其實唔覺唔覺BB豆豬聽日就兩個月大啦，但喺寫佢嘅成長日誌前，艾菲好想寫咗呢篇苦與樂先，皆因日日對住呢兩個高需求嘅小魔怪，艾菲已經攰到無咩精神同佢哋玩，有時又會畀特登搞事唔合作嘅燒腩仔激到暈低咁滯，不過見到佢兩個嘅互動時，又會好感恩自己生咗一對小寶貝出來，成件事唔知點解可以係咁矛盾。
之前都提過，BB豆豬出世後，燒腩仔明顯有D行為問題，艾菲同米高用咗大半個月時間，佢總算安定落來，但安定唔代表完全無嘢，畢竟都只係個三歲半多D嘅小朋友，有D大道理仲係似明非明，而且佢性格係比較自我，好多時想佢參與幫忙照顧妹妹，佢偏偏講反話話唔想做走咗去，叫佢細聲D唔好嘈醒妹妹，佢就專登大大聲喺妹妹側邊大叫同唱歌，等到妹妹醒咗爆喊即若無其事咁走咗去，又會成日搞妹妹D玩具扮BB，有日艾菲喺廚房煮飯，咁啱妹妹扭抱喊，佢第一時間衝入房開妹妹個床鈴，當你好開心以為佢開來氹妹妹時，入到房就發現佢原來係開畀自己玩，仲成個人瞓咗落妹妹張床到，嗰一刻真係唔知好嬲定好笑呢﹗
爭風呷醋為難我哋亦都係例行公事，專門揀艾菲餵奶無手得閒時，拎D玩具出來要艾菲同佢一齊玩，艾菲安撫爆喊中嘅妹妹時，佢最鐘意走來媽媽呢樣媽媽嗰樣，米高抱妹妹時，佢會叫米高用另一隻手抱埋佢，出街艾菲揹住妹妹喺車到打橫瞓，佢又會指明要瞓艾菲大脾，有時甚至會扭話唔畀妹妹飲奶，成日喺妹妹扭食時拎個餵奶枕去玩，妹妹沖涼時會喺艾菲後面搞搞震，仲趁艾菲行開走去玩D沖涼水，當然我哋都明佢只係想引我哋注意，所以可以的話我哋都盡量滿足佢同隻眼開隻眼閉，當正佢係大BB咁一樣呵同錫。
雖然燒腩仔以上嘅搞事行為，有時真係足以煩到艾菲頭痛，不過佢其實係好錫BB豆豬，而且係一個好盡責嘅哥哥來，每次我哋一家四口出街，佢都一定會旁實BB豆豬架BB車，十足中南海保鏢咁打死都唔放手，起初艾菲以為佢只因愛車而咁做，後尾發現佢係堅緊張妹妹，全程對眼無望過街，不停擰轉望實妹妹，妹妹有咩郁動又即刻同我哋匯報，又有次去完婆婆屋企準備著鞋走，姨媽個工人姐姐幫忙抱住BB豆豬，佢著完鞋即走去同姐姐講「你好畀返妹妹我哋啦」，絕對唔會玩到漏低妹妹。
每日返學同瞓覺前都會同BB豆豬講，搶住伸個豬咀埋去錫妹妹，放學返來唔見妹妹喺廳又會主動問佢去咗邊，有時玩玩吓玩具會拎埋去畀妹妹睇（但成日拎D唔啱BB豆豬嘅重型玩具埋去，嚇到我哋死），成日話想抱妹妹甚至偷偷地出手抱起佢（睇少眼都唔得>.<），最記得有次艾菲喺廚房煮緊飯，BB豆豬差不多夠鐘扭食，正當艾菲打算快手完成手頭工作出去餵佢時，忽然聽到出面靜晒無喊聲，一伸個頭出廳望就發現明明自己喺playmat玩緊嘅燒腩仔已經畀咗個奶咀BB豆豬食，把口仲學我哋話「你乖啦，我請你食好嘢，你唔好再喊啦」，真係笑到艾菲肚痛咁滯﹗
而最神奇之處係，佢哋兩兄妹好似有心靈感應咁，BB豆豬又真係好鐘意燒腩仔，每次燒腩仔一同佢講嘢，佢對眼都會自動追住燒腩仔個方向望，又識同佢笑畀反應佢撩佢玩，甚至燒腩仔扭計爆喊，BB豆豬都會跟住喊埋一份，每次見到此情此景就覺得佢兩個好sweet，勁期待BB豆豬再大少少識得同燒腩仔一齊玩，咁艾菲到時就可以輕鬆D坐埋一邊睇就得啦...啦...啦...（我知...我知...到時可能會成日爭玩具同鬧交甚至打交，但大家暫時畀少少幻想空間我期待吓先啦﹗:P）
沒有留言:
張貼留言