手術前一日，艾菲依依不捨咁送埋燒腩仔上校車（眼淺媽媽差D忍唔住喊...），再放肆地去東海堂買多杯抹茶紅豆來飲，就返上樓做最後點算，等埋米高下午放工返來，我哋夠鐘就慢慢出發去仁安報到，因為係預約開刀，所以要先喺樓下大堂登記，事前都同米高講過近排有幾多case係大房full咗，要加錢upgrade去半私家二人房，點知真係畀艾菲開口中，咁呢D情況其實都無得揀㗎啦（除非臨時話返QE生），好彩一早同米高打定底有個預算...
艾菲上一次生燒腩仔時係住四人大房，感覺比半私家二人房仲闊落，而且都係兩個人share一個洗手間， 同二人房分別唔係太大，但今次住完二人房就覺得加錢upgarde都係值嘅，至少少咗一半病人，醫護人員同親友輪流入房嘅比例都少咗一半，真係靜好多休息得好D，特別係艾菲嘅同房都有個兩歲半大嘅小朋友，雖則醫院講明唔畀十二歲以下小朋友入病房，但我哋大家都OK唔介意，所以燒腩仔來探艾菲都好方便，而最最最正嘅係最尾兩日，同房走咗之後就一直無人再搬入來（應該係過咗五一黃金周所以好多吉位），變相艾菲自己一個住私家房，就住得更加清靜同爽YY啦﹗
喺大堂登記完就有staff帶我哋上三樓，上到去要先跟姑娘入房磅重（最後一星期都係無重到㗎，即成個懷孕期只係重得14磅）同量血壓，對個人資料，再同你做一輪答問環節，包括講解手術流程，教點著手術袍，提你幾點開始禁食，問吓BB飲咩奶粉（開刀第一日唔落得床點都會餵咗奶粉），揀邊個兒科醫生，老公入唔入去陪產，要唔要留臍帶血，要唔要手術室D相之類，基於有過上次生燒腩仔嘅經驗，艾菲都有晒model answer，話咁快搞掂，之後姑娘就會叫另一個同事入來剃毛毛，係有D唔舒服同尷尬，但來到呢個moment，艾菲已經豁出去啦﹗
搞掂再去待產室聽半個鐘BB心跳同check胎動情況，無問題就可以自由活動返自己房休息，由於艾菲一早同姑娘講想出去食晚飯先再返來，佢幫艾菲問准咗Dr Wong，搞掂即可以簽名剪手帶，同米高出沙田拍拖食禁食前嘅最後晚餐，既然都最後一日當然要放肆D啦，痛痛快快咁食返餐壽司，食飽喺新城市逛陣，再去大圍火車站附近掃吓街就乖乖返醫院。
為咗畀米高可以早D休息，順便趕喺燒腩仔瞓之前傾返個video call，米高送咗艾菲返房即閃，艾菲就爭取時間快手沖個最後嘅涼，順便洗個最後嘅頭（來緊幾日無得沖涼洗頭呀），同燒腩仔傾完電話就乖乖執好行李上床休息，但就點碌都唔多瞓得著，不過你話好緊張咩，艾菲又完全唔覺（反而入院前就好緊張帶漏嘢），反正都知道晒流程，已經無嘢好驚，只係好想聽日快D來，速戰速決快手拎BB豆豬出來，大小平安各有各舒服（最後幾星期真係畀佢頂到周身唔聚財呢﹗）。
第二朝晨早七點幾，等同房梳洗完出去餵奶，艾菲即快手起身刷牙洗面（呢樣好重要，艾菲同自己講今次坐月，再hea都要注意自己儀容﹗），收拾好行裝就開始換手術袍，等Dr Wong過來巡完房，話都無咁快已經有床來接艾菲落手術室，等埋米高換衫，艾菲就要自己瞓上床出發啦...
