八個月

嘩﹗話都無咁快我就八個月大啦﹗我宜家有20磅重，媽媽話我重到佢已經無乜力抱我，有時仲會越抱越低，所以穩陣起見都係我快D學識行，等佢唔使抱得咁辛苦喎...嗚...唔際呀...我要媽媽抱抱呀...

我呢個月嘅生活其實都無乜點變，依然係兩餐固體三餐奶，唯一轉變就係最後一餐奶提早咗係十點半飲，飲完之後我就會一覺瞓到第二朝九點半先起身，亦因為夜晚瞓多咗，所以日頭D覺就明顯瞓少咗（其實加埋都只係少咗個零鐘），咁就可以多返D親子時間同爸爸媽媽玩啦﹗

月中時因為作病無乜胃口，試過淨係喪喊一啖都唔肯飲下午茶餐奶，嚇到媽媽以為我傻咗唔知點算好，仲將臨瞓前餐奶由原先7安減返去5安，不過我好返之後就回復正常，前排仲餐餐飲完奶之後投訴唔夠飽添，所以媽媽終於將我早晚兩餐奶都加到7安。嘻...你哋睇我宜家已經可以進化到單手飲奶啦，仲學乖咗唔會再好似之前咁飲到尾就拎個奶樽出來玩，等媽媽可以好放心咁坐係側邊玩電話或者set定個換片陣等我。

至於固體食物方面，呢個月都無乜試新嘢，只係試咗西蘭花，翠玉瓜同藍莓，食量都係繼續要食一個大人碗，有時食完仲會投訴唔夠，但每次媽媽都會摸我肚仔話「飽飽」，跟住就捉我落返地唔加畀我，雖然我到宜家都仲未有牙，但人哋真係好鐘意食㗎嘛，做咩成日收埋D好嘢唔畀人食喎，我已經認得麥當勞紙袋同埋檸檬茶盒㗎啦，你哋唔好呃細路好喎﹗

不過媽媽都讚我食嘢乖咗好多，自從畀婆婆知我上個月食到發脾氣激嬲媽媽之後，每次去親婆婆屋企婆婆都會爭住餵我，畀婆婆餵過之後我條氣已經順晒，宜家媽媽唔使再出盡法寶來氹我食嘢，我每餐都會自動自覺擘到個口大一大等媽媽餵，所以每餐唔使二十分鐘就搞掂（呢件事實在太神奇，我有問婆婆到底同佢講過乜，但婆婆話佢乜都無講，只係正常餵佢喎）﹗

但係瞓覺方面就畀媽媽扣咗分話我表現差咗，最主要都係因為我宜家識得自由活動，唔再肯乖乖地自己係床仔到瞓，要媽媽捉實我逼我瞓先肯瞓，而且我仲多咗半夜突然爆喊（尤其係日頭玩得癲果日），一喊可以合埋眼發晒狂咁喊足大半個鐘，要爸爸抱我出廳行一陣先肯收聲，搞到爸爸媽媽都大叫頭痛。

我呢個月嘅活動能力發展得越來越好，仲畀媽媽封咗我做自由行，因為我已經可以隨時根據自己嘅意思極速咁爬坐或者扶住任何嘢企起身，想去邊就去邊，見到乜都會搞一餐，有時連媽媽都捉我唔住，而且我已經會扶住梳化行來行去（行得勁快），早幾日仲學識埋摛上梳化頂添（我估佢距離摛出床仔嘅日子都應該不遠矣）﹗

除咗行動上嘅進步之外，我D手指都越來越靈活，媽媽之前拎咗個IKEA推珠珠玩具出來，我初初都唔識玩，但宜家已經識得將D珠珠推來推去，而最近就研究緊學步車上面個電話，媽媽日日都對住個電話喂喂喂，然後就話有人搵我喎，好搞笑㗎佢﹗

媽媽呢個月終於有多D時間陪我一齊玩（之前因為有嘢忙緊，所以真係無乜時間教佢嘢），佢宜家日日都好努力咁教我拍手，Hello，Bye Bye同Hi Five，但我暫時只係識抱抱要伸手，其餘乜嘢指令都未識，至於講嘢就明顯多咗，媽媽已經估到我口中嘅阿bu係婆婆（佢最愛），阿啤bu就係爸爸，至於媽媽呢..嘻....我一次都無叫過，只係有時唔開心狂喊時會不自覺咁「mum...mum...mum...」，同佢咁熟日對夜對唔使叫佢都會睇住我㗎啦﹗（艾菲：衰仔﹗無良心﹗）

另一個今個月比較明顯嘅唔同，就係我情緒上嘅轉變多咗，學識咗唔開心有嘢唔鐘意時會反抗，又知道乜嘢叫驚驚會嚇到成身震，仲開始識認人唔見咗熟悉嘅人就會喊（咁都好D，無咁易畀人拐咗去），平日係屋企得我同媽媽兩個時我就最鐘意黐實佢，佢去邊我就跟到去邊，就算佢入咗廚房煮飯，我都要坐係廚房門口望住佢先安樂，佢一唔睬我我就會唔開心喊，不過一有其他人一齊我就唔會搵佢㗎啦﹗

後記：

呢篇blog其實一早已經打好，但艾菲就唔知發生咩事，居然記錯咗日子，一直以為聽日先係燒腩仔八個月大嘅日子，於是就set咗聽日即8號先出blog，仲好開心咁諗住聽日買件cake返來食吓...

好彩頭先打電話畀婆婆時婆婆提起燒腩仔今日夠八個月，艾菲先忽然醒覺自己一直搞錯晒，所以為咗補飛就拿拿聲同佢換衫影返張相留念，本來想畫兩撇八字鬚畀佢慶祝，但佢死都唔畀我搞佢塊面，咁就唯有hea hea地用佢D圈圈砌個八字算啦﹗