去沙灘嘅裝備艾菲一早準備好，上一期幼潛畢業禮送咗套全新嘅沙灘玩具，之前又喺12蚊店買咗個勁方便嘅沙灘玩具網袋，最近仲淘埋個帳蓬返來添，點知唔游水嘅米高就一拖再拖，寧願大熱天時帶燒腩仔去公園都唔肯同我哋去沙灘玩，艾菲同燒腩仔等了又等，等到十月秋天都來開始涼先終於逼到佢來，不過又公道D講，呢D時候來沙灘人唔多，吹埋來D風又涼涼地咁，真係特別舒服同relax。
上年除咗六月時去過一次清水灣，就只係生日嘅時候帶過燒腩仔去愉景灣個沙灘玩水，之後就一直無再帶過佢去沙灘，估唔到事隔一年之後，呢個小朋友來到清水灣一落車就知呢到叫沙灘（我好似無再特別教過佢喎），仲即刻嘈住要衝落水玩，話咁快就玩到成身濕晒，至衰艾菲之前完全無諗過畀佢落去游水，所以好理所當然咁無帶泳衣畀佢換，搞到佢之後要全程光豬玩。
之後拉咗佢上岸食吓嘢再玩咗陣沙，向來喺感統方面都好敏感嘅佢，艾菲仲以為佢會唔鐘意沙嘅texture，點知佢又好OK勁like喎，一教就已經學識印公仔圖案。
跑呀﹗可以回歸大自然，小朋友玩得特別開心﹗
每個小朋友去沙灘都好鐘意做嘅指定動作，就係拎個桶出海
畀佢試過一次之後就堅持要自己裝水。
再堅持自己拎返去。
不過行吓又倒瀉D，行吓又倒瀉D，返到去都所餘無幾。
倒呀﹗一下倒晒落個窿，跟手又衝出去再裝過...
無意中影到呢張好有《新假期》配相feel嘅相，可惜佢唔係三點式
正當艾菲瞓喺帳蓬到諗住抖吓，呢個小朋友就喺後面出現突襲，原先諗住佢只係玩吓嚇吓艾菲（因為之前米高瞓喺到時艾菲教過燒腩仔走來呢到嚇爸爸），點知佢忽然一腳撐埋來，嘩﹗艾菲右眼眼蓋即時刮損咗，痛到呢...佢呢期唔知做咩好鐘意暴力對待媽媽，成日失經無神就出手傷人﹗
我哋喺沙灘玩到三點左右就走啦，快手返屋企食多次生日蛋糕，原先艾菲想訂純天使蛋糕，再加自製生果諗住畀燒腩仔自己裝飾，但諗吓諗吓都係廢事搵自己來搞，最終只係買咗呢個粉紅天使蛋糕（喺藍莓同士多啤梨之間，燒腩仔堅持揀呢個）。
wakaka...點解艾菲咁多靚蛋糕唔買，硬係要買天使蛋糕呢，為嘅就係蛋糕上面嘅cream囉，目的就係要捕捉呢隻花面貓嘅真面目啦﹗
沒有留言:
張貼留言