試用：Hallmark Babies嬰童裝產品

最近天氣開始轉涼，又係時候幫燒腩仔準備換季，而咁啱艾菲就喺呢個時候抽到MyBB.com嘅試用，收到幾件Hallmark Babies嘅衫仔，燒腩仔來緊呢個冬天又有靚衫著啦﹗

Hallmark Babies相信無乜邊個媽媽會未聽過，佢哋出名衫仔質地好摸落舒服之外，仲選用不含有害物質嘅無線鈕扣，通過金屬測試，確保無斷針或者殘留金屬，媽媽可以安心畀小朋友著上身。



而艾菲今次收到嘅就係一件禮服裇衫連煲呔，同埋一條型仔啡色棉褲，睇件禮服裇衫嘅details位就知設計認真，同大人嘅禮服裇衫絕對有得fight一D都唔馬虎，而條褲仔除咗夠型同質地好之外，艾菲最欣賞就係個修腳位，就算宜家燒腩仔著落有長都唔怕褲腳跌落來。



另外仲有一件有Hallmark's Mason Bear圖案嘅開胸外套，質地好又唔太厚，可以喺秋天同冬天唔太凍時著，仲要係用綠色做主色啱晒艾菲杯茶，Good﹗

N班開學回顧～week 1

燒腩仔已經開咗學成三個星期，以防自己老人痴呆好快唔記得，D咁重要嘅moment點都要同佢做個小小嘅回顧先得﹗

Day 1 8/10/2014

由於燒腩仔係遲開學，佢無得好似其他同學仔咁有三日適應畀家長陪住上堂，但學校本書仔明明話艾菲第一日都可以陪佢上堂，等艾菲仲叫米高唔好拎假接放學（因為有艾菲陪燒腩仔實無事），點知開學前一日佢嘅班主任先打來，問艾菲可唔可以唔跟上堂，擔心艾菲嘅出現會影響其他啱啱適應咗返學嘅同學仔情緒，問心就梗係有D失望啦，無得入去了解吓燒腩仔嘅上堂情況，不過為咗配合學校艾菲都應承咗。

經過一個月嘅催眠，終於都來到正式開學呢日，艾菲一問去到學校要點，燒腩仔已經識背個model answer「bye bye媽媽」，然後我哋成朝都好期待，食完lunch就拿拿聲換衫影校服相，再出門口返學，去到學校門口燒腩仔已經get到要入去，但感覺佢仲未係好知發生咩事咁，然後正式分離嘅一刻到啦，艾菲起初以為燒腩仔會唔肯入去，不過佢除咗唔鐘意枝探熱槍之外都無再扭，好乖咁跟老師入咗學校，坐喺到等換鞋時仲識得笑住同艾菲揮手bye bye添，反而其他同學仔一到學校門口就喊到死去活來咁，場面超級爆笑﹗

放低燒腩仔艾菲就拿拿聲返屋企做家務，夠鐘就又拿拿聲撲返學校接放學，燒腩仔頭幾日都只係返兩個鐘，扣埋一來一回嘅時間艾菲實際上只得一個鐘空檔，咁樣撲來撲去都真係幾攰同幾趕，但為咗個仔艾菲都知要堅持落去，好彩一入到學校門口校長就主動同艾菲講燒腩仔表現好穩定，只係間中諗起我哋，又或者見其他同學仔喊得好勁時會跟住喊，但老師氹吓安撫吓都肯收聲，聽到呢到艾菲唔知點解忍唔住眼濕濕起來，真係覺得自己個仔好叻仔，即刻覺得放心晒﹗

Day 2 9/10/2014



呢日米高專登請咗假陪艾菲同燒腩仔，有爸爸陪住我哋好準時咁就去到學校，亦都係好順利咁就入咗學校，臨入去前佢仲好乖咁錫咗艾菲一啖先走，等艾菲可以安心同米高去拍兩個鐘拖，我哋去咗展貿subway tea，咁啱有馬拉松開倉又忍唔住手掃咗一人一對波鞋，hehe...

