燒腩仔間學校，學費超級相宜，除咗百幾蚊書簿費之外都無乜其他雜費，但變相就好多嘢都要家長自己幫小朋友準備，就好似姓名印咁啦，艾菲朋友嘅小朋友嘅學校都係畀錢學校集體一齊做，但燒腩仔學校就要家長自己出去整，仲要七月註冊時就要交，好彩快圖美有得整艾菲先唔使四圍撲。
之前去燒腩仔學校開家長會，已經知道開學前有好多嘢要準備，不過燒腩仔十月頭先返學，艾菲同米高都係懶懶閒咁，只係間中記得就買D記得就買D咁，連白波鞋都係拖到九月尾先去買，怕太早買佢對腳大咗就會唔啱。
到底一個小朋友開學有咩要準備呢？為免出年K1開學時艾菲會唔記得，所以都要記低要帶嘅嘢：
1. 白波鞋X2，一對室內，一對室外，由於燒腩仔套校服只係得運動衫， 所以唔需要買皮鞋，亦因為咁我哋寧願貴少少買兩對Adidas白波鞋畀佢，感覺好過日日著住對雜嘜波鞋，怕佢著壞腳。
2. 白襪X6，喺日本西松屋買，為返好似只係幾蚊對，抵抵抵﹗
3. 背心底衫X4，雖然只係著運動衫，但學校都強烈建議要著底衫索汗，等佢哋無咁易攝親病。
4. 毛巾仔X6，都係日本西松屋買，同樣係幾蚊一條，又抵又靚﹗
5. 汗巾X3，老師話每次做運動前都會幫佢哋攝住，以防佢哋大汗攝親會病，但so far艾菲又唔見老師有幫燒腩仔攝過條汗巾喎...
6. 後備衫褲1-2套，學校會有排洗時間，就連燒腩仔未戒片講明未識vee嘅都要一齊去，呢三個星期試過成功vee到但唔記得拎起面衫底衫整濕咗（竟然成功喺學校vee到，呢個係燒腩仔返咁耐學艾菲最開心嘅事﹗），有試過腸胃炎肚痾褲仔白襪同鞋仔一齊整污糟晒，亦有時過老師趕唔切同佢換片搞到爆片面衫底衫褲仔都濕晒，所以後備衫真係好緊要﹗
7. 學習褲X2，燒腩仔未戒片，為方便嬸嬸幫手換片，亦畀佢哋有除褲去洗手間嘅concept，佢哋一定要著學習褲唔可以著普通片。
8. 污衣袋X1，用來裝D污糟咗嘅衫，其實普通一個膠袋都已經OK，不過艾菲就鐘意乾淨D，用大嘅密實袋來做污衣袋，等D衫唔會跌返出來整污糟書包入面其他嘢
9. 鞋袋X1，小朋友返到學校換完鞋之後要將換出來對鞋入鞋袋，之前見波媽整畀波哥個靚靚鞋袋即時心心眼，但燒腩仔學校就千叮萬囑話佢哋希望學生撲實D，連鎖匙扣都唔准掛書包，建議我哋買個透氣洗衫袋就得，咁艾菲唯有乖乖聽話啦﹗
10. 水樽X1，學校好強調帶一個吉樽返去就OK，佢哋會斟暖水畀小朋友飲。
11. A4 size文件袋X2，老師話一個係功課袋放功課，一個就係圖工袋放小朋友喺學校做嘅美勞大作。
12. 書X4，因為燒腩仔遲開學，所以艾菲一早喺屋企同佢讀咗第一本《上學去》，等佢知道返學係點，亦唔使聽到一舊雲咁，問過學校唔使全部帶返去咁重，而且只係逢星期一帶一本返去用到星期五先派返。
13. 口罩X10，長放學校，以防小朋友有病時可以用，如果用完就要再refill。
14. 小食物盒，燒腩仔學校會一人派一舊泥膠畀佢哋玩，為確保唔會撈亂就要帶個食物盒返去入住，但佢舊泥膠到底係咩樣or咩色艾菲就完全唔知，因為學校到宜家都無派過返來畀佢喺屋企玩。
15. 姓名貼，小朋友返學每樣嘢都要貼，好彩之前肚B媽問艾菲有無興趣一齊淘，艾菲就搭單喺呢間Q貼工作室淘咗兩張中size姓名貼，揀咗汽車總動員同燒腩仔至愛巧虎，製成品嘅公仔好似樣仲好好用，真係貼水樽日日用水洗都無甩，good﹗
16. 熨印貼，小朋友返學D衫褲鞋襪都要寫名，艾菲好記得細個時燒腩仔婆婆係用針線繡個名落艾菲件衫到，但宜家呢個世界已經有樣嘢叫熨印貼，同樣係搭單叫肚B媽一齊淘，只係要咗一張麵包超人公仔，製成品相當之靚，連燒腩仔都會自己拎起條校服褲話「麵包超人陪我返學」，不過就唔係貼得咁實，好多時洗多幾次都會起邊要用熨斗再熨過先可以繼續用，尤其D布嘅質地係凹凹凸凸有坑紋嘅就實會甩，艾菲唯有用針線聯實等佢唔會再甩。
由於艾菲之前實在太懶散，所以就算九月底已經買齊所有嘢，到燒腩仔生日前一日，即開學前兩日，全部嘢都仲未寫名，結果艾菲搞咗成個下午先終於將全部嘢集合起來，先逐件慢慢寫好名，再按學校指示逐樣pack好呢﹗
沒有留言:
張貼留言