打從BB豆豬未出世，艾菲已經一心諗住畀佢做母乳寶寶，有過燒腩仔嘅經驗，艾菲知道自己算係富媽媽，只要肯餵奶係唔會唔夠，唯一要小心唔好再搞到乳腺炎含膿，而最佳嘅避免方法就係畀BB豆豬埋身食，等自己嘅身體慢慢調節適當嘅奶量，偏偏BB豆豬同燒腩仔一樣，艾菲一上奶即唔肯再埋身，艾菲喺無奈之下再一次成為一個全泵媽。
BB豆豬點解唔肯埋身食，艾菲多多少少都估到原因，一來艾菲谷奶時乳頭變硬變短確係難啜，二來出奶太快飲唔切易續親，換轉係自己都寧願揀易啜嘅奶咀，所以艾菲對於再做全泵媽初時都無咩唔開心，只係堅持每餐都試吓埋身先餵樽，深信等佢大D有氣有力D，總有轉返全埋身嘅一日。
為咗keep住奶量，艾菲會喺BB豆豬飲奶前一個鐘泵奶，就算半夜都會較定鬧鐘起身泵，確保佢每餐有新鮮奶飲，起初我哋係餐泵餐飲餐清，問心唔係完全無壓力㗎，不過到咗BB豆豬七日大，艾菲開始儲到奶，情況就相對輕鬆咗，至少唔使驚泵奶時出意外倒瀉奶，搞到BB豆豬無奶食先啦﹗（想當年真係試過兩三次甩手倒瀉大半枝奶>.<）
而為免太谷容易出事，艾菲今次只係每邊泵十分鐘就停（想當年係慌死唔夠奶咁每邊泵廿分鐘），盡量將奶量維持喺BB豆豬嘅奶量多一安左右就算，除咗叫陪月唔使特別煲谷奶湯水，甚至有次唔知咩事爆細樽係完全無興奮感覺，反而大叫死火驚會出事（BB豆豬當時飲緊90ml一餐），不停同自己洗腦提住「夠就算」。
不過隨住日子一日一日咁過去，BB豆豬由起初都會埋身啜幾啖先爆喊唔啜，到後期啜都未啜已經爆喊，日夜癲倒搞到我哋無覺好瞓，再加上佢滿月前有一排飲樽飲得超差，一枝奶要用45分鐘至一個鐘先飲得完，然後有一晚半夜艾菲攰到唔知醒起身泵奶，眼見BB豆豬寧願捱餓爆喊都唔肯埋身啜，艾菲終於忍唔住邊泵奶邊喊，第一次萌生放棄餵母乳嘅念頭...
認真一湊二已經夠忙夠亂，仲要每餐用成兩個鐘來泵奶同餵奶，艾菲真係無信心無咗陪月後自己一個搞得掂，但好彩有米高嘅安慰同支持，佢不停勸艾菲捱埋呢段時間，等BB豆豬戒咗夜奶就無咁辛苦，睇住佢真係身體力行，每晚放工返來即幫手洗奶樽洗泵，餵夜奶加暗BB豆豬瞓，跟住自己瞓得兩三個鐘左右，就拖住極疲倦嘅身軀返工，相對日頭有得補眠嘅艾菲，只係起身泵半個鐘奶就有得再瞓，係好應該堅持多一陣。
既然BB豆豬到滿月都仲咁堅持唔肯埋身啜，艾菲知道自己係時候面對現實（之前一直以為佢會好似燒腩仔咁，到差不多滿月就識埋身），而為咗方便之後同佢出街，艾菲喊完發洩完就即晚上淘寶淘咗個優合單泵返來，貪佢可以插USB尿袋夠輕夠細，而且可以直接套落BB豆豬用開嘅Pigeon日版肥樽同Avent樽，咁出街泵奶就可以帶少個窄口樽。
其實燒腩仔姨媽一早已經畀咗個Medela Swing艾菲用，用落都OK無咩大問題，不過上次用開Avent泵嘅艾菲，就硬係覺得唔係好夠力唔係太慣，而且佢只可以套落窄口樽，泵完奶仲要倒來倒去好易出意外，又其實艾菲都有諗過買雙泵慳返D時間，但考慮到艾菲要邊泵邊按先會出奶出得順D，雙泵好難配合到，而且艾菲都不過每邊泵十分鐘，全程連最後用手清廿五分鐘就搞掂，雙泵只係慳到十分鐘仲要洗多套parts，成本效益唔太大就揀返單泵算。
（註：就喺艾菲寫完呢段大讚優合泵嘅第二日，個泵就忽然打柴泵泵吓奶突然壞咗，已檢查應該係主機問題唔關parts事，對於買唔買過部新艾菲仲係五十六，皆因佢堅係好用同艾菲夾到，但用咗兩個月都唔夠就壞又確實有D兒戲）
解決完奶泵嘅問題，跟手就要面對冰箱無位再放冰奶嘅問題，由於艾菲係FTM同BB豆豬朝夕相對，每泵嘅奶量又夠BB豆豬一餐有餘，無事無幹的話D冰奶基本上係雪來得個擺字，為咗唔好浪費艾菲就將D冰奶拎來畀有濕疹嘅燒腩仔浸浴用，然後再密謀氹佢幫手飲，雖然佢都已經三歳半就來四歲，飲母乳嘅好處已經唔太apply到喺佢身上，但始終係自己媽媽D奶，應該點都好過飲牛媽媽D奶掛，嘻...
