18個月

嘻...我今日18個月大啦﹗媽媽話我一歲半大個仔，又踏入人生嘅新階段，所以尋日已經同我home studio咗輯相，仲話今日會整D好嘢我食同我好好慶祝喎，搞到人哋鬼咁期待添﹗



我今個月係飲食方面都無乜點變，一直都係一日五餐，早晚各兩餐七安奶，午餐晚餐食一個大人碗嘅飯餸，下午苶就食小小零食加水果，暫時仲係食BB專用餐，跟爸爸媽媽出街全餐食街外食物的話依然麻麻like，會食少過平日份量嘅三分之一，不過見到大人食嘢都會搶住要試，但宜家終於識得飽啦，食夠嘅話就會收口唔再食，甚至去到婆婆屋企寧願自己食飽落地玩玩具，都唔願埋枱陪大人一齊食飯﹗

除咗用杯飲奶同自己畢嘢食之外，我係用叉拮食物呢方面都有些少進展嘅，間中都會成功拮到D食物，不過我到宜家都仲係得六隻牙（艾菲：佢已經四個月無出過牙啦﹗真係等到頸到長呀﹗），所以都唔係有好多食物可以拮到而我又咬到囉﹗又由於我最近越來越有主見（艾菲：好恐怖嘅trouble 2呀...），所以呢排食飯都成日同媽媽嘈，有時係因為媽媽換咗我枝叉而嘈，有時就因為食到尾媽媽要唔畀我自己畢埋D散開咗嘅飯來食而嘈，最近就試過因為嫌D飯餸來來去去都係芝士忌廉汁底（艾菲：因為想佢吸多D鈣幫助出牙嘛），食到誓願咁款就畀媽媽收碗兼罰坐punish corner（艾菲：實情係唔止誓願咁簡單，而係玩到好似倒屎咁一頭都係），後尾媽媽停咗無再整芝士忌廉汁嘅飯同我都知驚就食得好乖好合作啦﹗



至於瞓覺呢就有少少嘅轉變，宜家媽媽將夜晚餐奶提早咗半個鐘係十點就餵，我飲完奶就會乖乖去瞓，通常十一點前都會瞓著，一覺就瞓到第二朝九點半左右起身，不過前排天氣熱呢我就成日七點幾會跟咗爸爸起身，但未瞓醒嘅媽媽就堅持要我試吓繼續瞓，於是我就係張床到碌到成八點幾九點先瞓返，結果媽媽怕我唔夠瞓會攰，就由我瞓到十點先起身（艾菲：唉...越瞓越晏，惡性循環，但天氣涼返佢又即刻正常返），晏覺都係一日瞓一次，每次兩個鐘左右，不過出街就可能瞓得半個鐘就唔肯再瞓。



我宜家除咗識行識跑之外，上落樓梯嘅能力都越來越好，轉圈，原地踏步同倒後行，對我來講已經係無難度，只係跳仲係原地un未成功，不過媽媽話我入字腳好似越來越明顯，佢同爸爸已經一得閒就係屋企同我練踢波，又唔敢再亂買鞋我著，希望來緊去健康院見姑娘時會搵到其他辦法幫我改善啦﹗



媽媽話我呢個月最大嘅進步就係唔再乜都叫車，終於知道小巴同巴士叫「巴巴」，媽媽提水下都會叫「taxi」（艾菲：我明明教佢講的士，佢就無端端變咗英文音），認得救護車同警車嘅真身（之前唔閃燈就唔認得），識得分飛機係天空到飛，同船係水裡面行，舅婆上星期仲教曉咗我截車要舉手添﹗ 至於蔬果都唔再全部叫apple啦，暫時識得分嘅有「橙橙」，「檬檬」（檸檬）同埋「nana」（蕉），動物亦唔再全部叫wow wow，係我嘅字典入面，除咗狗仲有「貓貓」，「鴨鴨」，「雀雀」同「蚊蚊」（Monkey）。



宜家我朝早見到爸爸媽媽會鞠躬講「晨」（即早晨），臨瞓前就同佢哋講「night night」，做錯事的話會扭住耳仔講「唔住」，之前去拜山仲識得對住祖先請請同鞠躬添，爺爺嫲嫲同公公婆婆都讚我乖㗎﹗自從媽媽畀咗我睇《Mickey Mouse Clubhouse》之後，我已經認得「咪咪」（即Mickey），每次係街到見到佢都會指住話畀媽媽知，前排媽媽仲送咗個「咪咪」陪我瞓添，我開心到成晚攬住佢錫完又錫同不停同佢傾偈呀﹗嘻...係媽媽嘅茶毒下，宜家除咗「咪咪」之外，我都幾鐘意「包包人」（麵包超人）同「叮噹」㗎﹗



