19個月

話都無咁快又過咗一個月啦﹗呢個月嘅最大變化係我忽然做咗表哥囉﹗嘻...我每次見到表妹D靚相都會勁叫「妹妹」㗎﹗不過姨媽其實係因為妊娠毒血症而提早開刀拎表妹出來，好彩表妹好叻女出世時識喊唔使插喉，但姨媽就唔多好彩D嚴重嘅症狀係生完先浮出來（正常應該生完自動無事），所以兩母女都未出得院，媽媽就成日要頻頻撲撲咁去醫院探姨媽同幫佢哋打點D嘢，睇見佢咁辛苦同心煩，我唯有整個浮誇肉緊笑樣氹返佢開心啦﹗



扯到咁遠都係入返正題先，自從去完健康院之後，我今個月嘅飲食都有所調整，由之前一日五餐變咗做一日四餐，扭都無扭嘅情況下就戒咗臨瞓前枝奶，早餐就聽姑娘建議飲七安奶之外，再食吓包，cereal，或者糊仔咁等我飽肚D，午餐晚餐就繼續食一個大人碗嘅飯餸，下午茶都係食小小零食加水果。

雖然下面門牙隔離嘅兩隻牙仔終於有影，但等咗大半個月都只係出到半隻，所以得六隻半牙嘅我依然唔係好咬到D咩，再加上我麻麻like食街外嘢，媽媽唯有繼續煮BB專用餐畀我食（艾菲：唉...勁無奈﹗想偷吓懶都唔得﹗），不過見到大人食嘢都會嘈住要食埋一份，主要都係扭食菜咁啦，但黑麻麻或者食落有渣嘅嘢，我係會即刻吐返出來唔食㗎﹗

除咗用學習杯飲奶同自己畢嘢食之外，我係用叉拮食物呢方面有好明顯嘅進步，就算會碌來碌去嘅堤子都拮到啦﹗而媽媽都開始畀我學用普通水杯飲水，雖然我好多時都會玩嘢專登倒晒D水出來，但我實情係識得就咁飲嘅﹗（艾菲：要篤住你先飲得好囉﹗）



至於瞓覺呢就因為連瞓覺奶都唔使飲，媽媽索性十點就放我落床瞓，無乜嘢嘅話都會好快瞓著，等佢可以安安樂樂咁睇吓《食平DD》，但有時玩得太hyper就會搞到十一點幾先肯瞓，但無論幾點瞓我都會係九點半前起身，有時會跟爸爸一齊七點幾起身添，不過媽媽一定會逼我即刻瞓返等佢可以瞓多陣，晏覺就一日瞓一次，每次兩個鐘左右，如果出街嘅話，我瞓到半個鐘媽媽都收貨唔會再逼我瞓㗎啦﹗



宜家出街成日行兩步就扭大人抱，但見到D盲人扶助地板或者斜路樓梯之類又會嘈住要落返地，入字腳嘅問題無乜點改善過，由於出街太多嘢睇行得唔專心，成日行行吓會成個趴咗係地下到，不過上幼潛時玩跨欄，上斜同落斜都完全無問題，仲試過唔扶任何嘢自己行到上一級樓梯添，而同馬騮好好朋友嘅我，呢個月愛上咗攀爬，宜家係屋企唔係擒high chair就係擒梳化，有次試過想擒枱但畀媽媽stop咗囉﹗（艾菲：去到公園又唔見你肯擒吓D鋼架﹗）

講嘢方面叻咗好多，宜家成日跟大人口水尾講嘢，媽媽每次講完電話收線我都會跟住佢講「bye bye」，佢催我快D時又會學佢講「go go go」，佢叫嫲嫲時我又會跟佢講「奶奶」，媽媽見我咁鐘意講嘢，索性教我講埋自己全名，講到但要佢逐隻字提先得囉，而我都開始唔再剩係講單字，開始識得「謝謝媽媽」連住一齊講（暫時只係講到謝謝媽媽，謝謝爸爸或者謝謝其他人係未得，因為謝謝媽媽好緊要，唔講無得食無水飲無人抱，kakaka...）。

