第一場戰爭

話說，艾菲同燒腩仔一直都相處融洽，就算燒腩仔再扭計，艾菲都會忍同包容，但直至燒腩仔七個月大當日，我哋終於爆發咗第一場戰爭﹗

事發當日，唔知係燒腩仔知道自己七個月大太興奮定係撞邪，成晚都瞓唔好不時邊睡邊喊要艾菲起身安撫，後來到朝早七點幾更自己爬咗起身（佢平時九點先起身），艾菲氹咗佢成個鐘都唔肯瞓返，無計可施吓唯有八點幾餵佢飲第一餐奶再氹佢瞓。

瞓唔好艾菲自己都有D燥，但都如常爬起身做家務同煲粥仔，夠鐘就同燒腩仔沖涼，但呢個平日勁鐘意玩水嘅人居然唔合作勁扭計，不過向來強硬嘅艾菲就一於少理繼續，沖完涼就準備餵佢食粥仔。

可能因為太早飲奶太肚餓，所以燒腩仔沖涼後未著衫已經不停喊，艾菲唯有快手抱佢上high chair，點知佢已經餓到發晒狂連口水肩都唔畀我幫佢戴，搞咗一輪先終於settle down，初初食時仲不停喊住投訴艾菲餵得慢，但食咗半碗左右開始飽肚就開始玩嘢，一吞咗啖粥就伸隻手入口啜，啜完就捽面搞到成頭都係粥（佢一食到發忟就會咁），艾菲見到梗係拎開佢隻手叫佢唔好，佢知艾菲鬧佢就即刻合實個口唔肯食，好...唔食咪唔餵，艾菲即刻行開唔理佢。

艾菲行開無耐，燒腩仔就喊到拆天，佢喊咗五分鐘之後我再返去餵佢，佢乖乖地食咗兩、三啖之後又再玩嘢，艾菲今次決定打佢手仔等佢知唔可以咁做，第一次輕輕力打同鬧，佢居然望住我笑﹗咁唯有大力少少再打同鬧多次，佢終於知我鬧佢又合實個口唔肯食，OK...艾菲再一次行開唔理佢。

睇吓佢，喊到癲咗都堅持要食手指﹗

艾菲行開之後佢又好似上一次咁喊到拆天，等佢冷靜少少艾菲就返去再餵佢，但佢繼續食幾啖就玩嘢，艾菲又繼續鬧佢一路食粥一路放隻手入口，如是者重複咗幾次之後，燒腩仔開始越喊越癲，艾菲眼見碗粥都不過剩返幾啖，就索性唔再餵，同佢抹乾淨就放佢落playmat到喊飽去。

呢隻燒腩仔係playmat到喊喊吓，竟然識得爬去搵玩具玩當無事發生﹗嬲爆嘅艾菲當然唔畀佢咁做，拎走佢D玩具等佢知道唔乖乖地食粥係無玩具玩同無人會理佢，然後佢又繼續喪喊唔停﹗

發生咩事？同你好熟咩？做咩黐埋來？

係燒腩仔喊到唔肯收聲嘅時候，艾菲就坐咗係playmat另一邊同米高What's app訴苦，而呢隻仔見點喊都無人理之後就忽然自己收聲坐咗係到望住艾菲傻笑，呢個時候艾菲梗係扮睇唔到繼續What's app唔理佢啦，然後佢居然識得爬埋來艾菲身邊，仲懶嗲咁攬實艾菲唔放﹗嘩﹗真係無諗過七個月大嘅BB居然識得咁做﹗艾菲當然即時冧爆無再嬲佢啦﹗

後尾等佢冷靜落來，艾菲就抱返佢上high chair食果蓉，食完之後艾菲如常咁放佢落playmat玩，自已就入廚房洗碗，但洗洗吓碗居然見到有個小朋友係廚房門口喊，原來呢隻燒腩仔為咗唔好畀艾菲賣甩，千辛萬苦咁由playmat喊住爬過來廚房搵艾菲﹗（playmat同廚房有一段距離，佢平時爬出playmat唔係去搞風扇就係爬去high chair底，完全無諗過佢今次竟然不受引誘來到廚房門口搵我﹗）

見到佢咁樣，艾菲當然心到甜晒啦，出返廳攬實佢一齊玩咗陣，然後有人又好快失憶回復正常，繼續隔離飯香，見到艾菲有嘢食又眼甘甘咁望到實一實啦﹗