透心涼

夏日炎炎，最好就是食雪糕降溫，所以家中的雪糕機已經長放冰箱，一偷到時間即跑進廚房整雪糕，最近新作便有豆腐雪糕和艾菲至愛的Cookies & Cream﹗

艾菲之前勁喜歡食金光杯裝豆腐雪糕，但去年陀著燒腩仔時很想吃卻發現它已絕跡市面（係...我大肚時基本上真係無乜戒口，過咗三個月之後乜嘢生冷嘢都照食），唯有的起心肝去自家製，在網上搜尋了大堆食譜做參考，最後終於成功用豆腐和豆漿做出了這個豆腐味極濃的雪糕，只是口感始終有點冰，所以下次要再想想怎改良才行。

至於艾菲至愛Cookies & Cream則是意想不到的零難度，自小便喜歡食Dreyer's的Cookies & Cream，每次減價都定必掃回家食，試過Haagen Daz的同款雪糕根本不是那回事（Dreyer's的cream味較重），無意間在網上見到食譜，發現只是普通雲呢拿雪糕加Oreo，於是便膽粗粗自己試，卻是一試即成功（雪糕個色比較黑係因為艾菲貪心落咗勁多Oreo），味道跟Dreyer's的一模一樣呀﹗

上星期見大少奶blog介紹芒果雪葩艾菲又跟著做（都話艾菲同米高係芒果怪啦），不需要雪糕機，只需將芒果切粒雪至冰凍再用攪拌機打即可（大少奶係教用blender打，但我就用咗整燒腩仔食物部機來逐少咁打蓉），連幾滴檸檬汁都skip了（因為屋企無檸檬），只落了一兩茶匙糖，跟米高兩人即打即食，實在是爽爽爽呀﹗

美人魚睡袋

燒腩仔：Oh! Baby! 我呢條美人魚靚唔靚呀？

事源有人每晚超級反瞓加踢被踢到飛起，又事源有人朝早起床換片時尿尿弄濕了全屋唯一一個睡袋（佢四個幾月大已經學識爆睡袋，所以只係得一個新買嘅睡袋可以用），但天氣實在太熱有人又太大汗不得不開冷氣睡，為免這個人半夜反瞓踢被冷倒生病，艾菲想過要他穿著冬天厚外套睡（但之前千辛萬苦先將佢哋收埋），亦想過較鬧鐘起床為他蓋被（呢個對勁懶瞓嘅艾菲來講仲難過搵返件厚外套出來），最終在艾菲想無可想下忽然靈機一觸，泡製了這條燒腩仔美人魚出來﹗

只是一張平日燒腩仔寧死都要踢開的冷氣被以及一個魔術貼肚圍，就解決了艾菲所有煩惱﹗先用被將他像捲春卷般捲好，再在外邊圍上肚圍就可以（圍係條腰到，封口在背面，但一定唔可以太緊，等佢仍然有足夠空間活動），測試了兩晚以後發現，無論他怎反瞓和雙腳怎踢都好，都解不開這個自製美人魚睡袋，實在是Very Good呀﹗

有duck睇啦﹗

為咗燒腩仔姨媽嘅婚禮，艾菲一家忙足一星期，好不容易終於回復正常生活，見天氣好米高又有假放，當然立即爭取時間帶燒腩仔去海港城睇鴨仔啦﹗

研究過朋友們嘅相，以及聽取咗雜誌嘅建議後，海港城露天停車場果然係影鴨仔嘅最佳位置﹗

睇吓燒腩仔見到鴨仔幾興奮﹗

艾菲仲好神心咁帶埋燒腩仔隻沖涼鴨去相認﹗

燒腩仔：乜鴨仔唔係用來咬㗎咩？

係停車場高抄影完之後，我哋都有落返去地面影，雖然人唔算好多但因為頭頂有cover比較暗，鴨仔合照出來嘅效果始終無咁靚

是日鴨仔們被鐵欄圍住無得攬住影...

