17個月

話都無咁快，我今日又大多一個月啦﹗媽媽話我呢個月唔覺唔覺咁送咗好多驚喜畀佢，佢講嘅嘢我好多都聽得明仲識得跟住佢意思去做，又越來越識得表達自己嘅想法，平日嘅對答入面開始越來越多人話，真係好似忽然大個仔咗好多咁。

今個月我依然係一日五餐，早晚兩餐飲七安奶，午餐晚餐食一個大人碗嘅飯餸，下午茶就食小小零食加水果，暫時都係食BB專用餐，雖然見到大人食飯時我會喪扭，仲進展到識得揀食咩唔食咩添（艾菲：宜家已經唔可以用幾粒白飯hea佢，又好彩佢暫時都係要綠色嘅菜多），搞到媽媽出街食飯一定要帶定較剪預備隨時剪嘢畀我食，但媽媽試過兩次趕唔切煮飯試吓畀我成餐食街外食物時（只係烏冬同意粉再加少少相對清淡嘅餸），我又會食得比平時食BB專用餐少同差，媽媽估我應該係唔習慣食濃味嘅食物啦﹗（艾菲：佢咁樣真係想偷懶煮少餐都唔得﹗）

我宜家除咗已經成功戒奶樽之外，亦都終於學識自己畢嘢食，早晚兩餐飯仔都係自己食，媽媽只需要間中出現幫我清潔吓，同幫我筆乾淨最尾食剩D飯粒就OK，不過筆麵就比筆飯差D會跌到周圍係，畢湯就更加係mission impossilble，但媽媽已經收晒貨勁讚我叻仔，佢話我如果可以學埋用叉拮食物來食就更perfect啦﹗



至於瞓覺呢就無乜點變，每晚十點半食完奶就瞓，第二朝九點半左右起身，半夜兩三點間中都會醒吓喊吓，但好快又會自己瞓返，媽媽宜家都索性唔較鬧鐘起身，由我呢個人肉鬧鐘自動叫佢起身算，晏覺都係瞓一覺就得，可以瞓一個鐘至三個鐘不等，主要視乎我出咗街玩定係屋企無乜嘢做啦。



我宜家除咗識行仲識得跑，因為我成日都好心急行行吓就想跑，所以好多時會行到腳踭唔掂地，搞到媽媽除咗要擔心我左腳有少少入字腳嘅問題之外，仲要驚埋我慣咗腳踭唔掂地嘅話大個會行得好醜怪，佢宜家都盡量一邊行一邊數「一、二、一、二」來逼我慢慢行，不過都係時work時唔work囉（艾菲：唉...佢真係行到超心急好難要佢慢慢行，有無有經驗媽媽可以賜教吓？），另外我呢個月仲學識咗倒後行同踏步添（仲未識原地踏步，會踏踏吓走咗向前）﹗



媽媽話我呢個月學嘢嘅速度係神速，眼耳口鼻我終於全部都學識晒啦，連英文字母嘅配對puzzle都係一教就識（暫時只係教咗A-F），上幼潛時點名會舉手同講「到」字（但要人提先做），老師帶大家講早晨會自動波鞠躬，大人問我乖唔乖時會喪點頭，問係唔係「叻叻」時會學大人做豎起手指公嘅動作（但隻手指公整極都未彈得起囉，kakaka...），媽媽講「咜吒」會即刻望鏡頭等影相（當然只限心情好時啦），出街時同我講「拖住」又會遞高隻手畀大人拖，玩車仔識得分車頭車尾一定唔會調轉行，玩玩吓仲無師自通咁學識幫D車排隊排一條直線同泊車。



宜家我睇《Your Baby Can Read》同《Mickey Mouse Clubhouse》會有反應，唔再成舊飯咁呆坐high chair，仲自己睇睇吓學識晒成首《If you happy & you know it》嘅動作添（艾菲：最正係Hurray呢吓會跟住好high咁wow一聲叫出來，真係笑到我哋肚痛），媽媽見我咁鐘意聽歌仔就決定執返清屋企個琴附近D雜物，一得閒就同我玩二人大合奏（艾菲：因為佢唔會肯坐定定聽我彈，所以我會放佢上來由佢亂拍，我就唔理佢照彈），但爸爸聽完嘅評語係「左邊位人兄比較煩燥」，完全唔識欣常囉﹗不過我係唔會理佢㗎，想彈嘅時候就會走埋去做彈琴嘅動作，等媽媽開琴畀我練習吓﹗



