明明食咗成碗粥，仲要食到衰衰咁要艾菲出盡法寶氹佢食先食得完，結果放低佢係playmat玩，艾菲去清埋多咗出來嘅剩粥，呢隻燒腩仔見到艾菲有嘢食，即刻九秒九轉身爬過來艾菲腳邊，用好殷切嘅眼神望住艾菲，搞到艾菲忍唔住畀咗啖佢食，而佢食完就即刻好冧咁笑，仔...明明係同一碗粟米豬肉粥，分別只係媽媽呢碗已經等你食完等到凍咗...
食完多出來嘅兩啖粥之後，艾菲繼續清埋多咗出來嘅粟米（係唔係個個媽媽都會做呢個垃圾桶嘅角色㗎呢？），呢隻仔見到又即刻衝埋來眼甘甘咁望住艾菲，艾菲唯有畀佢食口水尾（食完又唔見你聽晒我話）...明明無牙根本食唔到，但啜吓lam吓都好嘅，真係無呢個小朋友收。
畀佢食咗陣都仲係唔夠喉死要望住艾菲...碌粟米，艾菲唯有拿拿聲食完佢，結果係有人無得食就發皮四，一味靠惡來投訴媽媽蝦佢啦，不過艾菲清理現場之後佢知點嘈都無得食就自動收聲繼續玩，well...都話佢係實際型來㗎啦﹗
事後同米高講返呢件事，佢話反正燒腩仔咁鐘意食大人D嘢食，咁不如第時將佢D粥放係大人碗到餵佢，但艾菲又唔想咁樣呃佢食嘢，等佢唔知自己要食自己嘅嘢喎，所以阿仔你都係死咗條心，乖乖地坐返係highchair食自己碗粥仔吧啦﹗
早d食大人野都好呀！可以訓練咀嚼能力及口部肌肉呢
回覆刪除[Ivy05/09/2013 23:39:01]係呀，所以我都開始唔打到D食物咁蓉畀佢食
hahah, 真係好為食呀~
回覆刪除[Ivy05/09/2013 23:38:34]佢望住我哋食嘢望到吞口水個樣仲好笑
隔離飯香? 唔好話bb, 連大人都係咁諗! wahahhaha
回覆刪除[Ivy05/09/2013 23:38:15]咁呢個又真呀，哈哈...
咁攪笑，等我都試下先
回覆刪除[Ivy05/10/2013 15:13:57]你都試吓吖，好多小朋友都係咁㗎，或者咁可以氹到南瓜仔食多D嘢
哈哈，個樣又真係幾可憐咁，好似好肚餓要食野....
回覆刪除個個都係咁，我個女見我食野佢又要食，但自己個碗就吾食，哼
[Ivy05/10/2013 15:15:21]係啦，所以我盡量安排佢食先我跟住先食，廢事佢唔肯食正餐
佢平時同我哋出街食飯，望住人哋食嘢自己係到吞口水個樣都好搞笑㗎﹗
我都覺得隔離飯的確香啲
回覆刪除[Ivy05/10/2013 15:16:10]其實我都會咁，不過無燒腩仔咁誇張啦
为食既燒腩仔好可愛！
回覆刪除[Ivy05/12/2013 00:55:26]嘻...多謝EE