一個月

Hello! 咁耐無見大家有無掛住我呀？唔覺唔覺我已經一個月大啦﹗喺媽媽嘅悉心照料下，我已經擁有一對小節瓜腿，媽媽話佢來緊會繼續全力谷肥我，誓要令我對腿變得更肥美更好咬咁話呀﹗



我宜家一日食五至六餐，全人奶用樽餵每四個鐘食130ml，暫時仲未有轉返埋身食嘅意思，亦未有戒夜奶嘅意慾，係就係辛苦媽媽做全泵媽㗎啦（艾菲：每餐泵連餵有時要用成兩個鐘>.<），但勝在食得痾得又瞓得好吸收，上星期滿月返健康院打針兼拎成績表，相比出世時足足重咗成kg，頭圍同體重都跟住自己條成長線上升，D黃亦全面退晒，醫生同姑娘都讚我叻叻豬呢﹗



而另一樣氹得媽媽好開心嘅嘢就係我哋兩母女交換脂肪大成功，經過一個月嘅努力之後，媽媽雖然只係再輕多一磅（艾菲：仲有兩磅先返家鄉呀﹗），但塊面就瘦晒尖晒，最重要係佢已經著得返陀我之前著開條24寸腰牛仔褲啦（艾菲：仲有個肚腩仔未減到㗎﹗）﹗你哋話我係唔係好乖豬好抵鍚先，嘻...



為咗慶祝我滿月，媽媽又趁哥哥返咗學之後捉我影咗輯滿月相，不過今次我就唔多合作，所以出來效果只係一般咋。



咩話？你叫我做傻豬豬？我叫BB豆豬至真喎﹗



邊個咁大膽話我係馬騮妹？



哇...仲塞咁多隻同類過來添﹗我喊畀你睇㗎﹗



發夢都要做香港公主？？？