五日五夜仁安生B之旅~part 2

繼續艾菲個仁安生B爽YY之旅先，做完手術了無牽掛咁瞓咗一覺好之後，第二朝一早就食定早餐等Dr Wong來巡房，終於得佢approve可以落床，但唔知點解今次足足等咗成個鐘先有姑娘來幫艾菲拆喉拆機，之後又話要喺床坐四十五分鐘先可以正式落床，搞到艾菲白白錯過咗10:30一轉嘅餵奶時間，然後喺姑娘嘅幫手下成功落床，傷口都有少少痛但頂得住行到無暈，而姑娘就用個好驚訝嘅樣話艾菲勁，唔...睇來平日應該係有好多人頂唔住（醫生姑娘都話最痛係落床呢吓）。

落床OK後，艾菲即去梳洗一輪再換返自己衫，之後等米高送飯過來，食飽有氣有力就準時2:30去BB房餵奶，點知...BB房姑娘居然mark錯時間，以為艾菲6:30先過去，一早幫艾菲餵飽咗BB豆豬（嗰吓真係有D晴天pig pig嘅感覺）﹗﹗﹗結果佢當然對艾菲無乜興趣，但都有乖乖咁啜咗一陣，仲畀艾菲整到一面都係奶添（艾菲當時未上奶，但其實28周時已經開始有滲奶嘅情況，所以點都有D存貨畀BB豆豬）﹗



之後一次過去餵奶房，BB豆豬更加係好乖女咁同艾菲啜咗成個鐘，相比起想當年嘅燒腩仔，BB豆豬係啜得認真同有力好多，所以當晚明知自己未上奶，又撞正餵奶房夜晚裝修無得餵，本應爭取時間休息多D，艾菲都好勤力盡量擠D黃金初乳拎去畀BB豆豬半夜食。



可惜歷史總係重覆又重覆地上演，到第三日艾菲正式上奶，BB豆豬就開始抗拒微谷嘅艾菲，雖然佢無燒腩仔當年推開艾菲咁狠，但都係keep住啜幾啖又爆喊一輪，再加上兒科醫生話佢有D黃，艾菲知道自己無可能堅持全埋身同唔補奶粉，為求令佢順利跟艾菲一齊出院，跟住幾日都係餵奶前自己喺房擠鬆，再入餵奶房埋身加補人奶同奶粉。

而第二胎上奶嘅速度亦快得驚人，明明第二日先勉強得10ml，到第三日正式上奶每餐擠到30ml，然後第四日已經急升一倍上到60ml（艾菲仲要係hea擠mode免得搞到自己太谷），所以出院當日連兒科醫生都話艾菲夠奶，叫艾菲返去唔使再幫BB豆豬補奶粉，可以直接做全人奶B啦﹗YEAH！



講完BB豆豬喺醫院嘅表現，點都要講返令艾菲每日都牽腸掛肚嘅燒腩仔啦，無見佢成日嘅艾菲好不容易先等到第二日燒腩仔嘅放學時間，由燒腩仔爺爺嫲嫲帶佢過來探艾菲同BB豆豬，而佢仲送咗個超靚嘅母親節花籃畀艾菲添（放學時學校派），真係冧冧豬到呢...至於兩兄妹嘅初次見面，燒腩仔無艾菲想像中咁興奮，佢只係望兩望就話走，反而入到艾菲房可以四圍走搞搞震仲high仲開心。



咁啱今次住院亦撞正母親節，前一日Dr Wong都有問過艾菲使唔使提早出院返屋企陪燒腩仔，不過艾菲覺得反正所有嘢都安排好無就謂打亂，留喺醫院休息多日叉夠電先走應該會更好，而喺正日當天米高都好識趣咁專登買咗件cake上來畀艾菲當係慶祝，其實艾菲真係唔求D咩母親節或生仔禮物，難得呢日有大小寶貝同米高陪住，一家四口健健康康開開心心就夠㗎啦﹗



唔覺唔覺就喺仁安住咗五日五夜，去到最後一晚真係覺得好唔捨得，諗起第二日就要返屋企，開始無間餵奶嘅生活，又要同時應付燒腩仔D情緒就頭痛，亦心知今次會係最後一次入院生仔，話咁快就經歷完人生入面其中兩個最重要結婚同生仔嘅過程，覺得一切來得太快太夢幻，不過現實始終係要面對嘅，最後一朝餵完7:30轉奶，返房等Dr Wong同兒科醫生巡房，宣布艾菲同BB豆豬可以一齊出院後，喺房擠埋最後一餐奶交去BB房俾姑娘幫手餵，艾菲就收拾行裝換衫，等米高過來找數同接我哋返屋企，正式同仁安講Bye Bye啦﹗

題外話：艾菲生完BB豆豬嘅第二日，個肚好快已經無咗（其實仲有個小肚腩），個個來探艾菲嘅親友都話艾菲比生之前瘦咗，身型仲好似無生過一樣，基於好奇艾菲臨出院時就走去磅重，結果只係輕咗三磅咁大把（但BB豆豬明明都有六磅幾重㗎喎），後來睇返相先發覺自己當時已經有D水腫，好彩嘅係水腫咗兩三日左右已經退，而一個星期後去Dr Wong診所到覆診時再上磅，體重已經極速回落咗11磅，即仲有3磅就可以返家鄉啦﹗嘻...