試用：韓國Manito護頸護肩透氣嬰兒坐墊

自從兩年前幫燒腩仔換咗部新BB車之後，雖然新車明顯比舊車穩定，但車身始終有D單薄，所以艾菲一直都物色緊一個好D嘅BB車坐墊，想等燒腩仔坐得舒服D，期間艾菲淘又淘過，喺反斗城買又買過，去旅行時仲買咗個日本出嘅冰涼墊來試，結果啦...都唔係好啱心水，終於畀艾菲遇到呢款韓國出嘅Manito護頸護肩透氣嬰兒坐墊，真係可以用perfect來形容佢﹗



之前用過嘅坐墊，通常都只係一塊厚身少少嘅棉布，夏天仲要加返塊蓆先用得，但Manito呢個坐墊，係3D立體網狀設計，唔焗身超透氣，可以話係冬暖夏涼，等小朋友keep住乾爽，最重要係佢頭部cushion兩邊設計到U型咁，保護到頭仔同頸仔，用咗佢就唔使再突登帶個枕頭出街畀佢哋瞓咁麻煩。



坐墊兩邊膊頭位仲有加厚墊，行車時可以保護到BB膊頭，可以卸咁D震盪，而且好貼心係拆得出來，好似燒腩仔呢D咁大個仔嘅用時，佢哋膊頭已經比較闊，就可以拆出來，唔使頂住唔舒服。

出走嶺南

前一個星期日，離開錦田鄉村俱樂部後，我哋就去咗元朗食飯，基於被自由人攻陷嘅元朗實在人多得恐怖，所以食完飯我哋就急急腳徹退，向住另一個目的地嶺南大學進發，順便帶燒腩仔去坐吓喺馬路行嘅火車輕鐵。



嶺南大學，係艾菲嘅母校，短短三年嘅校園生活，雖然無上莊亦唔太投入，但足以影響艾菲一生，每次行入學校大門，都會特別感概，到宜家仲清楚記得，想當日Jupas no offer，自覺衰到貼地徬徨無助時，就係嶺南畀咗個重生嘅機會自己，所以畢業之後每遇到咩唔開心諗唔通，艾菲總會返來學校行吓望吓，提醒自己係幾咁幸福同幸運。



今次帶燒腩仔來，其實係想畀佢見識吓嶺南貓嘅魅力，點知...返到來一隻嶺南貓都見唔到，反而昔日嶺南貓嘅莆點變咗呢個彩園，有無人知佢哋去晒邊呀？？？

小小農夫摘士多啤梨

上年已經想帶燒腩仔去摘士多啤梨，不過到醒起時已經近水尾，後來拖吓拖吓就無咗件事，今年的起心肝要帶燒腩仔去，但都拖到前一個星期日先成行...出發前艾菲上網search咗一輪資料，為免多人有考慮過粉嶺再入嘅士多啤梨園，不過米高話交通超唔方便ban咗，最終去咗比較多人推介嘅錦田鄉村俱樂部，可以喺西鐵錦上路站轉小巴過去，亦都相對多嘢玩同多人D。



艾菲：小小農夫準備好未？整咩個樣好似仲未瞓醒咁㗎？畀D精神啦﹗夠鐘開工啦﹗



燒腩仔：等我搵吓邊到有又大又紅嘅士多啤梨先

回到母校

艾菲從來唔係D咩高材生亦唔特別醒，不過想當年就好好彩咁派到入區內band 1嘅中學，一讀就係七年，雖然一直係成績最差嘅一群，但至少學校畀咗一個傳統得來都算自由同開放嘅環境我哋，造就咗今日唔怕死同願意面對失敗嘅艾菲（無計啦，D同學實在太強，會考八A嘅同學係數以十計，艾菲就年年考尾幾，稍為諗歪D都真係會頂唔住），畢業之後幾年都有返去探過老師，但自從出來做嘢之後好難就時間，再加上部分教過艾菲嘅老師陸續退休，都真係好耐無返過去啦，咁啱畢業後返咗去教書嘅好姊妹通知，母校四十周年喺前一個星期六搞咗個fun fair，見幾得意就決定山長水遠都帶燒腩仔返去玩吓（山長水遠係一D都無誇張，皆因艾菲間母校位處山頂，打風落雨真係要攀山涉水先到㗎﹗）。



