奶媽血淚史之忽然做咗全泵媽

之前提過，艾菲生完燒腩仔第三天便開始上奶，奶水充足得讓燒腩仔一出院即可做全人奶B，但燒腩仔卻一直不肯埋身飲，醫生、健康院姑娘、陪月甚至艾菲自己都覺得是奶咀太易啜惹的禍（即乳頭混淆，但後來先發現真正原因唔係咁），所以回家後便不停逼燒腩仔埋身，陪月姨姨則替艾菲用杯餵讓燒腩仔忘記奶咀，結果我們不眠不休地搏鬥了兩天，超硬頸的燒腩仔始終不肯就範，甚至寧願用杯餵食得勁辛苦都不肯埋身食，弄得艾菲幾乎產後抑鬱，最記得搏鬥到第三天早上，米高問艾菲當了六日媽媽有甚麼感覺時，艾菲即時哭到收不到聲。

在艾菲最無助的時候，唯有去健康院求教順便替燒腩仔做初生嬰兒檢查，當姑娘見到燒腩仔寧死都不肯埋身飲奶，又見艾菲已經開始情緒不穩，便勸艾菲不如考慮做全泵媽，全泵艾菲不是沒想過，只是擔心奶量追不上燒腩仔的需要，但姑娘解釋只要艾菲一直泵，奶量還是會隨著年月而增長，所以艾菲毫無防範地轉了做全泵媽（當時點都估唔到呢個係另一個惡夢的開始）。

轉做全泵媽後，艾菲心情輕鬆了很多（但初時提起燒腩仔唔肯埋身食還是會眼濕濕），燒腩仔不用再出盡力跟艾菲搏鬥自然也飲得高興，艾菲只需每次在燒腩仔夠鐘飲奶前四十五分鐘泵奶，燒腩仔便會有新鮮人奶飲，起初由陪月姨姨和米高替艾菲餵奶洗泵，艾菲尚算頂得住，但到陪月姨姨走了後，艾菲便得自己一個泵奶餵奶洗泵，雖則燒腩仔很快已經可以四小時一餐，但做齊全套服務都已經用了兩小時，再加上燒腩仔當時只得個幾月人仔經常睡不好，肚餓更會喪哭得嚇死人（隔離屋都唔知會唔會以為我哋虐兒），沒一覺可以睡超過兩小時疲累到爆炸是少不免，而更多的時候是出現倒瀉蘿蟹的狀況才頭痛（顧得泵奶又抱唔到扭緊抱o既燒腩仔，抱得佢來又泵唔切奶），但幾難頂艾菲還是一直堅持繼續餵下去不肯放棄。

艾菲日以繼夜又夜以繼日的密密泵，無論有多累都爬起床泵奶，就算燒腩仔十五日人仔已經自動戒夜奶，艾菲還是堅持半夜爬起床繼續泵奶，甚至為了泵奶連街都不願出（係後期俾米高話得多先肯出去一陣，但一定夠鐘就趕返屋企泵奶同餵奶），在艾菲罕有地如此勤力的情況下（真係讀書返工都未試過咁勤力），再配合陪月姨姨的上奶湯水和食物，上奶的狀況是出奇地理想，由出院時的30ml，到燒腩仔出世七日後已有80ml，再慢慢由120ml到爆Avent 4安樽，高峰期更曾經一度上到260ml，當時陪月姨姨和艾菲都為這個奶量感到相當高興，多了的奶便放在雪櫃做存貨，不出兩星期冰箱便被艾菲打爆了一半，一心以為情況會一直持續下去，還雄心壯志得想買個雙泵回來節省泵奶時間，甚至已經買了個fridge to go預備在跟燒腩仔去街時帶冰奶用，但可惜好景總是不常...

（待續）