七個月

Hello! 又係我燒腩仔每個月一次出場嘅時間啦﹗你睇吓我係唔係忽然大個仔咗好多呢，我宜家有18磅重，身長有68cm（自己度），嘻...媽媽話呢張大頭相分分鐘可以拎去報幼稚園呃人呀﹗佢話我已經唔係BB而係小朋友啦，唔...咁係唔係唔可以好似BB咁一喊就有人衝出來招呼我㗎？（艾菲：仔...你大個仔啦，有咩需要可以學吓開聲叫人幫你，唔使再一味靠喊啦﹗）

自從去完健康院之後我開始咗兩餐固體三餐奶嘅生活，媽媽又再一次調整咗我個schedule，宜家我每朝九點起身飲第一餐奶，照例玩一陣瞓返，之後十二點起身沖涼同食糊仔/粥仔，抖半個鐘等媽媽食埋嘢就到我再食果蓉，玩到兩點我就瞓第一次晏覺，到四點左右會起身飲第二餐奶，跟住玩到六點就會瞓第二次晏覺，瞓到七點半起身就食第二餐糊仔/粥仔（呢覺佢開始唔願瞓，但艾菲一定要佢瞓一陣，因為試過出街無瞓結果食食吓粥扭眼瞓唔食），然後我可以唔瞓同爸爸媽媽一直玩到十一點飲最後一餐奶先瞓（艾菲來緊目標係十點半畀佢飲奶然後捉佢去瞓）。

我宜家頭兩餐奶都仲係飲5.5安（本來想加畀佢，但加咗之後可能夠飽肚，佢兩餐固體就食到衰衰咁），臨瞓前一餐就飲7安（等佢飽D瞓），經過媽媽嘅特訓之後，我已經可以自己拎住奶樽飲奶唔使佢幫手，媽媽只需要遙遠望住我有無作反就得（艾菲：你可唔可以唔好成日飲到尾就拎個奶樽出來玩﹗），佢成日襯我飲奶就會行來行去做自己嘢，不過我有奶飲就唔會理佢做咩（嘻...懶媽特訓成功之後得到嘅回報）。媽媽見我拎奶樽拎得好，前排仲畀過鴨咀杯我用，但見我飲得超慢就轉咗畀飲管我啜，啜飲管好好玩㗎但啜完之後我會吐返D水出來搞到成身濕晒囉，嘻嘻...

我兩餐固體食物有時係糊仔有時係粥仔，每餐都食到一大碗，不過呢個月就少咗試新嘢，只係試咗火龍果、橙汁（飲完橙汁之後D便便勁軟身）、節瓜、波菜、豆腐、蛋黃、鯇魚同三文魚，宜家我開始鐘意妹嘢，媽媽煮親魚都唔會用攪拌機攪到變蓉，就咁畀D魚肉碎我自己妹，而且自從我食肉之後，佢每餐都會加D洋葱蓉落粥仔到一齊煲，話醫生教洋葱好有益可以食多D喎，我就覺得好香口幾好味，連爸爸聞到都讚香噴噴，媽媽仲間唔時加D淮山粉（用攪拌機個乾磨，將生淮山磨成粉）落粥仔到話健脾胃，呢個我就食唔到味所以無理到照食。

上個月我幾乎餐餐食到花面貓咁，但今個月我已經食得好靚仔啦，主要都係媽媽越餵越叻啦，佢知我肚餓會食得快D就密密餵，見我開始無心機四圍擰就會同我玩住食，有時放我最鐘意個公仔係側邊你一啖我一啖咁食（一定唔會畀佢掂到隻公仔），有時畀我自己拎住個碗食，有時又畀我拎枝匙𡙡自己畢來食（當然係我㩒住佢隻手畀佢扮畢啦），我覺得都幾好玩咪擘大口食埋去囉（艾菲：媽媽遲早畀你玩殘呀﹗）﹗

至於瞓覺方面，自從學識反身之後，我就鐘意係張床到碌來碌去自己玩唔願瞓，有時畀媽媽獨留係床仔，就會爬去床尾裝佢係到做乜，至於媽媽個睡袋防反身法話咁快已經畀我破解咗啦（艾菲：哼﹗好巴閉咩﹗）﹗我宜家好鐘意打側瞓同扒係到瞓，起初媽媽好驚我抖唔到氣，成日一見到就將我反返轉，但反吓反吓佢都無我咁好氣決定由我自由發揮啦﹗不過媽媽話我每次日頭玩得癲，夜晚就會瞓到半夜係到喊，所以佢話我唔可以玩得太狂野喎﹗

我今個月最大嘅進步係越坐越穩陣（可以坐十幾分鐘，尤其係有玩具玩時）同學識咗向前爬（開始真係爬唔係撲啦），宜家好努力咁練緊由爬變坐，畀多少少時間我，就快練成㗎啦﹗媽媽話我識爬之後要好似看牛咁睇住我，佢入一入廚房放低隻碗我已經可以爬咗去high chair底，所以淘咗兩道閘來招呼我...同埋我好好腳骨力好鐘意企㗎，自己扶住嘢都企到十秒左右﹗係唔係好叻叻先﹗

我呢個月除咗開始有少少認人，鐘意痴媽媽要佢陪住我之外（佢個人好實際，係有需要先搵媽媽，無乜事的話有其他人同佢玩就唔使要媽媽），都係繼續喪流口水同食手指，仲學識咗玩口水添，一得閒我就會練習吹口水波同「bu」口水，最近仲會叫阿bu同阿ba，媽媽成日問我阿bu同阿ba到底係邊個，問我係婆婆定爸爸（艾菲已經做足心理準備佢一定唔係叫媽媽先），嘻...呢個係秘密，我梗係唔會話佢知啦﹗

嘩﹗我呢個口水佬越講越長氣添，為咗奬勵你哋咁有耐性睇到呢到，等我送多幾張珍藏寫真畀你哋睇啦﹗

我好鐘意玩底褲韆鞦㗎﹗

七個月定八十，我細細個就鐘意車㗎啦﹗

嘻...我隻肉手係唔係好肥美呢﹗