冰...震...震...震...

最近天氣熱到不開冷氣的話燒腩仔就會像跌了落水般全身濕透（其實係唔係小朋友寧捨誇呢？艾菲都好大汗但都無佢咁勁），最適宜就是來個冰震雪條降降溫，看了上期新假期介紹的自製椰皇雜果冰後，艾菲便決定照抄來個椰青雜果冰（其實係好鐘意飲椰青嘅米高話椰青水多又有肉食抵過椰皇），在樓下惠康買個椰青，找大力士米高劈開後倒出椰青水，再刮少少肉和隨意找些生果切粒，一併倒進雪條模雪成冰就可以，雪條底部有濃濃的椰青味，但頂部則被其他生果的味道搶了，唔...莫非下次要淨椰青水不加生果才行？

繼上次的芒果雪葩之後，艾菲又跟大少奶blog介紹做了菠蘿雪葩，在AEON買了原個菠蘿回家切粒雪至變冰（格咗幾間超市嘅價錢，AEON嘅菠蘿都算係全城最抵），然後加幾滴檸檬汁，再用攪拌機逐少打至變蓉即可，可能今次雪的時間比較長，又可能艾菲本身like菠蘿多過芒果，所以艾菲覺得這個菠蘿雪葩實在是無懈可擊地正，絕對是消暑良品呀﹗

Artscow 5R相

之前收到Artscow email，US$2.99可以free shipping曬30張5R相，除開即$1都不用便有一張，這個價錢就算屋邨影相鋪都做不到啦，碰巧艾菲儲落一大堆相要曬，立即叮一聲決定join。

因為平日用電話亂影的相實在不能登大雅之堂做5R大相，所以都花了一些心機才選好相片，還特別挑選了幾張送給四大長老留念，然後便要將相片分兩批save在艾菲兩個Artscow account（優惠只限一個ip和account用一次），再挑選合適的size（如果個file太細唔適合曬5R佢會有warning提你），紙質（有matt紙同普通令面紙揀，呢個係大部分相鋪都無得揀又或者要加錢先有得揀matt紙）和入coupon code付款即可。

由於艾菲其中一個account有cash dollar找數，最終只需付US$2.99便可以曬60張3R相，實在是抵抵抵抵抵﹗﹗﹗還要星期三confirm訂單，星期五已經寄到信箱﹗重點是質素絕對不差幾乎跟快圖美的差無幾（其實之前都擔心過會唔會好似相簿咁印到甩色咁）﹗如果再有下次而艾菲又再儲夠相的話艾菲一定會再join的﹗

Taggies

艾菲小時候，最愛就是摸毛巾邊，每晚睡覺都一定要摸著毛巾邊才能入睡，直至讀大學住宿舍才逼著戒掉這個習慣，但兩條毛巾至今依然健在，雖然毛巾邊已經被摸欄（艾菲曾經叫菲媽幫我車返畀我繼續摸，但菲媽就唔肯陪我癲），艾菲還是喜歡攬著它們入睡，即使米高經常笑艾菲這個習慣低能，他還是小心翼翼不敢整爛艾菲這兩條寶貝毛巾（因為佢知整爛咗我肯定殺人都似）。

直至燒腩仔出世，艾菲內心一直都想他像艾菲一樣有類似摸毛巾的辟好（係唔係好變態呢...），所以發現朋友給燒腩仔的衣服內有條熊仔安撫巾，艾菲便在他四、五個月大的時候嘗試給他摸（因為佢唔係好肯啜奶咀，見佢隻手瞓覺時要搵嘢捉住，所以想試吓毛巾得唔得），結果他不是將它丟在一旁就是放進口裡，到他六個多月大開始懂得爬，卻是每次放他在大人床便會爬去拿艾菲的千年毛巾，艾菲當然立即阻止怕他整爛啦，然後跟婆婆提及此事之後，婆婆便不知從那裡買了條幾乎一模一樣的毛巾給燒腩仔（艾菲條毛巾都係我婆婆買），等我們兩母子不用爭毛巾。

