雜果雪糕by Yonanas

呢幾日D天氣又濕又焗，燒腩仔日日都熱到好似跌咗落水咁，搞到我哋都唔係好願出街，寧願留係屋企歎冷氣食雪糕來避暑，真係好彩宜家多咗部Yonanas，想食雪糕話都無咁易，將D水果切件放冰箱雪一晚，第二日放落機就即刻有得食，除咗前排燒腩仔有幾聲咳時停咗兩星期（廢事咁衰要佢有得睇無得食啦），我哋又開始每隔幾日又整雪糕食嘅日子，屋企個冰箱幾乎長期有冰咗嘅水果存貨係到，真係唔覺唔覺連平日唔係好食水果嘅艾菲都食咗好多落肚。



第一機試咗香蕉乳酪雪糕，跟住出場當然係艾菲同米高大愛嘅芒果啦，上次將乳酪雪咗做冰粒之後，出來口感有D似雪葩，今次試吓直接加落部機到整芒果乳酪雪糕，嘩﹗出來效果超香超creamy超好味呀﹗



緊接住出場嘅有艾菲第二最愛嘅菠蘿，不過同熱愛椰汁嘅米高講起，佢就成日提住Pina Colada呢款雞尾酒，為咗同時滿足埋佢嘅胃口，艾菲就買咗包椰奶返來諗住加落去，另外仲有舊同事強烈推介嘅桂格盒Oats & Honey Cereal，諗住燒腩仔夠大食得蜜糖可以畀佢試吓都唔怕。



見包椰奶真係好水，怕就咁倒落去未開機已經流返晒出來，所以都係早一晚同D菠蘿一齊雪咗做冰粒先，然後開機前將D材料輪流放落機到，部機果然好強勁連D cereal都全部碎到，仲要分布得好均勻吓，呢個Pina Colada雪葩甜甜地，加埋cereal嘅口感簡直無得頂﹗



因為有菠蘿多咗出來，於是艾菲就將佢哋就咁放晒落部機到整雪糕，可能係無咗椰奶呢類水份嘢嘅關係，整出來效果好creamy好雪糕，最正係食落仲有啖啖果肉，大愛呀﹗



之後貪得意，用青蘋果，青堤子同啤梨試咗個青色系雪葩，好順手又加咗D cereal落去等佢有多D口感，艾菲其實好鐘意青蘋果嘅香，不過就幾怕佢嘅酸，好少成個放落口食，今次諗住用啤梨同堤子去中和吓，點知...整完之後畀青堤子D味搶晒，但徵酸帶甜嘅雪葩都幾清新幾醒胃嘅。



而最後出場呢，就有香蕉士多啤梨雪糕啦﹗前排朋友上來探燒腩仔，買咗又甜又大粒嘅士多啤梨畀艾菲做手信，不過士多啤梨太易變壞，次次都要趕頭趕命咁將佢哋倒落肚唔可以慢慢歎，不過宜家就無有怕啦， 將佢哋連埋出晒黑點嘅香蕉齊齊放入冰箱雪一晚，第二日放落Yonanas，就變咗右邊呢碗靚靚雪糕，Yummy﹗



整咗一大輪之後，艾菲發現只要唔一次加咁多多水份嘅水果落去，出來嘅效果都會似軟雪糕咁creamy，但如果全部組合嘅水果都係多水份的話，出來嘅效果就會似雪葩多D，不過對於屋企個為食燒腩仔來講，無論雪糕定雪葩佢都一樣咁鐘意，次次都要食到個碗乾淨晒先肯收口，好彩用Yonanas整雪糕可以自己控制份量，鐘意食幾多就整幾多出來，唔似以前用普通雪糕機一定要整成L先搞得郁，咁就一定唔會食到超標over晒啦﹗



另外亦有唔少朋友問艾菲部機難唔難清潔，其實每次用完之後，要洗嘅就只有上面呢幾個parts，因為D材料無奶無糖無蛋無油，基本上用清水一沖已經好乾淨，而且拆同安裝都好容易同安全，如果唔係燒腩仔怕部機開著時D聲（開機時點都有D摩打聲嘅），艾菲都打算叫佢幫手放D材料落部機到一齊親子玩吓，唔...反正呢部機肯定長玩長有（艾菲宜家已經期待緊整荔枝同西瓜雪糕啦），或者等佢遲D愛上呢部機時，再慢慢訓練佢做小廚神啦﹗

香蕉乳酪雪糕 by Yonanas

～～～～～～～～～～～～～～～～

Yonanas簡介

Yonanas是一個嶄新又有趣的新廚房設備，只需簡單步驟，Yonanas能輕易將冰凍的水果，也無需加奶加奶油，便做出美味、低成本、味道像雪糕般的健康甜品！更可讓你發揮創意，加入各種水果材料和配料，配搭出無窮無盡的味道! Yonanas 安全可靠 BPA FREE及有SGS SAFTY CERTIFICATES，絕對安心使用！

購買地點

city'super (尖沙咀、銅鑼灣)、Log-on (又一城)、永安百貨(太古)

網址：

http://www.yonanas.hk/