本來想去埋show room睇鴨仔，但去到門口先知要等成個鐘，所以放棄去咗pizza express開飯，一心以為可以與鴨共進午餐，但原來只係見到鴨pat pat

艾菲：無嘢啱你食，你食鴨啦﹗

呢隻海港城鴨仔好似六月頭就會走，唔知佢下一站會去邊到呢？艾菲好想等燒腩仔大個D識行識走時再帶佢去睇多次鴨仔呀﹗

百家寶BB展

三天長假的另一項老早plan好的節目便是去逛BB展，因為有免費門票再加上有時間，所以一家三口專程過海去逛一逛。

根據去年的經驗，早已知道BB展沒甚麼好買，再加上Baby Kingdom媽媽們的情報，艾菲對今年的BB展完全是零期望。星期日一早出發，十點半左右到達，水靜河飛得惹來大批sales過來sell信用卡和影相plan，基本上參展商比去年更少，贈品亦不見得吸引，活動又不適合燒腩仔玩，明年應該未必會再去了。

既然一場來到，我們都慢慢逐條wing行，最後我們只是買了兩盒Holle糊仔（$44盒），以及在屈臣士counter買了全場最平的棉花棒而已（為的就是購物贈送的學習卡和顏色筆），其餘全部都是贈品，包括肚紋膏試用裝（送朋友啦），尿墊（又係送朋友啦），填色簿和顏色筆，貼紙，尿片試用裝，菓汁先生橙汁，學習杯，2號奶粉試用裝，Nikon相機匙扣（呢個艾菲自己最like），搓手液，Noddy Demo DVD（呢個都算OK有用），反斗城會員卡。

路過菓汁先生counter，like它們的facebook便有免費橙汁一包，見菓汁先生幾可受，就捉燒腩仔影張相，他早段時間都尚算合作，不過到後來就開始扭眼瞓和扭肚餓（明明係自己朝早唔飲奶），所以最終我們逛了個多小時便閃人了。

Birthday Party

難得一連三日的佛誕連weekend長假，艾菲和燒腩仔卻在感冒中渡過，但見燒腩仔病情不算太嚴重（佢只係有少少攰同流鼻水，艾菲就畀佢惹到又喉嚨痛又喪流鼻水，要帶住口罩做矇面超人），我們還是按原定計劃去玩，而第一天的節目便是去參加Ice媽媽的寶貝仔和寶貝女的3+1生日會。

因為小朋友開始長大無時停要放電，所以Ice媽媽今年便選擇了在黃埔的Play House開生日會，她join的是10個小朋友+10個大人的plan（1歲以下小朋友免費，extra大人另外收費），所以獲安排一間獨立房間（好似話20+20嘅plan只係場內劃個位出來無獨立房），至於食物和布置就要自備。

一進場便見到美美的生日小公主，至於生日小王子呢...就出了去外邊玩到不願回來...

Happy Birthday to 生日小王子&生日小公主﹗（好難先捉得齊3個小朋友一齊影張相）

第一次帶燒腩仔到這些遊戲室，基本上沒甚麼東西適合他玩，可能因為有點作病再加上環境太嘈吵（雖然係租場開生日會，但遊戲設施要同其他小朋友share，而生日會當天係佛誕節正日，所以現場超多小朋友超嘈，連艾菲自己去到都有D怕），他到達沒多久便有點扭計，其他叔叔姨姨抱他都喊（平日佢完全唔怕陌生人㗎﹗），甚至連生日小公主主動跟他玩他都不給反應呢（仔...你使唔使咁cool呀？）﹗

艾菲吃了些東西之後便帶燒腩仔到外邊的波波池玩（唯一一個畀3歲以下小朋友玩嘅area，但都有D明顯已經七八歲嘅小朋友走來亂跑亂跳都無職員stop，所以大人要企入去波波池整道人牆來保護D小BB囉），第一次玩波波池先在淺波處warm up 一下，燒腩仔都很快便適應開始肯爬。

見他warm up完便放他進波波池，他都算OK完全沒有喊（不過都無笑），但就超搞笑地全程扶實池邊囉...

完場時，Ice媽媽除了預備了回禮小禮物外，還特別淘了大量汽球回來送給出席的小朋友，而艾菲就替燒腩仔選了這個Pooh Pooh波了，雖然第二天已經開始漏氣，但都玩到幾天呀﹗

換季

雖說未食五月粽寒衣不入籠，但天氣如此熱都沒理由不換季嘛，花了大半天時間跟燒腩仔收拾衣櫃後，好不容易才將不合身的冬天衣服收起再拿出夏季衣服，因為有朋友給的舊衣服，所以都不用怎添上身衣服（真係著到三歲都仲有得著），只是下身褲仔要多買幾條。

之前聽聞深水埗有不少嬰兒衣服買，所以襯米高放假便一家三口去了逛，基本上檔口不及花園街多，但價錢偶爾會有驚喜，以及可以順道逛後面的玩具街（艾菲本身係個好鐘意睇玩具嘅人），逛了個多小時之後，艾菲只是花了$50買3條夏天款PP褲（艾菲見過有鋪頭賣$30一條﹗）。雖然明知是淘寶貨，但淘寶賣大約十元人民幣一條，連運費的話就肯定不只$50，所以沒其他東西一起淘的話，在鋪頭買現貨可以有壞即換絕對抵過淘寶。