收到婆婆送燒腩仔的毛巾後，艾菲洗乾淨便立即給燒腩仔用，但他居然只對毛巾...的招牌有興趣﹗﹗﹗後來某天艾菲洗碗時發現他居然可以在playmat坐了十分鐘都沒有離開原位，出去望他便見他正在把玩玩具上的假招牌﹗﹗﹗之後艾菲加倍留意燒腩仔這個習慣，發現他每次都是有點眼瞓時，就會靜靜地把玩這些招牌的物體，無論是紗巾，玩具還是衣服的招牌他都喜歡。

有見及此，艾菲便醒起之前在Baby Kingdom見過有媽媽找整條毛巾都是招牌的post，亦碰巧在淘寶找布書時無意間見到有本有很多招牌的布書，立即上布書的品牌Taggies的網頁研究了一輪，知道BB摸招牌的辟好是相當common，所以Taggies出產的所有玩具和布書都會有很多招牌在上面，讓喜歡摸招牌的BB摸過夠，不過他們的產品在香港好像沒有代理（艾菲係香港真係未見過），所以要買不是到amazon買，最方便和快捷的便是淘寶。

艾菲看中了Taggies的安撫巾，在淘寶買都不過是20人民幣一條，所以想也沒想便決定淘回來，收貨後見它質地超柔軟，招牌的質地更是各有不同（well...鐘意摸嘢嘅人就會識分），洗乾淨後給燒腩仔試用，他果然大愛（艾菲真係無估錯﹗），自此以後每次要他睡覺，艾菲塞完奶咀給他後便會塞這條安撫巾到他手，讓他培養出睡意後便可以直接連人帶巾放進床自行入睡（自從佢學識反身之後已經好耐無試過乖乖地自己瞓，每次都要艾菲抱住佢暗到佢就來瞓著先可以放佢落床瞓），至於婆婆送他那條毛巾便收歸艾菲擁有，艾菲現在又可以重過摸著毛巾邊入睡的日子了﹗呵呵呵﹗

同場加映：



淘安撫巾時艾菲都好順便咁淘咗本Lamaze布書返來，28元人民幣一本（Aeon睇過要百幾蚊一本），本來艾菲一直唔多捨得買布書，但見燒腩仔每次見到我哋睇書佢都好想睇埋一份，就連平日出街食嘢個餐牌佢都唔肯放過，至衰屋企D美語世界送嘅米奇書仔係咬得爛，唯有淘返本點咬都唔爛嘅布書返來畀佢玩吓。

我唔係無牙佬﹗

話說，媽媽上星期有一日出咗去半日，搞到我中午果餐無得食粥仔要轉飲奶，然後佢下午三點幾四點返到來，我一瞓醒見到佢就即刻撲埋去攬住佢狂喊，佢初初以為我掛住佢所以冧爆咁款，但後尾發現我喊咗半個鐘都唔收聲先開始覺得唔對路，拿拿聲走入廚房整嘢畀我食，然後我已經一路食一路喊來投訴佢餵得慢，點知佢居然餵餵吓停晒手係到眼甘甘咁望實我，仲嘗試用隻無嘢食嘅匙𡙡撬開我個口，後尾仲伸埋隻手指入我口撩來撩去，然後就自己係到偷笑...喂，你有無搞錯呀﹗想餓死我咩﹗

食飽打咗個飽嗝之後我終於收聲（艾菲要澄清吓，其實佢已經食咗成大碗糊仔同果蓉，都仲話自己唔飽喊住要繼續食），媽媽就笑住咁同我講話我唔再係無牙佬啦，佢話佢由我六個月開始日等夜等終於等到我出牙喎，仲鬼咁開心即刻whatsapp爸爸同婆婆報喜添，然後佢成個下午幾乎咩都唔做，只係好專心咁嘗試撩開我個口來影相，我當然唔會陪佢一齊癲啦，所以佢搞咗我個口成日都係乜都影唔到﹗