夠鐘就返學校接放學，今日燒腩仔班主任無跟住出來，只係學校書記幫手帶燒腩仔出來，佢話燒腩仔今日上堂時已經無乜點喊，相比起打開班房門口聽到嘅強勁喊聲，書記都忍唔住讚佢表現好過好多返咗成個月學嘅同學仔。

N班開學預備篇

都已經開咗學三個星期，到宜家先終於得閒寫返呢篇預備篇來回顧吓，其實艾菲都唔想拖咁耐㗎，只不過呢三個星期真係畀燒腩仔玩到謝咗，佢返咗三星期學就扭足三星期計，D情緒問題煩到艾菲日日都有氣無掟抖（呢個另一篇再詳談），等到呢幾日佢開始好少少先終於可以回歸blog界啦﹗

燒腩仔間學校，學費超級相宜，除咗百幾蚊書簿費之外都無乜其他雜費，但變相就好多嘢都要家長自己幫小朋友準備，就好似姓名印咁啦，艾菲朋友嘅小朋友嘅學校都係畀錢學校集體一齊做，但燒腩仔學校就要家長自己出去整，仲要七月註冊時就要交，好彩快圖美有得整艾菲先唔使四圍撲。

之前去燒腩仔學校開家長會，已經知道開學前有好多嘢要準備，不過燒腩仔十月頭先返學，艾菲同米高都係懶懶閒咁，只係間中記得就買D記得就買D咁，連白波鞋都係拖到九月尾先去買，怕太早買佢對腳大咗就會唔啱。



到底一個小朋友開學有咩要準備呢？為免出年K1開學時艾菲會唔記得，所以都要記低要帶嘅嘢：

1. 白波鞋X2，一對室內，一對室外，由於燒腩仔套校服只係得運動衫， 所以唔需要買皮鞋，亦因為咁我哋寧願貴少少買兩對Adidas白波鞋畀佢，感覺好過日日著住對雜嘜波鞋，怕佢著壞腳。

2. 白襪X6，喺日本西松屋買，為返好似只係幾蚊對，抵抵抵﹗

3. 背心底衫X4，雖然只係著運動衫，但學校都強烈建議要著底衫索汗，等佢哋無咁易攝親病。

Happy 2の夏水禮

燒腩仔生日正日，米高一早請咗假準備一家三口去玩，不過艾菲呢排實在太忙，再加上對燒腩仔兩歲生日嘅事硬係唔多上心咁，結果研究咗好耐都決定唔到去邊，有諗過帶燒腩仔去迪士尼探另一至愛Mickey Mouse，但怕呢排近halloween旺季會人多，又怕玩得太癲太夜會影響第二日開學嘅心情，最終只係求求其其帶咗佢去今年完全無去過嘅沙灘玩就算。



去沙灘嘅裝備艾菲一早準備好，上一期幼潛畢業禮送咗套全新嘅沙灘玩具，之前又喺12蚊店買咗個勁方便嘅沙灘玩具網袋，最近仲淘埋個帳蓬返來添，點知唔游水嘅米高就一拖再拖，寧願大熱天時帶燒腩仔去公園都唔肯同我哋去沙灘玩，艾菲同燒腩仔等了又等，等到十月秋天都來開始涼先終於逼到佢來，不過又公道D講，呢D時候來沙灘人唔多，吹埋來D風又涼涼地咁，真係特別舒服同relax。



上年除咗六月時去過一次清水灣，就只係生日嘅時候帶過燒腩仔去愉景灣個沙灘玩水，之後就一直無再帶過佢去沙灘，估唔到事隔一年之後，呢個小朋友來到清水灣一落車就知呢到叫沙灘（我好似無再特別教過佢喎），仲即刻嘈住要衝落水玩，話咁快就玩到成身濕晒，至衰艾菲之前完全無諗過畀佢落去游水，所以好理所當然咁無帶泳衣畀佢換，搞到佢之後要全程光豬玩。

