上下，苦練多時之後終於學識自己除襪（艾菲：之前次次要我哋幫佢托大腳先除到），而照頭淋水洗頭都已經唔再嘈好合作，至於potty training就一直係膠著狀態毫無進步，poo poo繼續正常無問題亦無乜意外發生，係wee wee就點都唔肯喺廁所wee，媽媽話會繼續試但唔會逼，希望之後學校有辦法幫到忙啦﹗（艾菲：都預要出年夏天先搞掂㗎啦﹗）


繼續口水佬上身，把口由起身開始就未停過，會主動同爸爸媽媽講早晨（艾菲：不過第二句係「起身啦﹗食早餐啦」），亦肯同樓下保安員打招呼同傾偈，但一換咗人就會靜晒睇你唔到咁，有時叫人都要扭擰一陣先肯開金口，講嘢九成九係句子，表達自己意思諗法無難度（唔喪喊嘅時候），呢期最鐘意就係唱《ABC》同《Twinkle Twinkle Little Star》，好鐘意跟大人口水尾學講D奇怪音嘅字（例如：話人講嘢嘈嘅「bi li ba la」同留鼻水「fi li fei lei」），除咗1-10同A-Z之外，仲學識咗形狀同顏色，日日出街都指住唔同嘢話紅色，藍色，黃色，圓形，正方形，長方形同三角形咁，除咗藍色同綠色簡中會講錯，其他絕大部分都講得啱。



最後又到情感發展呢一part啦，媽媽話呢個月係trouble 2嘅昇華版，摞地發難已經成為basic嘢，我已經晉升到另一境界就係當爸爸媽媽傻，佢哋越叫住我唔好做嘅嘢，我就全部唔理照做，扭起計上來乜嘢都應你no，食唔食蛋糕？「唔食」，飲唔飲汁汁？「唔飲」，要唔要媽媽？「唔要」，要唔要叻叻貼紙？「唔要」， 玩唔玩車車？「唔玩」，去唔去公園？「唔去」，發脾氣啱唔啱？「唔答」，真係問你死未﹗（艾菲：咁搞法真係硬功鬧佢唔得，軟功氹佢都唔掂﹗）

至於安全意識繼續高到無朋友，試過去爺爺嫲嫲屋企，不過平日個保安叔叔放假換咗第二個，我來遠見到已經拉媽媽走唔肯入去，呢期最黐嘅人就係媽媽，日日都要叫住佢跟住佢先安樂，搞到媽媽有時要放低我一陣都要同我解釋一輪先得，扭計同瞓未醒一定「媽媽﹗媽媽﹗」咁大叫（艾菲：但好多時攬實佢都仲唔收聲呢吓真係有D燥），同小朋友玩畀人蝦唔會鬧人打人但會發媽媽脾氣囉（艾菲：乜我真係好蝦D咩？）﹗