等到夜晚爸爸放工返來，媽媽又第一時間同爸爸介紹我隻牙，佢不停話我隻牙好尖好利好拮手，然後爸爸又學佢咁伸隻手指入我個口到撩，跟住又要我show隻牙畀佢睇，唉...我隻牙係用來咬嘢，唔係用來表演㗎，你哋再搞佢我收錢㗎﹗之後爸爸就同媽媽講我隻牙只係出咗個角所以咁拮手，媽媽就好無聊咁問出個角先會唔會係歪咗打橫生，好彩爸爸都無佢咁好氣只係應佢一句乳齒無乜所謂就無再理佢。

到咗第二日，我諗住媽媽搞咗一日之後，應該唔會再打我隻牙主意啦，點知...就係我扭緊計唔想瞓晏覺時，媽媽竟然變態到專登整喊我等我打開個口，佢就襯呢個時候影低咗我隻牙﹗﹗﹗大家見唔見到呀？牙肉中間有條白色線呀，呢條線就係我隻牙啦，你哋快D話睇到啦，我好怕媽媽話無人睇到又要整喊我來畀佢再影清楚D呀﹗

艾菲有say:

知道個仔出牙，做媽媽當然好興奮啦﹗不過出牙緊接而來就係牙仔屎同輕微發燒...

Touch wood好彩燒腩仔都唔係好嚴重，最近poo poo比平日多咗同唔靚（平日佢一日一次，固體狀好靚仔），但有酸宿味嘅暫時只得一次，輕微發燒亦只係試過一次兼好快就退，至於情緒同脾氣都無乜依然食得瞓得玩得，艾菲無帶佢睇醫生因為知道睇醫生都未必幫到佢，但話唔擔心就一定假嘅，宜家一得閒就同佢探熱，每次poo poo都好緊張咁望吓有無事，知佢辛苦但都做唔到D咩幫佢，只可以祝佢快D打完呢場硬仗隻牙快D出晒來啦﹗

發完燒之後隻牙又出多咗啦，燒腩仔要繼續加油呀﹗

夏水禮

由上次帶燒腩仔去沙灘之後，不是艾菲有事忙，就是天氣不穩行雷閃電，好不容易終於等到上星期打風來臨前的天清氣朗，天氣酷熱就天氣酷熱啦（35度呀﹗），立即約公公婆婆一起去游水，替燒腩仔進行下水禮﹗

艾菲當天一早便收拾好行裝帶燒腩仔回娘家（天氣又熱個媽咪袋又特別重，返到去艾菲自己已經溶咗），跟燒腩仔食過公公愛心粥仔後便換衫出發，我們去的是大埔公眾泳池，艾菲跟婆婆本來想帶燒腩仔去家庭更衣室換衫，不過入去後聞到陣陣廁所味於是便撤退去了女更衣室（反正有兩個人，而且我哋本身都換好泳衣就無乜所謂啦）。

離開更衣室進泳池時要經過淋水處，燒腩仔見狀已經開始有點怕，死命的捉實抱著他的婆婆，出到去泳池更加是不太願意落水，艾菲本身都打定輸數預他會喊足全程，但還是帶燒腩仔去了BB池試，艾菲讓他坐在池邊只有腳仔接觸到池水，見他OK沒反抗便跟他一起坐進水裡，然後我們讓他穿上水泡，我們在旁邊輕輕的拍水和撥水，起初他仍是不太like要捉實我們，不過就沒有任何發出任何哭叫聲。

公眾泳池唔畀影相，呢張相係艾菲冒住畀人鬧嘅情況下偷影，所以唔笑都收貨啦﹗

後來見他都適應了泳池的環境，我們便帶他到BB池較深水的另一邊玩（0.3米深），warm up後他開始會笑，更會自己站起身，勁喜歡在水中漫步（唔知點解係佢係水入面行到好似識行咁），抬起他雙腳在水中浮來浮去更會笑到咔咔聲呢﹗

