話說復活節假前，收到妹豬媽同小檬媽嘅邀請出來玩，雖然當日係燒腩仔公公生日，艾菲應承咗早D返娘家同佢慶祝，不過難得有機會畀燒腩仔同其他小朋友玩， 艾菲寧願辛苦D走兩場都想出來同大家一齊玩呀，而且野餐地點佐敦谷離艾菲屋企好近，去完玩仲有時間畀小朋友返屋企休息吓先趕下場，真係超perfect呀﹗
當日朝早落咗場雨，好彩大家都堅持繼續出來玩，亦可能因為呢場雨，公園無之前放假去時咁墟冚，至少我哋都搵到個好闊落嘅位坐，仲有位畀小朋友踢吓波吹吓泡泡，而我哋早咗到就先帶燒腩仔去遊樂場warm up吓。
艾菲想畀燒腩仔試玩呢個韆鞦好耐，難得呢日唔使點排隊就捉咗佢上去坐，但就點都估唔到坐咗落去之後係連樣都見唔到囉...再睇返先知呢個韆鞦原來係for 5歲以上嘅小朋友，well...5歲小朋友都已經可以自己坐普通韆鞦啦，仲要整住呢個盔甲來做咩？
見燒腩仔都開始進入狀態，我哋就帶返佢去草地到同大家玩，平日係屋企都有踢開波嘅佢，見到波即雙眼發光咁走埋去踢，後來小寶都join埋一齊玩，不過佢拎起個波時唔小心整污糟咗燒腩仔塊面，小寶媽即刻好細心咁幫燒腩仔抹返乾淨，其實小寶媽唔講粗心大意嘅艾菲都完全無留意添（大家睇艾菲仲顧住影相就知啦，嘻...），可能我哋都一早預咗佢會玩到好污糟，所以真係覺得無乜所謂，小寶媽你唔使覺得唔好意思㗎﹗
踢完波同其他小朋友一齊玩吹泡泡，但唔知點解燒腩仔同tarebaby玩玩吓忽然企係到發呆，而小豆媽就好有心思咁帶咗D波來扭波波劍畀大家玩，最讚係小豆真係好乖咁幫手做人肉速遞，將D波逐個送到各個小朋友嘅手上。
之前幾次出來玩，燒腩仔都未係好識同其他小朋友交流，到今次真係大個仔咗啦，叫佢同小檬一齊拎住貼紙搭膊頭影相又肯（多謝小檬媽送出嘅靚靚貼紙﹗），叫佢謝謝小豆借個波佢玩都有講，Like!
同大家一齊玩玩吓，忽然爬咗上中間個渠蓋位好開心咁唱歌喎，如果佢好大聲咁唱嘅話，成件事一定會變得好技安囉﹗kakaka...
襯佢哋肚餓，捉齊佢哋埋來影個大合照先﹗
開餐啦﹗（張相係食到一半艾菲先得閒影）我哋每人負責整D嘢食，結果就成為好豐富嘅一餐﹗至於波哥個人雖然來唔到，但波媽整嘅muffin好快已經畀小朋友們掃晒﹗
食飽飽就去咗join車迷組一齊玩車，特別嗚謝豬脾借出佢心愛嘅車畀燒腩仔一齊玩﹗
豬脾媽好努力咁吹泡泡畀小朋友玩，燒腩仔一直都交唔到戲，最後只係畀到呢個「你當我是浮誇吧...」over晒嘅表情，即係你睇吓隔離小檬同肚B幾咁自然呢。
之後就由小檬媽充當幼稚園老師，趕鴨仔咁捉佢哋排隊玩，不過燒腩仔唔多合作第一時間走咗去。>.<
然後佢哋明明玩緊泡泡，唔知點解忽然又成班走晒去遊樂場玩，睇見佢哋一個跟一個咁排隊玩呢個滑梯真係好得意，燒腩仔仲玩玩吓學小B同小檬咁坐係樓梯到等我哋同佢影相添，肚B媽見到即刻叫肚B坐低，大家出來玩咗咁多次，今次終於同到肚B影張靚靚合照啦﹗YEAH！
燒腩仔：我今日玩得好開心呀﹗大家下次再出來一齊玩吖﹗
我哋係遊樂場玩咗陣，燒腩仔開始無電就走先啦﹗見到佢玩得咁開心，又無乜點扭計發作（只係睇見大人食嘢時嘈住要食但畀佢又唔食呢吓有D玩嘢囉），艾菲都玩得好盡慶，返到屋企時幾乎要同佢一齊瞓晏覺叉吓電先可以趕下場呀﹗
沒有留言:
張貼留言