而另一個item要為燒腩仔添置的便是襪仔，小朋友腳大得快，艾菲實在捨不得花太多錢去投資，但艾菲走遍花園街和深水埗，最平的都要十多元一對，那麼便淘寶好了，三元人民幣一對，比花園街賣的貨色還要靚，抵﹗

艾菲今次還順道淘了這對鞋仔襪回來試，買它全因聽過有媽媽讚它好用，去play house玩很多時都要除鞋，單穿襪仔很容易會跣腳，但這對鞋仔襪就不用除又防滑，艾菲見香港鋪頭賣最平都要廿多元一對（見過有正版賣四百幾蚊一對添﹗），現在淘寶都是8.3人民幣而已﹗Good!

基於買得多慳得多（運費）的原則（根本係買嘢嘅藉口），所以艾菲除了淘襪仔外也淘了兩樣cheap cheap玩具回來給燒腩仔玩，第一個便是艾菲小時候都玩過的配對蛋（左邊那幾隻），5.8人民幣有六隻，可以給燒腩仔認識不同圖案，而另一樣便是水畫毯連一枝畫筆（因為第一次送貨時漏咗枝筆，所以艾菲之後再幫襯時佢就送多枝筆畀艾菲補數），只需要入水到畫筆內便可以在水畫毯上畫畫，而毯上的圖案會在一會兒之後逐漸消失，相當適合小朋友玩又不怕弄污地方，艾菲見媽媽團購網賣一模一樣水畫毯連兩枝畫筆要$98一套，但淘寶只要17.6人民幣便可以了﹗

UT

由於艾菲本身身型比較矮小，所以向來都有買童裝著的習慣，一來貪size較稱身（尤其係褲同legging），二來貪較便宜，而艾菲最愛的兩間童裝店便是Gap Kids和Uniqlo，前者款式較多但價錢較貴，後者款式不算多但價錢較大眾化，最重要是兩間的衣服質地都不差兼襟著，所以燒腩仔出世後艾菲都間中會去逛逛尋寶，看看有沒有適合我倆的衣服（不過燒腩仔其實唔多使買衫，因為有朋友送咗一大堆，可以著到佢兩歲）。

今年夏天，Uniqlo又出了一系列UT，童裝款更有艾菲最愛的綠色怪物三眼仔和大眼仔（還有Mickey Mouse系列和Snoopy系列），最重要是只售$59一件，這個價錢在花園街都未必買到老翻啦﹗以前因為要上班沒太多機會著Tee而一直沒買過，但現在做了全職媽媽可以T-shirt牛仔褲四圍去，而且自己一個帶著燒腩仔出街都不宜穿得太lady，即女人要買衫總有十萬個理由囉﹗

童裝UT size由最細110碼至最大150碼，大概一歲左右便可以穿，嘻...即下年艾菲便可以買給燒腩仔，跟他一起穿親子裝出街了﹗不過未知是否太多像艾菲這種身型的大人買童裝呢，較型格的款式的150碼都總是無貨，找了幾間Uniqlo才終於讓艾菲買到三眼仔和大眼仔回家，見熊仔餅款都得意又忍不住買了一件。

艾菲買UT給自己之餘都有順道買了一套家居服給燒腩仔的呀（$79一套），其實Uniqlo Baby的設計真是貼心得值得一讚，除了60碼的BB衫一定是扣鈕款，以及招牌一定在外邊之外，就連大BB這些套裝款，都特別在衫和褲中間加一個扣鈕位，以防大BB太大動作時會露出肚臍，而最重要當然是價錢一點也不貴啦﹗

第一次剪頭髮

大概是遺傳自我們吧，燒腩仔出世時已經有很多頭髮，陪月姨姨每次跟他洗頭後都喜歡替他梳個蛋撻頭，而這個蛋撻頭亦慢慢變成了他的標誌之一，大愛這個蛋撻頭的婆婆更千叮萬囑吩咐艾菲別亂來，千萬不要隨便剪走燒腩仔的蛋撻頭...