我們玩了一小時左右便離開，期間艾菲和公公更有時間輪流到訓練池游水（終於可以游返水，真係好爽呀﹗），不過離開時跟燒腩仔換衫就有點「輪盡」（睇來都要再研究下之後同佢去上游水班時得我哋兩個要點換衫先得），回到婆婆家跟燒腩仔洗澡和餵下午茶奶後，這隻燒腩仔已經累得即時睡著了。

Yummy Yummy Food (7-8M)

燒腩仔自六個多月開始兩餐固體三餐奶的生活，到現在都已經快將兩個月，艾菲每天不是煲粥仔就是開糊仔，雖然燒腩仔一直沒有投訴，無論艾菲給他甚麼都全部掃落肚，但艾菲自己就覺得有點悶，所以最近多了些時間便開始研究還可以給他吃甚麼，一於跟他搞搞新意思讓大家食／餵得更開心。

正餐：

替代粥仔或糊仔的正餐食物，最容易想到的便是薯蓉，簡單易做不麻煩，加點洋葱碎下去更是惹味，連艾菲試味後都覺得very good呢﹗

食譜：

材料：
薯仔一大個（燒腩仔兩餐份量）
BB奶適量
蔬菜蓉適量
肉蓉適量

造法：
1. 先將薯仔批皮切粒蒸熟
2. 襯熱將薯仔壓成蓉
3. 加適量BB奶將薯蓉攪至軟滑
4. 加入蔬菜蓉和肉蓉即成

第二樣試的新煮意便是星星粉，燒腩仔六個多月時路過Toyrus見到享氏有星星粉便貪得意買了包，包裝上寫明七個月便可以吃，艾菲一心打算等燒腩仔七個月出牙後煮給他吃，但他至今八個多月仍是一名「無牙佬」，艾菲掙扎了好一會兒以後還是煮了給他試，雖然不是全部都有經過咀嚼便吞落肚，但明顯看得出他很like邊食邊踢腳（但唔知佢其實係鐘意食星星粉定鐘意個粟米紅蘿蔔豬𦟌湯底）。

食譜：

材料：
星星粉1/3碗（發大之後有大半碗）
蔬菜蓉適量
肉蓉適量
湯底適量（如果無可以就咁用水都得）

造法：
1. 滾水煮星星粉五分鐘
2. 將星星粉過冷河
3. 用湯底煮星星粉和肉蓉蔬菜蓉五分鐘
4. 熄火焗十分鐘讓星星粉索水入味變淋即成

最近上網看嬰兒食譜時忽然醒起，其實BB奶都可以當作忌廉用，反正家裡有大量2號奶粉試用裝存貨沒用（因為我哋無打算轉2號，只係諗住等佢一歲直接轉飲全脂牛奶），於是便用來煮西餐給燒腩仔，有餐湯甘筍忌廉湯和主菜南瓜忌廉汁三文魚星星粉，艾菲試過味道真是不錯（只係嫌BB奶陣味比較酥），不過有個小朋友原來唔多like飲湯（可能嫌無嘢咬），至於星星粉就因為無湯要慢慢咬而食得較慢。

食譜：

材料：
甘筍蓉1/4條
BB奶30ml
麵粉2茶匙

造法：
1. 將甘筍蓉與BB奶倒進煲中加熱煮滾
2. 用小量凍滾水將麵粉開成麵粉水
3. 將麵粉水倒進甘筍湯內，煮至喜歡的稀杰程度即可

註：甘筍蓉與BB奶的比例可隨BB喜好調較，如果想杰D可以加多D麵粉水

食譜：

材料：
星星粉1/3碗
三文魚扒1/4塊
南瓜五大粒
BB奶適量

造法：
1. 滾水煮星星粉五分鐘
2. 將星星粉過冷河
3. 用水煮星星粉五分鐘

4. 熄火焗十分鐘讓星星粉索水變淋然後倒去水份備用
5. 蒸熟南瓜粒和三文魚扒
6. 三文魚扒起肉備用
7. 將南瓜粒和少量BB奶倒進攪拌機內打成南瓜忌廉汁
8. 將南瓜忌廉汁倒進星星粉，再鋪上三文魚肉即成