自理能力方面除咗餵食有進步之外，我呢個月仲學識咗分類，執玩具時識得將玩具分類放返去啱嘅盒入面，入好盒後仲記得佢哋放邊，會好乖咁自己擺返好等媽媽做少D嘢，而potty training嘅進度亦相當良好，呢個月幾乎日日都成功係大人廁所便便，只有一日因為同咗爸爸講「poo poo」但畀佢當我講笑無理先出意外，宜家媽媽一叫我「唔唔」我就會自己行入廁所，日日都係差唔多時間有便便，但出街就可能會忍到返屋企先便便，媽媽話來緊天氣暖D會教埋我企係到小便，佢已經物色緊一張啱我嘅凳仔啦﹗



講嘢方面畀婆婆讚我叻咗，宜家大人叫我叫人時，唔使提都會叫到對方個名（艾菲：但就專登叫艾菲做阿ba跟住自己偷笑囉，因為佢問我拎嘢食時係一定唔會叫錯㗎﹗），而自從學識「謝謝」呢兩個字係好有用之後，每逢我見到大人食嘢而我又想食，又或者想搵大人幫我拎玩具時，我都會不停講謝謝等佢哋幫我，媽媽通常都會係呢D位試吓引導我講一句完整句子出來，咁...只要係我發到音嘅我多數都成功嘅...

我到宜家都仲係好鐘意將D嘢歸類咁叫，最新嘅歸類情況係英文字母全部叫「N」（間中會將O同Q叫做「O」），數字就全部叫「5」，至於新學識嘅單字就有馬馬，錶錶（少少歪音變咗做bell bell），餅餅，眼，pat pat同bye bye，雖然好多音仲未講到（例如阿公會叫咗阿姐，父父又會叫咗boo boo），但都開始肯試跟大人口型講嘢﹗



最後又輪到講我最唔願講嘅情感發展啦，好嘢係我呢個月好叻仔咁克服咗三大個心理障礙，肯玩韆鞦同搖搖馬，唔再怕吸塵機，亦終於接受到BB嘅物體，上星期媽媽帶我去探啱啱出世嘅表妹仔時，起初我有D怕同唔鐘意佢㗎，媽媽叫我「呵呵」佢仲耍手擰頭，但望吓望吓又覺得佢幾得意，見到媽媽抱住表妹仔幫佢掃風都無再呷醋，之後仲主動叫公公抱我去BB床到睇表妹仔瞓覺添﹗

至於唔好嘅嘢就係我越來越怕醜同驚死（艾菲：好彩呢排唔使in幼稚園），唔會再主動撩陌生人玩，畀人撩時更加會暱埋係爸爸媽媽後面，除咗試過唔肯入屋入班房同入電梯，仲試過有次係屋企樓下扯住媽媽隻腳唔畀佢行近個叔叔同嬸嬸，如果媽媽帶我行條路線同平日唔同都會即刻喊驚唔肯行，要媽媽不停話「唔使驚」先敢拖住佢慢慢行。



另一樣唔好嘢亦係媽媽最唔滿意我嘅就係我嘅脾氣越來越臭，宜家有咩唔順我意就會即刻發癲喪扭，仲會惡樣惡聲咁鬧人，例如媽媽拎碗飯畀我因為要吹返凍而遲咗我都會鬧，同表姨玩車時佢接唔到我又會鬧，但調轉頭畀大人話的話就會即刻低頭扁咀眼紅紅好委屈咁嘅樣，而媽媽最impress係有次帶我去playroom玩時，有兩個姐姐專登將媽媽砌畀我玩嘅屋仔推跌（人哋只係貪玩而咁做），我即刻嬲到企係後面不停咁用BB話鬧佢哋，媽媽見到即刻覺得要檢討係唔係自己平日對我太嚴太惡我先會有樣學樣，佢宜家除咗盡量忍住唔同我訓話咁多，試吓用軟功來教我work唔work，仲專登買咗本《發脾氣》嘅故事書返來同我講（艾菲：呢本書好多媽媽想買所以成日無貨，我都搵咗差唔多大半年，到最近先終於搵到呀﹗），希望終有一日會見到成效啦﹗