Artscow相片手機殼

大家還記得Artscow嗎？自從之前一股Artscow相簿熱後，艾菲一直有收到它們的email，間中都會開來看看，繼之前光顧過它們曬5R相，今次又以超抵價光顧了它們的相片手機殼，收件後更是忍不住「嘩﹗嘩﹗」聲讚好呢﹗

其實之前都有收過它們有關相片手機殼減價的email，不過艾菲的陳年iphone 4已接近斷氣mode，實在不值得花錢做個不知還可以用多久的手機殼，所以便沒多大興趣去理會，直至最近燒腩仔婆婆和燒腩仔公公都分別轉用了智能手機（呢兩個老人家為咗可以同個孫whatsapp同玩line潮到呢...），又碰巧在四月再次收到它們的減價email（至5月2日），只需US$9.9便可以free shipping做一個相片手機殼，那麼便決定做兩個手機殼給他們當做今年的母親節和父親節禮物吧。



做相片手機殼送給兩個老人家，主角當然是燒腩仔啦（下年再做就可能要加埋有表妹嘅相啦）﹗只需選好相片再自行調較大小即可，如有需要更可以自行加字加圖案，但說來簡單還是需要花點心思，例如公公婆婆的S3和Note 3都是在正上方有相機位，有部分相放進去後便會「批」了燒腩仔的頭而不能用，所以最好還是選一些人樣在正中的會較好。

由於艾菲的account內還有些cash dollar，最終兩個相片手機殼只需US$11.97便可以直接送達艾菲家門，即大約四十多元港紙一個而已，而且5月2日confirm order，5月8日下午已經收到件，上網看過快圖美都要接近二百元一個，還要等一個月才可收貨呀﹗重點是製成品一點也不兒戲，還要附送兩張mon貼，絕對是抵X10000呀﹗如果艾菲之後confirm換電話，都一定會襯它們再做減價時做一個給自己用的呀﹗

Yummy Yummy Food (15-19M)

本來這篇blog應該在燒腩仔18M時就出，但放著放著的就放到現在都快要20M了，雖然燒腩仔至今仍然只得八大隻牙，不過艾菲都開始讓他嘗試食大人食物，只是他不太喜歡街外的食物，艾菲才一直要煮BB餐， 亦由於他越來越大，休息時間也越來越少，對食的要求又不是太高（佢除咗前排出牙無胃口之外，其餘時間都係艾菲煮乜都話好味全部倒落肚），再加上艾菲最近添置了不少新玩具（麵包機，壓麵機，雪糕機同Staub啦...），基本上都沒再花太多心神去煮一些特色BB餐，只要每餐有菜有肉就算，所以下一篇就更加不知會等到何年何月何日才可出街了...



燒腩仔越大個，艾菲就越煮越懶，最近煮給他的BB餐都是「一鑊熟」，即準備好材料就全部放進煲仔，無論是白飯還是意粉類，都是將它們煮熟撈勻就算，節省不少時間之餘，最重要是出來效果相當不錯，燒腩仔超級喜歡完全沒投訴，而這個南瓜芝士汁撈西蘭花雞蓉米仔粉就是一個最佳例子了。

Trouble 2事件簿

呢幾日終於稍為得閒執吓D相，無意中搵返呢張畀艾菲命名為「兇案現場」嘅相，再加埋今日同燒腩仔好似食藥咁，一日之內總共嘈咗三大次，真係唔同佢開返個《Trouble 2事件簿》都對自己唔住呀﹗

話說過咗一歲嘅燒腩仔，開始識行識講嘢，做媽媽嘅艾菲滿心歡喜，諗住點都有大半年時間歎，好好享受佢最可愛嘅時光啦，點知說時遲那時快，佢人生中嘅第一個反叛期，話咁快就係17個月嘅時候突擊，O...No!!!乜Trouble 2唔係兩歲左右先開始咩？仲有成半年喎...唔信邪去問返好友Ice媽媽，得到答案係「歲半都差唔多啦...」，艾菲聽完即刻由天堂跌咗落地獄。

艾菲一直無諗過燒腩仔咁快Trouble 2，只係覺得佢脾氣越來越大，以為係情感發展越來越成熟嘅表現，見佢表達能力越來越強仲鬼咁開心，不過後來發現佢經常性出現忽然失常嘅行為，例如食麵畀枝叉佢食，但食食吓見佢用得唔好想同佢換過第二枝，佢會即時扭到拆天喪叫喪喊，又例如帶佢坐小巴時，忽然有人坐咗落佢前面個位，佢會突然大叫一聲似想鬧人擋住佢睇風景，又例如有時朝早做家務無聊時，艾菲不過想開收音機聽吓，佢會忽然撲埋來攬住艾菲不停喊，問佢做咩就只會重複咁講「唔係呀...」，再加埋之後學識嘅摞地，同埋開始主意多多要大人跟佢枝笛，真係想唔認佢已經踏入Trouble 2都唔得。