零食：

最方便的零食當然是買現成BB餅乾，之前食牙仔餅差點出事哽親之後，艾菲現在只會給他食入口即溶的米餅和BB至愛星星餅，每次出街總有餅餅旁身，當他發狂想食我們的大人食物時便會給他作安撫，可以的話我們簡中都會給他一點白飯或者麵包，有時煮菜心時都會賜他一條菜心框任啜任咬，遲一點他出牙之後應該會試試自己做牙仔餅給他吃。

上星期參考網上找到的嬰兒食譜，做了BB奶燉蛋黃給他做甜品（又一消滅2號奶粉方法），完全沒想過他會食到舐舐脷，食完後更發難哭著要繼續食不肯離開hairchair呢﹗（不過艾菲聞過都真係幾香，只係用BB奶整硬係有陣酥味囉﹗）

食譜：

材料：
蛋黃1個
BB奶100ml

造法：
1. 將蛋黃打散
2. 加入BB奶
3. 過篩隔走多餘蛋黃令質感更滑
4. 倒進已消毒器皿並用錫紙封頂
5. 隔水蒸十分鐘即成

註：艾菲記得健康院本書仔話一餐最多食半隻蛋黃，所以就將佢分一半整咗兩樽分兩次食。

以燒腩仔現在的進度，艾菲暫時只想到這些粥仔和糊仔以外的固體食物給燒腩仔吃，大家有經驗的媽媽還有沒有更好的提議？不過艾菲知道等他出牙以後，他的食物應該可以有更多變化，所以艾菲會繼續搜集更多不同資訊，努力鑽研和泡製更多好味的嬰兒食物給他吃的﹗

平平淡淡父親節

我們的hea爆父親節晚餐

父親節轉眼就過...母親節當天艾菲request放幾小時假，叫米高幫艾菲餵燒腩仔飲第一餐奶和陪玩（其實一向weekend都係米高餵奶，只不過佢未必包埋陪玩呢部分），本來父親節應該要連本帶利還給他，結果艾菲卻是太累睡到十一點才捨得起床，所以燒腩仔的第一餐奶依然是由米高餵，然後有人下午request跟中學同學踢足球艾菲都識趣立即放人，一心打算帶燒腩仔一起去場邊打氣，無奈突如其來的驟雨過後球場內所有設施全濕，艾菲和燒腩仔兩母子只好在附近商場呆等個多小時，到晚飯時間本來想煮餐好跟米高慶祝，主角又說寧願出錢買壽司回家吃都不想餐後要洗碗，那麼米高第一年的父親節就是如此平平淡淡地過了。

不過，父親節前艾菲其實都已經代燒腩仔送了禮物給米高（哼﹗我母親節一份禮物都無啦，連飯都無特別食添﹗），還跟燒腩仔一起在父親節前一天陪米高出席他的死黨gathering，碰巧他的死黨幾乎全部都在去年生了BB（仲要咁啱全部BB都係8-10月出世），所以這個gathering亦變相成了BB gathering，看著他們由打機睇波聚賭gathering，變到現在的BB gathering，感覺其實都頗搞笑。

四個差不多大的BB聚在一起，交流暫時都未有，不過再一次證明燒腩仔是個慢熱B，人家的BB放落playmat即四圍爬四圍玩，燒腩仔卻要呆坐一旁皺眉望清望楚才行動，姨姨請他食星星餅都不會立即放入口，而是思前想後要艾菲在旁鼓勵他才敢吃，艾菲都不知道應該說他為人小心還是思想太複雜了，但warm up半小時後都開始有多一點反應，而艾菲全晚最開心是他終於懂得呷醋，當艾菲抱著其他BB玩時，他呆了幾秒定一定神後竟然懂得撲過來扭艾菲抱，嘻...他之前一直都是有其他人就不需要艾菲的﹗