Mini生日會~拆禮物

上回講到食完生日蛋糕，跟住就到拆生日禮物嘅環節啦﹗



大家都好錫燒腩仔，除咗生日利是之外，仲專登買D麵包超人玩具畀燒腩仔做禮物，呢架表姨送嘅麵包超人車更加係佢嘅至愛，拆咗之後就一直玩到無停手。



由於姨媽送畀燒腩仔份禮物其實係艾菲代買，所以一早已經放咗喺我哋屋企，開完party第二晚艾菲就叫燒腩仔自己拆。

Mini生日會

今年同上年一樣，我哋繼續唔幫燒腩仔大搞生日會，只係借咗公公婆婆屋企搞個Mini生日會，請咗好錫燒腩仔嘅姨媽同姑婆一家來玩就算，簡簡單單又容易handle，最重要係主角燒腩仔唔使怕陌生人被逼應酬，可以盡情地投入地玩﹗



生日會場地布置，絕大部分都係淘寶貨來（遲D出篇淘寶blog介紹吓），之前有諗過度身訂造一set有theme有名嘅布置㗎，不過艾菲呢排實在太懶散，最終拖到最後先落order，所以只可以揀現成款（仲搞到差D收唔切貨添呀﹗），用燒腩仔最鐘意唱嘅「一閃一閃小星星」做theme，另外吸收咗上年嘅經驗，艾菲今年hea得來都認真返少少，上網donwload咗D file，DIY咗條細嘅Happy Birthday banner，Birthday poster同回禮曲奇餅。



今次生日會終於有小朋友加入啦﹗表妹仔越來越大個，就快識得同燒腩仔玩啦﹗

兩歲啦﹗

唔經唔覺我已經兩歲啦﹗今個生日食咗N咁多個生日蛋糕，唱咗N咁多次生日歌，吹咗N咁多枝生日蠟燭，玩同食得好開心呀﹗不過生日之後就開始返學，再返咗三日學就腸胃炎病咗，仲傳染晒全家人添，所以呢篇兩歲成長記錄就一拖再拖，拖咗一星期有多先出到街啦﹗



飲食狀況都係差唔多，一日四餐，早餐飲奶加餅乾麵包之類，午餐晚餐各一碗飯，下午茶就食水果零食，媽媽一直都堅持煮BB餐我食，但見我呢半個月都餐餐食到誓願咁，就決定等我足兩歲正式告別BB餐，以後有得一齊食大人餐，仲話會買過張high chair畀我同佢哋同枱食飯添呀﹗YEAH！

我兩邊四隻大牙終於出晒來，連埋前面D門牙宜家總共有八隻牙（艾菲：點解你可以咁少牙㗎？），但我到宜家都未係好叻咬嘢，D豬肉碎大粒D都寧願唔食，同埋突然唔鐘意食菜只肯食瓜同西蘭花（艾菲：真係十萬個唔明，明明之前最鐘意就係食菜），至於零食就可以食唔停口，成日搶媽媽D蛋糕檸檬茶同爸爸D甜品食，不過就畀媽媽笑我唔食糖囉（艾菲：之前去幼稚園open day有kawai肝油丸食居然lur返出來唔肯食）。



呢個月瞓覺嘅最大轉變就係自己一個瞓一間房，無咩唔舒服嘅話都好少再半夜喊醒，但就成日晨早七點幾就起身唔再瞓返（艾菲：平日係瞓到九點半十點先起身），要媽媽過來同我一齊瞓先會瞓多一陣，另外媽媽仲投訴我呢排入房瞓覺時扭擰咗好多，成日顧住玩玩具唔理媽媽話夠鐘瞓覺，有時仲會為咗咁而發脾氣添，就算入到房都要喺張床碌好耐先瞓得著，最經典一次由十點半碌到十二點幾先瞓，激到媽媽彈吓彈吓，佢話來緊返學要慢慢調節吓我瞓晏覺嘅時間同減鐘數（艾菲：宜家晏覺最少瞓兩個鐘，唔叫醒佢瞓三個鐘都仲得），寧願我夜晚可以快D瞓著同瞓耐D喎。

