Trouble 2事件簿

呢幾日終於稍為得閒執吓D相，無意中搵返呢張畀艾菲命名為「兇案現場」嘅相，再加埋今日同燒腩仔好似食藥咁，一日之內總共嘈咗三大次，真係唔同佢開返個《Trouble 2事件簿》都對自己唔住呀﹗

話說過咗一歲嘅燒腩仔，開始識行識講嘢，做媽媽嘅艾菲滿心歡喜，諗住點都有大半年時間歎，好好享受佢最可愛嘅時光啦，點知說時遲那時快，佢人生中嘅第一個反叛期，話咁快就係17個月嘅時候突擊，O...No!!!乜Trouble 2唔係兩歲左右先開始咩？仲有成半年喎...唔信邪去問返好友Ice媽媽，得到答案係「歲半都差唔多啦...」，艾菲聽完即刻由天堂跌咗落地獄。

艾菲一直無諗過燒腩仔咁快Trouble 2，只係覺得佢脾氣越來越大，以為係情感發展越來越成熟嘅表現，見佢表達能力越來越強仲鬼咁開心，不過後來發現佢經常性出現忽然失常嘅行為，例如食麵畀枝叉佢食，但食食吓見佢用得唔好想同佢換過第二枝，佢會即時扭到拆天喪叫喪喊，又例如帶佢坐小巴時，忽然有人坐咗落佢前面個位，佢會突然大叫一聲似想鬧人擋住佢睇風景，又例如有時朝早做家務無聊時，艾菲不過想開收音機聽吓，佢會忽然撲埋來攬住艾菲不停喊，問佢做咩就只會重複咁講「唔係呀...」，再加埋之後學識嘅摞地，同埋開始主意多多要大人跟佢枝笛，真係想唔認佢已經踏入Trouble 2都唔得。



起初對住佢呢D失常行為，艾菲都幾束手無策，因為呢一秒佢仲好開心，下一秒可能已經癲咗，最絕嘅係佢一扭可以扭足一日，最經典一次試過為咗盞新裝係洗手間門口嘅感應燈，一起身已經扭咗成個上晝，要艾菲抱住佢仲要唔畀坐低，放低佢即攬實艾菲對腳指住盞燈喪喊，問佢係唔係驚定咩就只係答「唔係呀...」，無論艾菲點解釋同示範盞燈點用，佢聽完之後都係指住盞燈繼續嘈，幾經辛苦終於令佢收聲，以為跟住就會無事啦，點知瞓醒晏覺之後佢又來過，入洗手間poo poo完唔肯出返去，又不停指住盞燈喪喊...

最離奇係夜晚米高放工返來同佢玩盞燈時佢又無事喎，臨瞓前仲好開心咁同盞燈講「night night」添，米高就以為自己好叻成功搞掂咗個仔叫艾菲唔使擔心，點知第二朝起身佢又再一次指住盞燈係到嘈，只係嘈嘅程度無第一日咁嚴重，後尾同燒腩仔婆婆講開，婆婆話佢可能唔鐘意盞燈成日經過就著好似監視住佢咁，佢教艾菲貼個佢鐘意嘅貼紙落去分散佢嘅主意力，果然畀咗張跑車貼紙叫佢自己貼落去之後，佢無再為咗盞燈而嘈，只係每次經過都會好開心咁叫「車車」，仲逢親有朋友上來都第一時間介紹畀人知添﹗



對於D咁溫文嘅扭計，只係喊同攬住艾菲對腳唔放，艾菲當然仲有心情用分散注意力呢招來招呼佢，但對於D擺明挑戰大人底線，係到亂發脾氣亂叫嘅野蠻式扭計，naughty corner就應運而生，艾菲屋企嘅naguthy corner不過係一張平日用來同佢著鞋嘅Ikea凳仔，將佢放去大門口叫佢坐低就係啦，因為搵來搵去屋企都無第二個地方係無得畀佢八卦而又安全，所以就揀咗呢個無咁多嘢望同雜物嘅門口位畀佢（艾菲好反對困佢自己一個係房，驚會有意外同嚇親），之前一直都好少用得著，但呢排當然經常出動啦，仲要勁到有時佢扭扭吓都意識到自己衰咗時，艾菲叫佢過去坐凳就會自動波推張凳埋去坐，最爆笑係有次係姨媽屋企四圍跑畀艾菲話咗兩句，艾菲叫佢坐定定係張凳仔到唔好搞其他嘢時，佢竟然自己拎張凳仔去姨媽屋企個門口到坐以為艾菲罰佢囉﹗

頭幾次用naughty corner時，佢梗係有唔肯坐勁走佬啦，但艾菲個人都好堅持吓，每次都會捉返佢埋去，陪佢一齊坐低（佢坐凳艾菲就咁對住佢坐地下）， 等佢喊飽喊罷之後，再解釋佢知點解要坐係到，話佢知自己做錯乜，直至佢肯開口講「唔住，媽媽」為止，發展到宜家艾菲已經可以好放心要佢自己坐係到，艾菲就行開去梳化冷靜吓（好勞氣時都會係呢個位打畀米高呻吓，艾菲成日覺得個仔佢都有份，無理由呢D好嘢就自己獨食嘛），等大家嘅情緒都平伏返，艾菲先行埋去同佢講數，基本上如果係知衰嘅，一叫佢扭耳仔就會連埋「唔住，媽媽」一齊講，但更多時候係唔肯講再發脾氣，咁艾菲就會走開唔理佢直至佢冷靜落來為止，扭一次計隨時要重複幾次以上動作佢先肯開口認錯，所以話要教好一個小朋友，真係要花上無窮無盡嘅耐性同時間（但呢個其實係艾菲最差嘅弱項）。