BB禮服

之前燒腩仔姨媽結婚，雖然燒腩仔不是花仔，但為了隆重其事（姨媽好鍚燒腩仔㗎），艾菲早已決定要買套禮服給燒腩仔穿，然後婚禮前兩個月艾菲便開始四出搜尋。

看過千色店的BB禮服，靚是幾靚質地都不錯，但幾百元一套只穿一次艾菲實在不捨得，於是便決定轉戰葵涌廣場看淘寶貨（如果想睇淘寶貨實物，葵涌廣場絕對係個唔錯嘅地方），見有BB夾乸衣款禮服賣$100件，不過款式略嫌太普通，亦見全套十件燕尾服花仔衫賣$250，穿是穿得下最細size，款式都算頗型仔，但燒腩仔仍未識行穿的話，感覺就有點浪費。

最後艾菲在淘寶研究和格價了一輪之後，終於決定買上面這款香港鋪頭沒見過的，英倫紳士吊帶款，小背心可以自行選擇穿不穿，夾乸衣短袖衫，最適合超大汗的燒腩仔，而價錢只是48.8人民幣一件，連其他貨雜運到香港share運費，兌回港紙都是$70左右，都OK抵呀﹗

收貨之後艾菲立即拆開這件衫來仔細望了幾次，質地還可以摸上手都算OK，只是較為易皺一定要熨平才可以穿，另外煲呔很容易會向下墜，所以艾菲事前做了些小手工將一邊的煲呔釘實，另一邊就留待穿上身後用小扣針扣實，出來效果都不錯呀，姨媽結婚當晚個個都說燒腩仔型仔，都不知搶了幾多風頭呀（如果識行嘅BB著肯定仲好睇）﹗

不過當晚拍照出來的效果...就麻麻囉...艾菲事前已經千叮萬囑米高要抱燒腩仔抱得好一點，至少都show到禮服的正面見到煲呔呀（因為當日艾菲都著咗晚裝抱唔到燒腩仔），但結果看回所有照片就只有這張勉強見到煲呔...激死﹗

當晚影得不好，艾菲唯有回家自己再影，這是未穿小背心前的效果，艾菲個人覺得這個look都已經很OK。

這是穿了全套禮服的樣子，有人不肯乖乖配合艾菲影相，想爆頭後終於想到拿些米奇書出來給他扮讀書，嘻...這個look像不像幼稚園學生呀？

其實平日去親友的婚禮，未需要出動到禮服如此認真的話，禮服口水肩都是個不錯的選擇呀，燒腩仔的衣櫃裡便常備了這兩款最common的禮服口水肩，左邊的是在花園街買$15一個，右邊是表姐送好像都不過二十多元一個。

玩具陣

相信大家看過艾菲之前post出來燒腩仔擒梳化那張相後，都大概知道艾菲家裡現在多了隻牛仔，艾菲每天都要變身牧羊人看牛，但艾菲再貼身照顧燒腩仔都好，始終有些時候不能讓他跟著來，例如煮飯，洗碗，去洗手間等...為免燒腩仔在這些真空期出意外，艾菲都苦惱了一段時間。

要讓小朋友乖乖待在一個安全範圍，基本上都不外乎是用網床，jumper，或者圍欄，但我們的蝸居實在地方有限，這些東西又不能朝行晚拆，所以米高一直不贊成艾菲額外添置這些物品，雖然放燒腩仔在廚房門口望著艾菲煮飯和洗碗都沒太大問題，但他慶之所至還是會擰轉身去後面玩拖鞋或門頂，而且艾菲邊煮飯／洗碗邊招呼他總會拖慢了進度，所以苦無可思之下艾菲終於想到了自製玩具陣這個方法。

燒腩仔的playmat只有一個出口可以離開，艾菲就在出口處打橫放滿他的玩具，艾菲覺得燒腩仔會自行離開playmat，多數都是因為好奇發現外邊有更好玩的東西想去玩（包括電器，電線，插頭，椅子等），在他成功碰到那些「目標」前遇到其他引誘的話，他多數都會抵受不住引誘停下來玩（睇來D男人都係天生受唔住引誘嘅動物來），再加上艾菲之前因為請姐姐而裝了的cam，艾菲便可以在廚房監視著燒腩仔在playmat的一舉一動，見到他有危險或衝過防線走出playmat時便可以衝出去阻止他。

