回顧返成個坐月體驗，用六國大封相來形容當中嘅混亂係絕無誇張，真係EQ少D都吐血身亡，連自己都唔明呢D日子係點樣捱過，好彩嘅係萬大事背後仲有米高同燒腩仔婆婆撐住，喊完笑完鬧完之後亦漸入佳景，我們這一家開始適應一家四口嘅生活。
本來想陪月姨姨喺艾菲同BB豆豬出院當天就過來幫手，點知佢話上一個客嘅job未完，要遲一日先可以來到，唯有請燒腩仔公公婆婆捱義氣呢日過來客串，都好彩有佢哋兩個喺到，幫手照顧住已經失咗控幾日嘅燒腩仔，又幫手整嘢畀我哋食，最重要係等艾菲可以安心沖返個靚涼（一諗起D人話坐月唔沖得涼，個人就會十倍忟，天氣咁熱生完又特別怕熱同多汗，邊可能唔沖涼唔洗頭咁唔衞生）﹗
燒腩仔同BB豆豬相認嘅一刻﹗艾菲入院前一直同燒腩仔講，呢日放學返來就會見到艾菲同妹妹，加上燒腩仔婆婆幫手同佢洗腦，所以佢都勁期待見到BB豆豬，喺醫院BB房探妹妹時佢通常望兩望就話走，今次就超級肉緊不停想伸手摸妹妹塊面，而艾菲都把握機會送上妹妹為佢準備嘅見面禮，剩機收買吓人心。
由於有過照顧初生BB嘅經驗，艾菲亦好彩夠奶畀BB豆豬食，除咗BB豆豬堅持爆嘁都唔埋身食外，返屋企第一日嘅一切都看似好正常，連帶燒腩仔喺公公婆婆嘅陪伴下，都變得好合作好易話為，點知...當公公婆婆食完晚飯一走，我哋就開始由天堂跌落地獄...
為咗唔好令燒腩仔覺得多咗妹妹媽媽就唔理佢，艾菲都奉行少理BB豆豬嘅態度，除咗泵奶餵奶之外幾乎所有時間都畀晒燒腩仔，佢放學一返來艾菲就陪住佢，每晚都會安排好時間做佢嘅陪瞓專員，但經過燒腩仔爺爺嫲嫲一連五日嘅放縱之後，佢明顯係多咗扭擰同唔守規矩嘅行為，幾乎所有平日一叫就做嘅嘢，佢都要同你扭一大輪先肯去做，例如每日開飯都會發脾氣話唔食唔埋枱，玩完玩具又唔肯收返好，叫親沖涼都通屋走唔合作，同唔肯乖乖換校服返學等，而最攞膽嘅係專揀艾菲餵緊BB豆豬飲奶時來扭D無理取鬧嘅嘢，務求令到艾菲著晒燈先安樂咁款。
每次來到呢D位艾菲都好掙扎到底要唔要同佢堅持，堅持就會搞到家嘈屋閉，亦怕佢會變得更不安，但唔堅持佢肯定會變本家厲越來越過份，最終為咗大家著想艾菲同米高都選擇咗堅持，經過兩星期嘅企硬同大講道理後先有所好轉，期間真係要感謝燒腩仔班主任幫忙輔導，艾菲同燒腩仔班主任傾過，都知佢其實好鐘意妹妹，偏偏心理上始終覺得有D威脅未係好接受到，時間係唯一嘅良藥。
大嘅受情緒困擾，細呢個都唔顯得特別合作，日頭食飽就瞓點叫都唔醒嘅BB豆豬，每晚一到凌晨十二點飲完奶就化身貓頭鷹醒晒，然後成晚keep住唔肯瞓超精神，咁佢唔瞓即我哋大人都唔使瞓，有時暗得佢瞓來艾菲已經夠鐘泵下轉奶，有時更加係因為無瞓到提早叫食，搞到艾菲泵唔切奶失晒預算勁混亂，再加埋踢甩片漏屎漏尿嘅蝦碌嘢，仲有半夜失驚無神醒咗喺到發脾氣或者叫濕疹痕嘅燒腩仔，認真晚晚精彩晚晚甘呢﹗
可幸嘅係經過三個幾星期嘅日夜癲倒後，BB豆豬終於開始識分日夜，雖然仲未有戒夜奶嘅意思，但每次夜晚飲完奶就會自己暈低唔使我哋煩，蝦碌嘢都隨住我哋上返手而少咗發生，就連燒腩仔都少咗半夜醒，同知道自己唔應該咁早起身肯瞓多陣（自我哋出院後佢忽然朝朝七點幾八點就起身唔肯瞓返，但平時明明可以瞓到九點幾十點），艾菲宜家每晚斷斷逐逐都總算瞓到四五個鐘。
而另一樣令艾菲覺得屋漏兼逢夜雨嘅嘢，就係請咗個唔係好夾到嘅陪月姨姨，由於生燒腩仔時請嘅陪月姨姨堅係好企理醒目同有交帶，所以艾菲可以好放心將所有嘢都交晒畀佢處理，可惜今次呢個就明顯有D hea，仲會為自己有問題嘅嘢搵好多奇怪嘅藉口，咁艾菲都隻眼開隻眼閉，但求佢完成到自己嘅份內事就算（佢走時仲有幫佢寫推薦信添）。
不過唔知係陪月姨姨黑定艾菲黑啦，佢來我哋屋企幫手嘅第二日，煮煮吓飯就忽然發生爆煤氣爐嘅事，呯一聲之後成塊玻璃面就裂開咗，嗰一刻大家都嚇咗一嚇，好彩嘅係無人喺呢件事入面受傷，煤氣公司都即刻搵人上來check過晒D煤氣管，證實無漏氣唔影響熱水爐，仲可以喺第二日安排換玻璃同幫個爐做深層清潔（爆爐原因應該係爐頭太耐無清潔，塞咗出氣孔都唔知，所以漏氣發生小爆炸），唯一可惜係艾菲至愛嘅綠色玻璃面已經絕咗版，被逼換上平平無奇嘅白色面，唉...
而為咗應付繁重嘅煮食工作，我哋就拎咗個打邊爐用嘅電磁爐出來畀陪月姨姨頂住先，點知佢竟然可以燒爛埋艾菲之前爭取咗好耐米高先畀買嘅sharp醒邊爐煲，嗰一刻艾菲已經灰到咩都唔想再講，之後做嘢時仲唔小心打爛咗艾菲個靚靚迷你沙煲，又搞到艾菲個廚房一片混亂（好彩艾菲一早收起晒D LC同Staub，亦無畀佢自己掂部水波爐），艾菲唯有安慰自己一日三餐有人幫忙打點，BB豆豬無穿無爛準時有奶飲，就乜都當睇唔到，之後自己坐完月再慢慢收拾殘局好啦﹗
沒有留言:
張貼留言