由於上次生燒腩仔係緊急開刀，加上係星期日來，艾菲係直入手術室全程唔需要等，不過可能今次係平日嘅關係，book咗房都仲要一個人喺出面等（米高要ready晒先畀入），呆等期間有手術室護士，麻醉師，同Dr Wong輪流過來對資料簽文件同種豆，而Dr Wong都有循例問艾菲驚唔驚，仲同艾菲講笑話除咗手術頭十分鐘之外，BB豆豬出世後艾菲就唔會再理佢。
經Dr Wong催咗幾轉後（等咗差唔多大半個鐘），終於到艾菲入手術室，入到去先有負責嘅護士同艾菲對資料，佢知道艾菲係第二次開刀生BB後，就叫艾菲好似上次咁配合佢哋過床，然後成個過程極速完成，艾菲仲畀姑娘讚夠輕盈添，之後佢哋就一邊幫艾菲打麻醉針，一邊幫艾菲駁血壓機心跳機插尿喉同落drip。
打麻醉針嘅一剎係有D痛，不過話咁快已經覺得下身開始麻痺，快手聽姑娘指示放好手腳（感覺好似畀人釘十架咁，kakaka），跟手Dr Wong就埋來幫艾菲清潔肚皮，奇怪地艾菲仲叫緊好痕時，麻醉師已經話手術開始咗，艾菲自然反應即答「吓？我老公呢？佢入來陪產㗎喎」，就喺呢個時候米高終於入到來，跟住Dr Wong就自己同姑娘邊吹水邊做手術，艾菲同米高就自己兩個喺到講埋D無謂嘢，同上次生燒腩仔時嘅心情真係差天共地呢﹗（上次事出突然個心係好驚自己同燒腩仔有事，今次就真係好放心交晒畀Dr Wong）
過咗十幾分鐘後，Dr Wong就話見到BB豆豬，然後麻醉師就喺艾菲上身到，幫手push BB豆豬出來，佢出世嘅一吓艾菲真係覺得全身鬆晒（終於無嘢再頂住個胃同肺 >.<），然後好快已經聽到BB豆豬嘅喊聲，嘩﹗女仔真係女仔，妹妹真係嗲D，把聲溫柔到呢，仲要喊幾聲已經唔再喊瞓著埋，之後醫護人員就幫BB豆豬抹身，再叫米高埋位影相同剪臍帶，而就喺呢個moment艾菲忍唔住笑住爆咗句「唉...我又係最後一個先有得睇B...」，咁啱畀Dr Wong佢哋聽到，佢哋即安慰艾菲「好快有得睇㗎啦」，之後姑娘抱BB豆豬埋艾菲身錫咗兩啖，影咗幾張相就帶佢走（基本上第二個真係無乜心肝，無喊不特止仲連個樣都唔係好記得）。
米高喺手術室陪艾菲坐多一陣，麻醉師都安排佢先行離開，之後Dr Wong同姑娘就一齊同艾菲邊吹水邊聯針，Dr Wong問艾菲係唔係堅決唔再生，又提艾菲要記得幫BB豆豬影多D相，皆因第二個無咗新鮮感通常都無乜相咁話，搞掂後醫護人員幫艾菲做埋最後清潔同過床，佢哋就推返艾菲出去休息區到抖，等到三樓有職員來接艾菲就返房休息。
返房安頓之後我哋即打電話搵四大長老報平安，而兒科醫生都好快來搵我哋報告BB豆豬一切正常，已經咀郁郁想食嘢同好有探索世界嘅意欲，最記得係佢大讚BB豆豬皮膚好好，之後就輪到Dr Wong過來，同艾菲講麻醉藥大概三四個鐘就過，到黃昏時份可以開始試飲水，OK無問題先可以食粥水，至於落床就要等埋佢聽朝巡房話OK先得。
由於我哋今次只買VCD無買手術室張相嘅hard copy（根據上次經驗係呢張相點影都唔靚兼唔見得人），所以要一直呆等到一點BB房探病時間，派米高出去BB房影相先有得發相畀親朋好友，再叫米高自己一個去親子時間，喪影BB豆豬嘅close up相返來畀艾菲珍藏，再加埋其他探病親友whatsapp返來嘅video同相，艾菲先終於捱過咗心掛掛嘅一晚。
沒有留言:
張貼留言