阿媽唔易做...

睇到呢單新聞，艾菲真係好shock同好sad，雖然明白產後抑鬱有幾恐怖，都係好難相信有阿媽會忍心殺咗自己個小朋友，仲要係個只得歲半大嘅可愛BB女，可以想像呢個媽媽呢段日子以來一定係撐得好辛苦，好希望佢接受治療之後能夠康復，同個仔一齊堅強面對以後嘅一切...

可能燒腩仔都係歲半大，所以艾菲特別感觸， 亦咁啱燒腩仔尋日先無端端為咗條新浴巾喊咗成個鐘，叫極都唔肯收聲仲抓到成身損晒，再加上艾菲呢幾日病病地，畀佢嘈到個頭超級痛，真係有一吓情緒幾乎崩潰，不過艾菲最終只係自己坐咗係梳化到喊咗一陣，一諗起佢唔扭計時係幾咁可愛就唔捨得做傻事啦。

做全職媽媽廿四小時對住小朋友，好多時開心唔開心都會受到小朋友影響，如果再加埋其他負面嘅外在因素，例如父妻感情唔好，或者經濟有問題咁，真係好容易鑽牛角尖，所以艾菲呢年幾以來就算幾攰都好，都好堅持每日要抽返D時間出來做自己想做嘅嘢來平衡吓，例如整包整蛋糕，睇吓myTV，寫吓blog，上網淘吓寶，簡中都會搵婆婆或者嫲嫲幫手湊住燒腩仔，自己出去處理D私務順便透吓氣，至少令自己嘅生活唔會只係變到得返湊仔做家務同瞓覺咁枯燥乏味。

自己生完燒腩仔時，都試過為咗佢明明有奶都唔肯埋身飲而喊到收唔到聲，或者係艾菲本身有親戚有精神病所以比較alert啦，呢次喊完之後都有主動同米高傾吓點解決好，之後有咩唔開心都會同佢或者老死Ice媽媽講同呻，其實有D位真係唔係要咩安慰，只係搵個可靠嘅人講出來已經舒服好多，然後唔覺唔覺就捱過咗最容易出事嘅坐月歲月，如果唔係屈埋屈埋，艾菲自覺都幾大機會有產後抑鬱。

自從有過呢次經驗之後，艾菲深深明白新手媽媽嘅徬徨同無奈，所以每次見到身邊親友生BB，除咗會主動關心對方要唔要幫手，盡力幫忙解決親友嘅湊B疑難之外，都會提醒對方老公要好好注意老婆情緒，因為屋企人尤其係老公嘅支持同體諒真係好好好重要﹗

當然艾菲都要多謝米高呢年幾以來嘅無限量支持，畀任性嘅艾菲達成心願做全職媽媽，一個人一份糧撐起頭家已經唔容易，有時攰到死明明想瞓仲要畀艾菲捉住係咁講，逢放假又要早起湊燒腩仔等艾菲瞓耐D休息多D， 亦從來無逼過艾菲做晒全屋家務，甚至無心情見攰突然唔煮飯都永無說話聽，兼夾有時會煮返轉頭畀艾菲食添（當然只係煮D簡單嘢啦），所以艾菲時不時都會提醒自己真係好幸福，一定要好好珍惜眼前嘅一切﹗