這個自製玩具陣用了大約兩星期，暫時對燒腩仔來說都算work，他每次都能夠乖乖在內逗留至少十分鐘，就算他真的意圖離開playmat，只要艾菲將他捉回palymat的最盡處，再將玩具的位置調亂，那麼他便又可以在內逗留多十分鐘，對艾菲來說都不算太辛苦呀﹗

幼兒水上安全班

其實未轉季時已經計劃夏天一定要帶燒腩仔去游水，因為艾菲本身只喜歡游水一項運動，所以希望燒腩仔同樣喜歡，而且一直覺得游水是基本求生技能，雖然現階段他仍是個BB未懂游水，但至少都不要怕水如此失禮嘛，聽聞BB越細下水將來怕水的機會較少，所以老早已上網search BB親子泳班（因為平日得艾菲一個嘅話真係唔敢自己帶燒腩仔去游水，如果有教練一齊感覺安全D）。

最出名的BB親子泳班是YMCA那個，好像一年四季都有開班，由於名額不多所以相當搶手（好多媽媽參加完都讚好），但價錢相對有點貴，11堂要千多元，艾菲不太捨得，知道香港基督教服務處都有類似泳班，但6堂都要八百多元，後來找到康文署的幼兒水上安全班，10堂都不過百多元，正如網上的媽媽所言，單是帶小朋友去十次公眾泳池玩水都不止這個價錢啦﹗

因為康文署的活動要夠期才會刊登出來（因為艾菲搵料時係二三月），所以艾菲一直等到四五月才找到有關資料（生完仔無乜記性，真係差D無咗件事），找到合適的班別便立即screen cap和記低報名日期，一到報名日便立即上網報名抽籤（之前仲好白痴咁以為要鬥快打電話，所以一早較定鬧鐘報名，點知打極電話都報唔到名），因為個個都說報名人數眾多很難抽中（一班先得16個位），所以抽籤日後一星期艾菲都一直心掛掛，每次經過信箱都望多兩眼，等了一星期後艾菲本來都打定輸數，偏偏就在這個時候等到康文署的信，燒腩仔抽中了第二志願可以去游水啦﹗YEAH!!!

這個幼兒水上安全班，是專門給0-4歲的小朋友參加，需要由一名監護人陪同一起落水，最適合艾菲這種全職媽媽和BB參加，合共十堂（平日時間），每堂一小時，每班16個小朋友和大人（聽聞好多人報咗名都唔去，有媽媽話得兩三個小朋友上堂都試過，變咗好似私人泳班咁正），目的是教授小朋友游水安全意識，好像會教小朋友在水上吹乒乓波和潛落水等（實際情況係點，艾菲同燒腩仔上完之後會再同大家匯報），而最驚喜是收費，原價$108的課程，小朋友原來還有半價，即$54就可以去泳池玩十次水﹗實在是超超超抵呀﹗

燒腩仔這班要到七月底才上堂，艾菲暫時仍有充足時間在上堂前帶燒腩仔去幾次泳池，讓他熟悉和習慣一下泳池的環境，希望他不要堂堂都喊足全程泿費艾菲一番心機啦﹗其實艾菲不求燒腩仔上完堂後會學到甚麼，只求他能夠快快樂樂地享受游水的樂趣，順便讓他學習跟其他小朋友相處（佢平日都係同大人玩多，出街見到其他BB都要warm up一輪先有反應比較慢熱，所以艾菲真係好想佢多接觸其他小朋友）。

艾菲知道有部分幼兒安全水上班仍然接受報名，就算報名完畢的的亦可能會有後補位可以報名（好似後補位就真係要打電話鬥快報名），如果有興趣的媽媽可以參考康文署網頁呀﹗