而玩玩具都唔會再好似以前咁跟住大人教嘅方法來玩啦，開始會自己創作D有自己style嘅玩法，例如玩婆婆屋企架獅子車就唔再局限於推來推去，一有機會就會將佢打棟來玩後面兩個轆，呢期最like就係研究D會轉嘅嘢，日日係屋企拎住D圓柱型嘅玩具向前向後咁碌，有時又會將佢哋原地轉，睇吓唔同轉法有咩分別。



自理能力方面除咗餵食有些少進步，我去完play house玩會認得自己對鞋無拎錯，出到街會識得跟實媽媽而唔再一枝箭咁標走咗去（艾菲：只限得我同佢嘅時候，有其他人一齊就會high到乜都唔記得），扭完計會識得自己抹眼淚，媽媽最近同我換學習褲時仲教識咗我自己除褲同著褲添﹗至於potty training嘅進度仍然良好，雖然間中都有意外發生，但係potty時間以外想便便的話，都會主動同大人講，通常都成功忍到坐上大人廁所先便便，不過學wee wee就零進展，就算媽媽專登買咗張凳仔畀我用，我每次企上去都只係想玩同洗手而唔係wee wee囉﹗



至於講嘢方面，媽媽就讚我最近好肯學，唔使再好似之前咁搵玩具或者嘢食引我先講，唔覺唔覺已經學多咗好多字，不過A-Z依然係無心機學全部都叫「N」，但媽媽數1-10我會跟住講「4」，「5」，「7」，「8」同「10」（最叻講個8字），答問題嘅基本答案「得」/「唔得」，「可以」/「唔可以」，「好」/「唔好」同「知道」都答到，大人讚我時仲會自己講「叻叻」，稱呼的話，「哥哥」，「姨姨」，「叔叔」，「姨丈」，「父父」（舅父）係提水加心情好嘅情況下都識講，唯獨係阿公一直講唔到正音，會變咗做「阿姐」，媽媽同姨媽早幾日研究咗一輪之後估計我係未發到D要嘟咀嘅音，所以返到屋企媽媽就開始訓練我吹氣。

媽媽見我最近講嘢講多咗，都開始教我學講自己個真名，不過我到宜家仲未識發音，會將「謙謙」講咗做「哼哼」，而佢亦好順便咁教咗我一個佢夢寐以求想聽到嘅四個字「我愛媽媽」啦，宜家佢問我愛唔愛佢我都會答「愛」，之後我就會跟住佢講「我」同「愛媽媽」，然後佢就會好開心咁錫我一啖㗎啦﹗



最後又要講吓我嘅情感發展啦，我呢個月變得好痴身，成日都唔想同爸爸媽媽分開，佢哋一離開我視線範圍就會嘈（艾菲：即想賣甩佢抖吓都難），仲係好怕陌生人同地方，未去過嘅地方我會唔願入去，連屋企樓下保安員換咗第二個都會唔肯入大堂，遇著有陌生人撩我又唔想應佢，就會好似上面張相咁，硬晒態dup低頭扁晒咀，再用對眼望來望去，如果係D無咁得人驚嘅陌生人，我會同佢玩欲拒還迎，先係暱係爸爸媽媽後面扮怕醜，之後就伸返個頭出來裝佢哋同偷笑，如果換轉係我好鐘意嘅陌生人呢，我就會唔知醜咁主動去撩佢哋玩（艾菲：忽然又撩返人玩，算唔算有改善呢？）。

至於脾氣就依然臭，一有乜嘢唔順我意都會發惡大叫鬧人，有次仲恃住婆婆係到拍枱鬧媽媽添，而最近新招就係摞地發癲，不過返到屋企即刻畀媽媽罰坐naughty corner，仲成晚唔准我入playmat玩玩具，媽媽深信我人生中第一個「更年期」trouble 2已經來咗，成日要求多多又乜都唔滿意，仲會因為D好無謂嘅事失驚無神捉實媽媽，喊一大餐只係不停重複講「唔係呀...唔係呀...」，佢猛叫我唔好喊住試吓講自己想點，但實情係我根本唔知自己想點囉﹗（艾菲：真係好擺命，日日EQ大考驗，好多時都畀佢煩到想一腳踢開佢就算﹗詳情遲D再blog﹗）