其實艾菲老早已經打算自己跟燒腩仔在家剪頭髮（曾經叫過米高剪...但有D人就話佢剪不如帶燒腩仔去髮型屋剪囉...），因為艾菲小時候的頭髮都是公公剪（四年級先第一次出去畀人剪），除了省錢亦是一項不錯的親子活動，而且如此小的BB，又要出盡法寶哄他坐定定，又要怕他四圍擰和出手搞事，帶去髮型屋剪都未必剪得好，那麼跟自己在家亂來應該差不遠，所以某天路過家庭用品鋪見有$15剪髮較剪賣便買了把回家旁身。

買了較剪後一直想試試好不好用，但每次跟婆婆說都被她勸艾菲遲一點才剪，怕剪得不好下星期出席姨媽的婚禮時不好看，但望著燒腩仔的頭髮越來越長和厚，天氣也開始越來越熱，每天都玩到成頭汗，再加上睡醒後頭髮亂了的造型，艾菲實在很難忍手不去剪，所以早兩日帶燒腩仔回娘家時艾菲又重提剪頭髮一事，難得連公公都贊同燒腩仔頭髮太長要剪，那麼當然立即take action啦﹗

待燒腩仔飲完下午茶餐奶後，我們便開工剪頭髮，先用消毒酒精清潔較剪（因為成件事太突然，艾菲無拎到把剪頭髮較剪返去，只係用普通剪紙較剪），再把垃圾袋套在燒腩仔身上（係中間剪個窿就OK），然後便由婆婆負責抱住燒腩仔，公公在前面拿著沖涼鴨仔跟他玩，艾菲則拿著較剪躲在旁邊密密剪。

第一次剪頭髮的艾菲其實都有點不知所措，只是模仿髮型師般拿著梳和較剪亂舞，起初燒腩仔都有點怕尖叫想喊（其實笠垃圾袋時已經唔多like），幸好有公公婆婆合力又跳又叫的哄他，總算讓他冷靜下來乖乖合作，最後在公公從旁指導下艾菲手起刀落的喪剪起來，結果只需公公執漏一下便成功將燒腩仔頭頂的亂草剪好，嘻...艾菲覺得都剪得不錯吖（只係兩邊耳仔剪得有D唔對稱姐）﹗燒腩仔個look立即清爽了很多呀﹗

膽小鬼？

自燒腩仔從醫院回家開始，艾菲從沒刻意為他製造寧靜的環境，反而是為免他太易醒所以每晚開歌給他睡，好讓他習慣吵耳的聲音，有時更會在他睡著時開吸塵機吸塵，他向來對這些聲音都沒太大反感，甚至初回家時隔壁裝修鑽牆，陪月姨姨在廚房大聲劈豬腳，他都一於少理睡得勁甜。

不過自從他滿七個月之後，卻忽然變得膽小起來，某天聽到米高開吸慶機，他即時尖叫想哭，要艾菲抱著安慰才可以，母親節那天在娘家姨媽試新風筒，他更是嚇到全身發抖哭出兩粒豆大的眼淚，而最離奇便是他小時候頗喜歡的拉繩獅子公仔（一拉條繩入面D豆就會沙沙聲咁響），之前為了讓他乖乖坐在car seat上所以特別縛了在車內的扶手，他明明一直很喜歡還會自己伸手去拉，最近卻忽然因為它而每次坐car seat都喪喊（佢之前坐car seat從來唔會扭計，艾菲本來以為佢想黐大人先忽然唔肯坐，後尾發現每次都係一拉個公仔佢就喊到唔肯收聲先知佢驚）。

在剛過去的weekend，我們還未知道他害怕這些沙沙聲的高音頻，路過AEON見有沖涼玩具玩時還買了條拉繩魚給他，試玩時他其實有喊表示不喜歡，不過艾菲就誤以為他是剛睡醒扭計，結果照付鈔將它帶回家，然後便出現了以下的情景了...

回家後拆包裝給他玩，見到如此sharp醒的顏色當然喜歡得立即放進口試味啦﹗

之後我們便拉繩給他看沖涼魚的尾會擺動，這時「沙沙」聲響起，他開始神色凝重...

我們再拉一次繩然後給他玩，結果他開始尖叫想哭...

最後拿著魚尾還在擺動的沖涼魚，他嚇到連丟走沖涼魚都不懂...（睇見佢個樣都feel到佢好驚啦）

第二日沖涼時，艾菲再放沖涼魚到水盤跟他一起游水，可能沙沙聲在水中的音頻低了，燒腩仔又接受到喎（都真係算好彩，唔係就晒錢）﹗

其實艾菲一直不明白，到底燒腩仔為甚麼會忽然害怕這些聲音呢？是因為之前發生了甚麼事而艾菲不知道？還是他的聽覺最近才發展到懂得分辨不同音頻？遇到這樣的情況，艾菲到底應該怎樣去幫燒腩仔刻服這種害怕的感覺，還是採取逃避的方法盡量避免發出類近聲音呢？有沒有有經驗媽媽可以分享一下心得？