離家出走＠南丫島

一場佔中，令艾菲嘅思緒一直未能平伏，可能因為自己工作關係，曾經走過喺最前線，當權者入面邊個係人邊個係鬼，艾菲同米高都心中有數，所以我哋更加難過，呢段期間除咗基本日常生活，艾菲其餘時間都係對住facebook，RTHK即時新聞同電視live，除此之外真係咩都做唔到，就連燒腩仔生日同開學嘅事都搞到要臨急抱佛腳先完成到，亦之所以個blog都封咗塵個幾星期，來緊真係有排追...



言歸正傳，講返佔中前嘅一日先，呢日艾菲居然拋夫棄子，同三個好姊妹去咗南丫島，過一個兩日一夜嘅trip﹗簡直係amazing之作﹗我哋四個由中學開始識，friend到無所不談，但自從Ice媽媽結婚生仔之後，幾乎每次出來gathering都要一家人咁出動，老實講要照顧小朋友，又要顧及其他屋企人感受，有時真係想傾耐D or深入D都唔得，但自己都係全職媽媽，絕對明白放低小朋友出來食個飯唔係一件易事，唔知大家係唔係都忍得太耐呢，艾菲中秋節嘅一句戲言「想一齊去旅行」，平日約親gathering都麻麻煩煩嘅大家居然好爽快就答應，仲極速擇埋日揀埋地點添﹗



成就到呢次trip，一定要多謝米高全力支持，陪艾菲出去旺角租渡假屋，又肯幫手做湊仔公，超級抵錫﹗話就話兩日一夜嘅trip，實際出發前嘅朝早都仲要陪燒腩仔去幼稚園open day，返到屋企餵埋食飯艾菲先敢走，雖然一早同燒腩仔講咗要離開一晚，佢都應承會聽爸爸話，但到出門嘅一刻，佢居然話要跟埋艾菲走，米高話唔得佢就喊到要生要死咁，搞到艾菲要返轉頭安撫完佢先走得，幾乎趕唔切坐三點三班船入去添呀﹗



入到南丫島，以為大家會四圍行吓，點知我哋四個聚埋一齊，真係雞啄唔斷可以喪傾唔停，我哋除咗落士多入貨同食晚餐之外，就只係留喺渡假屋到不停咁傾傾傾同埋傾，習慣夜瞓嘅艾菲同Ice媽媽仲傾到第二朝六點幾七點先捨得去瞓﹗



瞓到十點半起身梳洗完就去還房，大家一早夾好食埋lunch就走（其實個trip邊有兩日一夜吖...），但還完房都十一點幾又未食早餐，於是就去咗食個勁豐富嘅all day breakfast做brunch算，之後四圍逛咗陣就坐船出返香港啦，因為無老公同小朋友喺身邊嘅gathering實在太free，大家走嘅時候都意猶未盡，於是約定以後要半年食一次單身飯，一年就去一個短trip，畀大家盡訴心中情透吓氣，希望最後真係成到事啦，hehe...



自從生咗燒腩仔之後，除咗之前乳腺炎入院被逼同佢分開三日，都未試過同佢分開咁耐，話無心掛掛就假嘅，不過都未算掛到好牽腸掛肚，亦好感激米高第一晚記得喺燒腩仔臨瞓前打來畀艾菲聽吓佢把聲（佢之前一直叫艾菲唔好打返去煩住佢哋，話佢哋兩父子會自己fever喎），第二朝去打波時都記得影張相畀艾菲，等艾菲可以安心去玩，咁艾菲臨走前都專登買咗條貓貓手繩畀佢做手信㗎﹗

返到屋企打開門，燒腩仔就即刻放低手上嘅車，好開心咁跑過來迎接艾菲，呢一刻真係sweet到呢，原來對付男人，真係要若即若離，唔可以畀佢覺得你理所當然咁隨傳隨到，佢哋先會珍惜㗎，kakaka...