熱爆沙灘

最近天氣真是好得不得之了，但就幾乎將燒腩仔熱到融掉，每天在家都玩到滿頭大汗（雖然只係個BB，不過加埋D口水，晚晚都覺得佢好臭），難得剛過去的weekend無特別節目，於是便即興跟米高二人帶了燒腩仔去清水灣玩沙﹗

我們已經等到下午四點才到，但星期六的清水灣實在多人到震，天空更是萬里無雲，是認真的熱爆﹗

雖說是即興，艾菲和米高都很認真收拾行裝，必備物品有之前在深水埗玩具街買的沙灘玩具，淘寶買的大大張地墊，以及米高堅持要帶的超大golf傘。

來個近鏡先，$30一set 9件沙灘玩具，感覺幾抵玩，但質地略嫌有點單簿，水桶在第二天跟燒腩仔沖涼玩水後已經爆咗...

稍稍叉開話題，BB皮膚幼嬾，夏天帶BB去戶外玩記得要搽防曬﹗（呢枝和光堂係WxY Shop買，SPF 30落水玩都OK，折咗六十幾蚊）

因為到達清水灣時已是四點，所以找到位置settle down後第一時間便是開奶給燒腩仔野餐，但超爆笑地飲奶時有陣強風吹過，吹到燒腩仔成頭成身都是沙（連眼皮都痴滿沙），他居然可以臨危不亂堅持將奶飲完，我們唯有等他飲完之後剝光豬去沖身，而有人沖身時就嚇到呱呱叫囉。

沖完身的燒腩仔心情keep著唔多OK，放他上地墊已經叫了幾聲繼而想喊，但艾菲用沙灘玩具引他都成功引到他靜靜地坐在地墊邊玩，起初只是玩沙灘玩具（即係塞入口），慢慢就開始用手拿起地上的沙來玩（沙佢又唔塞入口喎）。

坐了個多小時之後，pat pat依然沒有離開過原位，但就開始有點反應會主動拾起沙上的沙灘玩具玩（佢似乎都係慢熱型嘅朋友來，要慢慢研究一輪先肯接受新事物）。

一場來到，當然不能坐在地墊邊玩就算啦，艾菲分別捉了燒腩仔去海邊沖浪踢水（艾菲完全無諗過畀佢落水，因為D海水實在太污糟，絕對係BB不宜）和在沙上行，但他兩樣都唔like（睇吓佢個樣幾不滿），還懂得放軟雙腳不肯企（佢之前成日要企唔肯坐）﹗

玩到六點左右我們便閃人了，本來打算跟燒腩仔在沙灘沖身換衫才走，但見太多人便決定回家直接沖涼算。

基本上帶BB去沙灘（尤其係未識行嘅BB）都頗麻煩（一定要有心理準備唔怕污糟先OK），沙灘提供的清潔設施都不太適合他們（特別係人多嘅時候），不過讓BB玩沙真是一個很好的體驗呀，艾菲還即晚去AEON買了件泳衣和底褲水泡給燒腩仔，待公公有時間（公公後生時做過救生員）便會帶他到泳池進行夏水禮。