雜果雪糕by Yonanas

呢幾日D天氣又濕又焗，燒腩仔日日都熱到好似跌咗落水咁，搞到我哋都唔係好願出街，寧願留係屋企歎冷氣食雪糕來避暑，真係好彩宜家多咗部Yonanas，想食雪糕話都無咁易，將D水果切件放冰箱雪一晚，第二日放落機就即刻有得食，除咗前排燒腩仔有幾聲咳時停咗兩星期（廢事咁衰要佢有得睇無得食啦），我哋又開始每隔幾日又整雪糕食嘅日子，屋企個冰箱幾乎長期有冰咗嘅水果存貨係到，真係唔覺唔覺連平日唔係好食水果嘅艾菲都食咗好多落肚。



第一機試咗香蕉乳酪雪糕，跟住出場當然係艾菲同米高大愛嘅芒果啦，上次將乳酪雪咗做冰粒之後，出來口感有D似雪葩，今次試吓直接加落部機到整芒果乳酪雪糕，嘩﹗出來效果超香超creamy超好味呀﹗



緊接住出場嘅有艾菲第二最愛嘅菠蘿，不過同熱愛椰汁嘅米高講起，佢就成日提住Pina Colada呢款雞尾酒，為咗同時滿足埋佢嘅胃口，艾菲就買咗包椰奶返來諗住加落去，另外仲有舊同事強烈推介嘅桂格盒Oats & Honey Cereal，諗住燒腩仔夠大食得蜜糖可以畀佢試吓都唔怕。

童工

燒腩仔細個時超怕吸塵機，每次開機佢定必嚇到面青，有次仲試過喊到扯拪蝦添，起初艾菲都怕咗佢盡量少用，但好友Ice媽媽就勸艾菲要堅持用來等佢適應，好應同佢講呢個世界無可能樣樣嘢都就晒佢，你屋企唔用咁出街人哋用呢，仲有其他機器發出嘅聲呢，真係驚得幾多樣？於是係佢15個月大左右艾菲又拎返部吸塵機出來日日用（之前為咗佢而要用掃把掃地，真係辛苦到呢...），只係用咗兩日終於令佢唔再爆喊，但每次見到都會EE哦哦一輪想艾菲唔好開機，但只要艾菲堅持佢都無乜嘢。

每次開機前，艾菲都會放燒腩仔上high chair睇《Mickey Mouse Clubhouse》，一來佢見到Mickey心情會好D，二來佢唔會係地下四圍走阻住艾菲清潔，但吸咗一排之後發現燒腩仔開始對部機有D興趣，終於發現佢都係有轆嘅朋友，仲有一段時間會指住佢好開心咁叫「車」添，於是艾菲間中都會就咁放佢坐係playmat到吸塵，發現又OK唔抗拒喎，有時仲會企係playmat邊到裝出來望艾菲搞咩添﹗

然後係一個好悶熱嘅下午，艾菲因為遲遲都未做完家務同唔到佢瞓晏覺住，為免佢坐坐吓扭眼瞓，又見佢宜家都有歲半大，除咗好鐘意跟艾菲口水尾講嘢之外，仲開始會學大人做嘢，成日拎D紗巾來抹地，一見到地下有塵又會即刻執畀我哋，咁艾菲吸完塵之後就問吓佢有無興趣幫手啦，點知佢真係好開心咁點頭話「好」，只係教佢拎住枝管就已經識得自己向前向後咁吸，真係想唔請呢個童工都唔得呀﹗咁就等艾菲去片睇吓佢正式開工時嘅表現又係點先﹗

幼潛＠18M

轉眼間，燒腩仔已經開始了第二期幼潛課程，因為觀塘新centre那邊會較方便我們的關係，艾菲便跟他轉了過去上堂，面對新環境新老師和新同學，艾菲起初都擔心那陣子超怕陌生的燒腩仔會爆喊，可能要花點時間才能適應，幸好他第一堂哭了幾聲後見到玩具立即收聲，而可能有了上一期上堂的經驗，第二堂已經完全沒有不習慣的問題，到第四堂艾菲嘗試放下他一個在課室，自己離開一會兒去洗手間，他都完全沒有扭亦沒有找艾菲，只是自顧自地在課室玩玩具。



之前還一直猶豫要不要繼續讓燒腩仔上幼潛，但見到他上課時的投入，艾菲便覺得超值得，每次玩玩具後老師唱收玩具歌，他都會第一時間幫忙將玩具放進玩具箱，之後跟大家說早晨，點名和唱歡迎歌，燒腩仔都可以跟著老師指示去完成，艾菲只需坐在旁邊陪著他就可以。