至於燒腩仔，除咗同艾菲一樣咁硬頸同臭脾氣之外，都好醒目唔會就咁坐定定畀你鬧，試過再發脾氣唔work，試過走佬又係唔得，最近就開始會試吓軟功，第一招係扮可愛，係你鬧緊佢時整埋D奇怪表情引你笑，碌大對眼伸脷同自己偷笑，真係定力少D都畀佢KO返轉頭，而第二招就係扮辛苦，不停用手R條頸同塊面，R到自己紅晒損晒好痛苦咁樣，基本上艾菲見到只會火上加油更加忟，一手捉住佢隻手叫停，佢就會唔岔氣再發第二輪脾氣完全唔work，到第三招就係扮眼瞓甚至扮瞓著，頭一兩次都畀佢呃到放過佢抱佢落床瞓，但試咗幾次見佢落到床根本唔係瞓仲係到笑，艾菲就打死都唔會再中招，佢一扮瞓艾菲就會用盡方法叫返醒佢，等佢清醒返講好數先決定係唔係瞓。

最後都不得不提燒腩仔最瘋狂嘅摞地實況，燒腩仔婆婆講過艾菲細個都試過一次出街摞地（艾菲自己都有小小印象，但同婆婆講返出來嘅又好似有D出入囉）， 不過返屋企畀婆婆打到飛起之後就無再摞過，所以婆婆知燒腩仔都有摞地之後就提醒艾菲要嚴懲，只可惜呢個小朋友完全唔驚，發起癲上來就完全失去理智，瞓係地下亂叫亂典亂掃，最驚嚇係有幾次係highchair到發作，佢好似想爆安全帶而出咁企係到向後拗腰逃走，艾菲真係驚佢終有一次跌咗落地撞穿頭。

對於摞地嘅處理方法，艾菲原先都係好似處理佢亂發脾氣咁即時捉佢去坐naguthy corner，但最近發現摞地情況越來越嚴重，無論係邊到都會突然摞地，艾菲為咗要令佢知驚，佢一摞地艾菲就會即時行開唔理佢，如果係屋企艾菲會拖佢埋去naguthy corner個位到繼續摞（因為無咁多雜物，就算佢亂掃亂撞都無咁易受傷），跟住就會當佢無到咁做自己嘢，等佢冷靜返想起身艾菲先會埋去好惡咁鬧佢，再大力打佢兩吓手板（其實好唔想用體罰呢招，但就咁鬧佢真係當你無到，唯有限住自己打兩吓就一定要收手），等佢識驚認錯講「唔住，媽媽」，如果係街到摞地呢，艾菲就會即刻同佢講bye bye然後作狀行開，企去D艾菲望到佢但佢又見唔到艾菲嘅位（都好彩佢暫時摞咗兩次嘅都係D無乜人嘅商場，如果人多就唔攬實佢走都唔得），第一次婆婆用呢招招呼佢時，婆婆一擰轉身佢已經起身拖返實婆婆，但換轉艾菲時佢就好型咁要繼續摞，到發現艾菲真係唔見咗先會收聲起身去搵返艾菲，而艾菲就會拉佢埋一邊話咗佢先再繼續行街（佢哋記憶力有限，等到返屋企先話已經唔記得咩事，只會覺得係艾菲發癲亂鬧人）。

面對住一個癲起上來超級野蠻嘅燒腩仔，講真艾菲好多時都覺得頂佢唔住，唔知自己幾時會畀佢激到爆血管， 不過唔知係自己已經慣咗定堅持真係有用呢，最近呢個月嘅情況就算持續都叫做有D改善，有時艾菲會學Ice媽媽教扮聽唔明佢講乜耍走佢，例如佢去親商場見到入錢會郁嘅車都會扭埋去玩軚盤，畀佢埋去玩唔緊要，最死係玩完唔願走，有次經過艾菲就先聲東擊西叫佢望第二D嘢，到佢發現架車係到叫時就扮聽唔明快步帶走咗佢，等佢無機會嘈，而有D位明知佢有機會發癲嘅，艾菲都會先小人後君子咁同佢講定數，例如開餐前話定佢知下午茶食蛋糕只可以食一件，而且食完就要飲水，要佢答艾菲得先有得食，當然十次有三四次仲係會摞食加喪喊推開水杯唔飲水，但至少有六七次係成功合作完全無扭，而且艾菲係佢每次發完癲之後都會好阿Q咁安慰自己，一星期總有一日係發癲，今日癲完之後幾日就會好乖，否則次次同佢硬碰硬的話，艾菲都唔知自己仲有無命捱埋佢個terrible 3。