燒腩仔細個時超怕吸塵機，每次開機佢定必嚇到面青，有次仲試過喊到扯拪蝦添，起初艾菲都怕咗佢盡量少用，但好友Ice媽媽就勸艾菲要堅持用來等佢適應，好應同佢講呢個世界無可能樣樣嘢都就晒佢，你屋企唔用咁出街人哋用呢，仲有其他機器發出嘅聲呢，真係驚得幾多樣？於是係佢15個月大左右艾菲又拎返部吸塵機出來日日用（之前為咗佢而要用掃把掃地，真係辛苦到呢...），只係用咗兩日終於令佢唔再爆喊，但每次見到都會EE哦哦一輪想艾菲唔好開機，但只要艾菲堅持佢都無乜嘢。
每次開機前，艾菲都會放燒腩仔上high chair睇《Mickey Mouse Clubhouse》，一來佢見到Mickey心情會好D，二來佢唔會係地下四圍走阻住艾菲清潔，但吸咗一排之後發現燒腩仔開始對部機有D興趣，終於發現佢都係有轆嘅朋友，仲有一段時間會指住佢好開心咁叫「車」添，於是艾菲間中都會就咁放佢坐係playmat到吸塵，發現又OK唔抗拒喎，有時仲會企係playmat邊到裝出來望艾菲搞咩添﹗
然後係一個好悶熱嘅下午，艾菲因為遲遲都未做完家務同唔到佢瞓晏覺住，為免佢坐坐吓扭眼瞓，又見佢宜家都有歲半大，除咗好鐘意跟艾菲口水尾講嘢之外，仲開始會學大人做嘢，成日拎D紗巾來抹地，一見到地下有塵又會即刻執畀我哋，咁艾菲吸完塵之後就問吓佢有無興趣幫手啦，點知佢真係好開心咁點頭話「好」，只係教佢拎住枝管就已經識得自己向前向後咁吸，真係想唔請呢個童工都唔得呀﹗咁就等艾菲去片睇吓佢正式開工時嘅表現又係點先﹗
開工大吉﹗唔...笑住咁吸塵，睇來佢真係好鐘意呢份工喎﹗
最欣賞佢呢吓，識得踎低身去吸枱底，真係學到艾菲十足呀﹗所以話小朋友嘅模仿力真係好強勁﹗
吸完枱底仲識得倒後行拎返枝管出來，真係好鬼醒﹗
要吸第二到啦，轉個靚灣先﹗
呢到都要吸乾淨D先得﹗
對於第一次吸塵嘅童工來講，艾菲都相當滿意佢嘅表現，熄咗機之後仲不停提醒艾菲要將部機擺好勁有手尾添，所以見佢做到辛水辛汗咁辛苦嘅樣，艾菲就即刻奬佢去浴盤到游個靚水順便沖身，希望佢下次幫手時都可以keep住呢份熱誠，唔好變咗搞破壞就得啦﹗
沒有留言:
張貼留言