當艾菲發現唔見咗張八達通時，米高已經九秒九返轉頭幫艾菲搵，但係呢個逼爆自由人嘅東薈城入面，又點會有可能搵得返吖，艾菲唯有即時打電話報失張八達通，不過入面嘅餘額應該唔使三個鐘就畀人用晒唔會有錢退得返（D錢要報失後三個鐘先會被lock）。
最後大澳我哋無去到，因為等巴士條人龍長到等一粒鐘都唔知上唔上到車，但為咗盡快離開呢個傷心地，我哋就匆匆咁上咗巴士去機場頹逛。
好唔開心，因為張八達通好日都唔會有過一百蚊嘅餘額（都好好彩艾菲張八達通唔係自動增值），次次都係用到負數艾菲先會再入一百蚊入去，點知呢朝米高忽然好豪咁幫艾菲入多一百蚊入去，怕艾菲係大澳出返來唔夠錢搭車會好麻煩，點知就出事...
好唔開心，因為張八達通由讀書時用到宜家十幾年，一直以來艾菲都係習慣放佢係褲袋從未試過出事，早幾日先畀菲媽話艾菲咁樣放褲袋遲早出事，艾菲仲好大聲咁話唔會有事，結果今次真係打爛齋鉢...
好唔開心，因為燒腩仔扭計嘅原因實在太無喱頭，都不過係食飽飯準備同佢去換片，我哋唔放佢上BB車住廢事又扣又除條安全帶，佢見米高推走架車又唔肯畀佢一齊推，就發晒癲咁一路喊一路追架車（已經唔係第一次咁樣扭，搞到艾菲有時都好怕帶BB車同佢出街），如果佢無扭計艾菲肯定會擰轉頭望多兩眼睇清楚有無漏嘢...
雖然唔見八達通都係好小嘅事，正如米高安慰艾菲咁講，唔見咗電話或者銀包咪仲麻煩，宜家咪當破財擋災囉，不過艾菲都唔開心咗成個下晝，去到機場都無mood行街（但都有買嘢呢吓勁喎>.<），拎咗大相機出街都無影到一張相，直至回程時見到對面呢個小朋友同爸爸玩巴士個扶手都可以玩到咔咔聲，艾菲先終於畀佢溶化咗，乜衰嘢都即刻唔記得晒啦﹗
沒有留言:
張貼留言