母親節快樂﹗

雖然母親節已過，但艾菲還是想跟燒腩仔在這裡跟各位靚媽補說一聲母親節快樂﹗

第二年跟燒腩仔一起過的母親節，依然沒收到任何母親節禮物（好明顯係人哋爸爸無心準備啦﹗花D心思教個仔整D小勞作都唔肯﹗），不過就成功爭取放半天假兼不煮飯，讓艾菲能夠安心睡到接近中午十二時才起床（唔好以為艾菲真係瞓到咁多個鐘，實情係燒腩仔當晚半夜漏尿喊醒，由凌晨四點半搞到六點都仲唔肯瞓返），對比上年頂多睡到十一點便要爬起身煲粥，都算是一個大進步了﹗要掌聲鼓勵第一次煮BB飯便成功的米高才行﹗（嘻...唔知畀多D掌聲，可唔可以剩機叫佢煮多幾餐呢？）

雖說沒收到禮物，起床後叫燒腩仔親親艾菲又被斬釘截鐵地拒絕，不過他在米高指導下，說完「我愛爸爸」之後，都有跟艾菲說「我愛媽媽」的﹗（呢個阿爸係唔係過份明挑機吖，有乜理由教個仔係母親節講我愛爸爸﹗）然後我們便到了樓下商場小店靜靜地吃了餐美味日本菜慶祝，今年艾菲因為燒腩仔姨媽的事特別感觸，所以能夠一家三口平平安安齊齊整整聚在一起已經自覺感恩。

19個月

話都無咁快又過咗一個月啦﹗呢個月嘅最大變化係我忽然做咗表哥囉﹗嘻...我每次見到表妹D靚相都會勁叫「妹妹」㗎﹗不過姨媽其實係因為妊娠毒血症而提早開刀拎表妹出來，好彩表妹好叻女出世時識喊唔使插喉，但姨媽就唔多好彩D嚴重嘅症狀係生完先浮出來（正常應該生完自動無事），所以兩母女都未出得院，媽媽就成日要頻頻撲撲咁去醫院探姨媽同幫佢哋打點D嘢，睇見佢咁辛苦同心煩，我唯有整個浮誇肉緊笑樣氹返佢開心啦﹗



扯到咁遠都係入返正題先，自從去完健康院之後，我今個月嘅飲食都有所調整，由之前一日五餐變咗做一日四餐，扭都無扭嘅情況下就戒咗臨瞓前枝奶，早餐就聽姑娘建議飲七安奶之外，再食吓包，cereal，或者糊仔咁等我飽肚D，午餐晚餐就繼續食一個大人碗嘅飯餸，下午茶都係食小小零食加水果。

雖然下面門牙隔離嘅兩隻牙仔終於有影，但等咗大半個月都只係出到半隻，所以得六隻半牙嘅我依然唔係好咬到D咩，再加上我麻麻like食街外嘢，媽媽唯有繼續煮BB專用餐畀我食（艾菲：唉...勁無奈﹗想偷吓懶都唔得﹗），不過見到大人食嘢都會嘈住要食埋一份，主要都係扭食菜咁啦，但黑麻麻或者食落有渣嘅嘢，我係會即刻吐返出來唔食㗎﹗

Blog Blog BB Picnic @ 佐敦谷

由於艾菲娘家突然發生咗D事，再加上米高公司又來peak season連續兩星期都無假放，搞到艾菲呢幾日唔係兩頭撲，就係屋企用一日做晒幾日嘅家務，好多嘢想blog都有心無力，就連最想blog嘅Blog Blog BB Picnic都要拖到宜家先有時間寫，唉...早知就寫咗呢篇先回顧其他假期嘅節目啦﹗

話說復活節假前，收到妹豬媽同小檬媽嘅邀請出來玩，雖然當日係燒腩仔公公生日，艾菲應承咗早D返娘家同佢慶祝，不過難得有機會畀燒腩仔同其他小朋友玩， 艾菲寧願辛苦D走兩場都想出來同大家一齊玩呀，而且野餐地點佐敦谷離艾菲屋企好近，去完玩仲有時間畀小朋友返屋企休息吓先趕下場，真係超perfect呀﹗



當日朝早落咗場雨，好彩大家都堅持繼續出來玩，亦可能因為呢場雨，公園無之前放假去時咁墟冚，至少我哋都搵到個好闊落嘅位坐，仲有位畀小朋友踢吓波吹吓泡泡，而我哋早咗到就先帶燒腩仔去遊樂場warm up吓。



艾菲想畀燒腩仔試玩呢個韆鞦好耐，難得呢日唔使點排隊就捉咗佢上去坐，但就點都估唔到坐咗落去之後係連樣都見唔到囉...再睇返先知呢個韆鞦原來係for 5歲以上嘅小朋友，well...5歲小朋友都已經可以自己坐普通韆鞦啦，仲要整住呢個盔甲來做咩？