對於飲艾菲D奶，燒腩仔起初都有D抗拒，艾菲問佢時仲話「唔好啦，我飲俾錢買D奶得啦」， 不過當艾菲拎枝朱古力飲筒出來試佢，佢即話好好味係咁啜，然後飲咗四枝朱古力飲筒，已經順利過度到唔使用有味飲筒就咁飲，仲進展到宜家一日一杯都唔夠喉，見妹妹飲剩奶會搶住飲，堅係一滴都唔放過﹗
可惜好景總係不常，正當艾菲諗住一切都上晒軌道，奶量就忽然喺陪月走咗嘅第二個星期急跌，最嚴重一次係每邊只泵得一安，要每邊輪流再泵兩三次先勉強湊夠數畀BB豆豬飲，仲要咁啱遇上BB豆豬飲成個鐘都飲唔晒枝奶，望住佢剩低嘅成安奶，艾菲又一次跌落谷低，第二次出現放棄母乳嘅念頭，然後忍唔住打畀返緊工嘅米高爆喊，嚇到佢猛叫艾菲飲多D水同食自己鐘意食嘅嘢，再喺放工後跑去買谷奶嘢畀艾菲。
為咗追奶，艾菲仲跟fb母乳谷D媽媽教，一日做兩次做power pump（每次要用一個鐘），又不停灌自己飲嘢食嘢，燒腩仔公公婆婆知道後，更專登喺weekend買齊料過來，煲大煲愛心谷奶湯水畀艾菲，仲幫忙湊住燒腩仔同BB豆豬兩隻小魔怪，等艾菲可以專心休息一吓放鬆心情，好彩經過三日嘅努力後，奶量好快回復正常，而其後嘅日子入面，每星期都總有一兩日嘅奶量係差少少（通常係黃昏一泵最易出事，因為未必日日有時間食下午茶，再加上BB豆豬呢個鐘數通常唔肯再瞓喺到爆喊扭抱，燒腩仔亦就快無電特別搞事唔合作），但只要艾菲深呼吸放鬆心情唔好太緊張，最終都係可以泵夠BB豆豬飲兼留到多枝五安奶畀燒腩仔第二朝做早餐。
成日上網見D媽咪介紹唔同嘅谷奶嘢，其實艾菲早喺坐月期間已經發現自己身體對呢D嘢反應唔太大，只要食飽飲夠自然就會有奶，不過當奶量急跌時係會乜都試吓，其中最多媽咪推介嘅黑豆茶，椰青水同黑麥汁（超難飲），艾菲試完證實係零反應，木瓜同魚湯都唔見得有效，唯獨係對章魚湯同韓國Morning Rice米漿（啱啱睇新聞話對奶類敏感嘅人飲咗呢枝嘢可能會有不適）有輕微反應，反而有晚喺Toast Box食咗碗喇沙，唔知關湯底D椰奶事定海鮮事，居然離奇地谷咗成晚﹗
唔覺唔覺就做咗兩個幾月全泵媽，BB豆豬食母乳嘅日子已經長過想當年嘅燒腩仔，成功過咗畀自己嘅第一個check point，最感激身邊有米高同燒腩仔婆婆嘅全力支持，無咗佢兩個艾菲一定撐唔住，亦好慶幸自己身體今次好爭氣，so far都無塞奶嘅情況出現（touch wood），頂多初時谷奶有試過幾日凌晨時份沾寒沾凍（無發燒），見過鬼超怕黑嘅艾菲每日例必認真檢查乳腺確保一切正常。
餵母乳本身就係一條唔容易行嘅路，仲要做全泵媽更加係攞苦來辛玩自己，有時真係會好似肚B媽所講感到孤獨，覺得好迷失唔知咁辛苦值唔值，甚至會閃過放棄嘅念頭，但眼見BB豆豬一日一日咁健康成長，越來越大隻同精靈識玩識笑識扭計，足證艾菲D奶應該係有D料到，所以可以的話艾菲會繼續堅持落去，將最好給最愛，媽媽要多多加油呀﹗
沒有留言:
張貼留言