D人成日話BB大得好快，特別係頭一個月變化最大，要同佢哋影多D相記低佢，否則錯過咗就唔同晒樣，可惜想當年燒腩仔出世時，艾菲只識為佢餐媽媽奶埋頭苦幹，撐到滿月先醒起無乜同佢影相，所以今次BB豆豬出世前，已經盤算住要盡早幫佢私影返輯初生相，亦一早搜集定唔同物資做足功課，當然都慶幸今次餵媽媽奶過程尚算順利（雖然仲係唔肯埋身...），令艾菲可以安心休息有足夠精神去完成呢件事。
一如之前嘅maternity photo，艾菲都係無俾錢搵人影，而係自己親自操刀舉機影，趁燒腩仔返咗學，BB豆豬又飲醉奶，就同米高夾手夾腳捉BB豆豬入房影，雖然說不上係專業級數，但總算係媽媽送畀BB豆豬嘅一番心意啦﹗
本來想學人包到BB豆豬成粒豆咁，但最後發現要包得靚都幾高難度㗎喎，嘻...
堅持唔同BB豆豬影露點相，始終係女仔來嘛，性感極都唔可以畀人睇蝕晒呢﹗
小腳板
小手仔
咁多個造型入面艾菲最鐘意呢個，好斯文好女仔呢...
感覺好自由女神feel，kakaka...
十二朝之後D眉毛同眼睫毛開始生出來啦﹗
既然都拎晒D道具出來同BB豆豬影相，無理由唔同哥哥燒腩仔影返張合照㗎，見燒腩仔呢晚狀態OK，同佢溝通完確定佢係願意後，我哋就爭取餵飽BB豆豬後清醒嘅五分鐘，拿拿聲埋位影相，不過大家有小朋友嘅家長，應該都明要兩個小朋友同時望鏡頭係幾咁難嘅一件事，唔係燒腩仔無笑唔望鏡頭，就係BB豆豬影到瞓著咗，結果係影到艾菲身水身汗先影到呢張稍為見得人嘅相。
又話說，為咗呢輯相，艾菲早一晚係專登用馬騮妹嘅造型，同BB豆豬試過位嘅...
日夜癲倒嘅BB豆豬，明顯越夜越精神，對眼碌到大一大...
完全唔使旨意將佢D手腳收埋入個籃到...
最終當然係以爆喊作結啦﹗>.<
沒有留言:
張貼留言