母校唔係一般政府倒模出來嘅學校，地方算大亦有自己設計，幾十年前仲拎過設計奬添㗎，而呢個位於正門嘅金魚池就係特色位之一，我哋當年返學放學日日都會行過，仲試過有同學玩到跌落水，而燒腩仔第一次行都有少少驚，因為佢級與級之間係有D罅，稍為唔小心就會跌落去，好彩佢最終都大步檻過。



至於紅磚牆都係母校嘅另一特色位，咁難得帶咗燒腩仔返來，梗係要捉佢喺到影吓相啦，不過叫佢整happy face，佢唔係遮住塊面就係合埋眼笑囉... >.<

紅葉＠青衣公園

又來到一年一度賞紅葉嘅季節，所以襯前一個星期日一早入咗迪欣湖，見出返來都順路就帶燒腩仔去青衣公園走一轉，可能因為時間尚早D葉仲未變晒紅，所以呢日出奇地唔係太多人（上年試過星期日來旺到去咗旺角咁），係多咗D龍友帶齊裝備企喺D影相位到狂影姐，不過亦因為咁益我哋可以影到張唔錯嘅家庭相（請龍友揸機影相是常識吧，kakaka...）。



由第一年來，燒腩仔仲係個手抱BB，到第二年來只係顧住追白鴿，今次第三年來活動能力再強勁D，完全失控好似枝箭咁四圍跑，想叫佢企定定影張相都難，唔係唔望鏡頭就搵手遮住個樣，又或者望住鏡頭整個核突笑，再來就未企定已經走咗去。



專登拉佢去返公園中間個影相位影返張相留念，對比返之前兩年喺同一個位置影嘅相，今年終於唔使舉啞鈴咁舉高佢來影，出來效果都叫做自然D，唔...唔知呢D相仲可以影多幾多年呢？

步行籌款＠迪欣湖

寫呢篇blog之前，首先要多謝咁多位blog友嘅支持同關心，過去一個月對於艾菲同米高來講真係唔容易過，早幾日都有同米高講返自己嘅感受，得到評語係「你仲未放得低」，的確...宜家嘅艾菲已經無日日以淚洗面，不過一諗起「佢」個心仲會拿住拿住，但自從返醫院覆診證實身體一切正常，亦開始咗睇中醫調理之後，個人係積極咗輕鬆咗，至少知道要愛自己愛米高同愛燒腩仔，知道要勇敢向前走...

其實艾菲返娘家抖咗差唔多三星期之後，前一個星期六已經返咗屋企同燒腩仔一家團聚，本來都想抖多個星期，但眼見無媽媽喺身邊嘅燒腩仔已經有畀爺爺嫲嫲寵壞嘅跡象，咁啱又一早報咗名參加佢學校前一個星期日搞嘅步行籌款，就索性早D返去睇返實個仔，免得佢無皇管做咗皇帝仔，艾菲以後就有排受啦﹗



我哋因為K1 interview miss咗燒腩仔嘅學校旅行，難得今次有步行籌款梗係參加啦，呢朝天氣都幾凍，迪欣湖咁空礦就更加大風，正在休養中嘅艾菲都驚出事入風，所以有理無理著件羽絨包實自己（中醫話要好似坐月咁，而當時嘅艾菲係未刑滿，仲要明顯feel到自己個人好虛），落車後個個都爭住入7-11買熱飲同嘢食，艾菲就同燒腩仔睇吓迪欣湖icon噴水池同湖入面D錦鯉。