因為我越講越多嘢，媽媽已經唔太記得邊D係新學識嘅字，只係知我終於講到個「公」字，氹到阿公鬼咁開心，識講「豬豬」同「咯咯雞」，仲會跟媽媽一齊扮豬叫添﹗今個月媽媽數數字我已經唔再理佢，最多都係講「7」同「8」來應酬吓，但就忽然識答自己住「18」樓（之前只係講到8字），A-Z依然係無心機學，不過就成日唱《ABC Song》頭兩句連歌詞（佢平時唔肯學ABC，完全唔明點解又會唱到D歌詞出來囉），到後期仲進展到乜嘢音都可以用來唱，仲試過用個「係」字來唱（唱到十足粗口咁，搞到艾菲都唔知stop唔stop佢好），最近熱播就係「阿婆阿婆阿婆阿，阿婆阿婆阿婆阿...」。



係幼潛老師嘅番心教導下，再加上媽媽返屋企之後同我努力練習，我已經學識咗吹泡泡同吹BB，小肌肉都變得越來越靈活，係媽媽嘅輔助下，我吸到印仔，貼到貼紙，開到衫夾，收玩具時仲鐘意學大人咁，一隻手拎兩件玩具（講緊積木size嘅玩具），另外除咗識講「我愛媽媽」呢句咁冧嘅對白之外，今個月仲學識咗「攬攬」呢個動作，媽媽每次話「攬攬」，我都會行埋去攬實佢㗎﹗

自理能力方面除咗餵食有些少進步，我宜家開始識得認返自己嘅物件，仲會嘗試講「我嘅」同做拍心口嘅手勢（都係幼潛教嘅），學識咗幫爸爸挽鞋，食完飯飲完水會識得閂埋蓋再講「謝謝」等媽媽收返D餐具，做完錯事畀媽媽話完會自己講「唔住」，不過potty training就畀媽媽話我有D退步，宜家開始唔肯定時定候乖乖坐大人廁所poo poo，每次都要搞到真係急先同媽媽講「唔唔」，結果好多次都趕唔切坐上大人廁所已經poo咗，學wee wee更加畀媽媽用「無賴」呢兩個字來形容我，唔肯係廁所wee（坐定企都唔肯），有wee都唔會出聲，就算媽媽用最傳統方法幫我戒片，直接除片由我賴呢招我都毫無改善，仲衰到由第一次有少少驚，到後期會好興奮咁玩D wee wee（艾菲：其實你可唔可以唔好咁核突？）。




最後又係講情感發展嘅時候啦，怕陌生人同陌生地方嘅情況有少許改善，遇到陌生人硬晒態dup低頭扁咀嘅情況無乜再出現，出街開始會主動叫D差唔多年紀嘅小朋友，但如果成班姨姨叔叔圍住佢都仲係會扮怕醜，dup低頭射哩眼四圍望再偷笑。

至於脾氣依然臭，一有唔滿意就會尖叫同摞地發癲，仲試過入電梯或者坐車時，唔滿意人掂到我或者阻到我視線而大叫一聲來鬧人（呢吓真係樣衰到呢...），naughty corner已經係坐到我都慣嘅地方，有時我知自己衰咗畀媽媽叫我埋去坐都會自動波咁坐落去繼續喊，有試過走佬但畀媽媽加監，於是試吓出新招扮可愛啦，點知都係唔work畀媽媽繼續訓話（艾菲：忍笑忍到我呢...），不過媽媽話都要幫我講返句公道說話，我呢個月其實明顯無之前咁蠻不講理，只要佢多D解釋我知佢做緊咩同之後會做咩（例如係廚房煮飯，就要逐個step講佢知我切蘿蔔，切條再切粒然後畀D實物佢睇，等佢覺得自己有份參與），我都肯合作扭少咗好多啦﹗